domingo, 8 de noviembre de 2026
No marco da celebración do cincuenta aniversario do Club Ciclista Padronés, celébranse nesta localidade coruñesa os Campionatos de España de Ciclismo para as modalidades de cadete masculino e cadete e junior feminino. Tivo lugar a presentación por parte do director xeral para o Deporte, á que acudiron tamén o presidente do club organizador, Tanis Vázquez; o presidente da Federación Galega de Ciclismo, Manuel Martínez, e o concelleiro de deportes de Padrón, Manuel Baltar.
Santiago Domínguez destacou na súa intervención o mérito dun club que leva cincuenta anos loitando polo ciclismo galego, unha tarefa nada doada para os clubs de base que non contan co poder mediático mais que aínda así apostan pola incorporación de nenos e nenas ao deporte. O director xeral reiterou o apoio do seu departamento ao labor de entidades coma o Club Ciclista Padronés para que, co seu traballo acaden grandes obxectivos, que non son as portadas dos medios de comunicación, senón conseguir incrementar o número de licenzas federativas e espertar a paixón polo deporte nos nenos e nenas para que cada vez sexan máis os que practiquen ciclismo.
Tanis Vázquez fixo un repaso pola historia do club, lembrando que nel se formaron grandes deportistas da historia do ciclismo galego, coma Jesús Blanco Villar, Vidal ou Oliveira, e insistiu nas dúas faces do C.Ciclista Padronés, a deportiva e a organizativa. Nesta última, o presidente destacou que este é o cuarto Campionato de España que celebran na súa localidade. Por outra parte, Tanis Vázquez, tamén reiterou a importancia que dende o club se lle concede á súa escola de ciclismo que dende os anos setenta traballa na formación de novos ciclistas.
O presidente da Federación Galega agradeceu o apoio da Dirección Xeral para o Deporte e destacou o bo momento do ciclismo galego que está a cativar fóra das nosas fronteiras, tanto polos nosos resultados como pola nosa capacidade de organización.
O Campionato de España percorrerá os concellos de Padrón, Rois e Dodro.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
