Notas de prensa

María Tarsy Carballas presidiu a primeira reunión do Consello Asesor de Investigación e Desenvolvemento Tecnolóxico de Galicia

A investigadora María Tarsy Carballas presidiu en Santiago de Compostela a primeira reunión do Consello Asesor de Investigación e Desenvolvemento Tecnolóxico de Galicia. Nesta primeira xuntanza, os 19 membros que integran este órgano asesor debateron o borrador do Plan Galego de Investigación, Desenvolvemento e Innovación 2006-2010 para a emisión dun informe que será remitido á Comisión Interdepartamental de Ciencia e Tecnoloxía de Galicia (CICETGA) para a aprobación definitiva do Plan.

O Consello Asesor de Investigación e Desenvolvemento Tecnolóxico de Galicia é un órgano que se creou ao amparo da Lei 12/1993 do 6 de agosto, de Fomento da Investigación e do Desenvolvemento Tecnolóxico de Galicia. Esta lei creou unha serie de instrumentos co obxectivo de acadar unha correcta coordinación dos recursos da investigación, entre os que se atopan o Consello Asesor de Investigación e Desenvolvemento Tecnolóxico e o Plan Galego de I+D+i, que é o conxunto de programas coordinados, orzamentados, priorizados e finanzados que responden á política científica e tecnolóxica galega.

UNHA PIONEIRA NO ESTUDO DO SOLO DA ZONA TEMPERADO-HÚMIDA DE ESPAÑA

A presidenta do Consello Asesor de Investigación e Desenvolvemento Tecnolóxico de Galicia é a investigadora María Tarsy Carballas Fernández, natural da localidade luguesa de Taboada. Tarsy Carballas é doutora en Farmacia e licenciada en Ciencias pola Universidade de Santiago de Compostela e, na actualidade, traballa como profesora de investigación do Consejo Superior de Investigaciones Científicas (CSIC), organismo ao que accedeu no ano 1965. No seu currículo destaca o seu cargo como académica numeraria da Academia de Farmacia de Galicia e doutora “Ad Honorem” vinculada ao CSIC. A investigadora dirixiu tamén o Instituto de Investigacións Agrobiolóxicas de Galicia do CSIC.

Como investigadora principal, María Tarsy Carballas participou en 18 proxectos de investigación financiados por distintos organismos, e dirixiu sete tesis de doutoramento e once memorias de licenciatura. É autora tamén de 150 publicacións: 12 libros científicos, 6 traducións de libros científicos, 10 capítulos de libros, 67 artigos publicados en revistas internacionais incluídas no Science Citation Index, 52 artigos publicados en revistas españolas e extranxeiras e tres artigos de divulgación. Ademáis, posúe máis de 50 documentos científico-técnicos non publicados e 87 comunicacións en Congresos. Ademáis, imparte cursos de postgrado nas tres universidades galegas, así como numerosos cursos de verán e de especialización de diversas institucións nacionais.

María Tarsy Carballas desenvolve o seu traballo investigador no campo da Edafoloxía (Ciencia do Solo) e, neste eido, é pioneira no estudo da xénese, clasificación e cartografía dos solos da zona temperado-húmida de España, na caracterización e dinámica da materia orgánica dos solos, bioquímica do solo, reciclaxe de materiais orgánicos residuais como fertilizantes orgánicos, efectos dos incendios forestais sobre as propiedades do solo, efectos dos retardantes de lapa sobre o sistema solo-pranta e recuperación de solos afectados por incendios.

Na actualidade, traballa na predición do risco de incendios mediante ferramentas informáticas, dinámica do nitróxeno e do carbono en sistemas agroforestais, calidade do solo e sostenibilidade dos ecosistemas mediante técnicas de conservación e recuperación de solos degradados e secuestro de carbono no solo para diminuír a emisión de CO2 á atmósfera e mitigar o cambio climático global. A investigadora introduciu en España novas técnicas de estudo das substancias húmidas, de bioquímica do solo e de restauración de solos queimados. Nesta liña, creou o Grupo de Excelencia de Bioquímica do Solo en 1980 e dirixiuno até o ano 2004.

DEZANOVE MEMBROS PROCEDENTES DOS SECTORES INVESTIGADOR, UNIVERSITARIO, EMPRESARIAL E SINDICAL

O Consello Asesor de Investigación e Desenvolvemento Tecnolóxico de Galicia é un órgano creado ao amparo da Lei 12/1993 do 6 de agosto que tén como funcións principais as de propor obxectivos para a súa incorporación ao Plan Galego de Investigación, Desenvolvemento e Innovación, propor á Comisión Interdepartamental de Ciencia e Tecnoloxía de Galicia (Cicetga) a incorporación ao plan daqueles programas que considere importantes e a de emitir un informe sobre o anteproxecto de plan.

Conforman ademais o Consello Asesor de Investigación e Desenvolvemento Tecnolóxico de Galicia: Senén Barro Ameneiro, reitor da Universidade de Santiago de Compostela; José María Barja Pérez, reitor da Universidade da Coruña; Alberto Gago Rodríguez, reitor da Universidade de Vigo; Salustiano Mato de la Iglesia, Director Xeral de I+D+i; Emilio Nogueira Moure, Secretario Xeral da Consellería de Innovación e Industria; Rogelio Conde-Pumpido, Director Xeral de Promoción Científica e Tecnolóxica do Sistema Universitario de Galicia e Uxío Labarta Fernández, delegado do Consejo Superior de Investigaciones Científicas en Galiza. Por parte das organizacións sindicais máis representativas (CIG, UXT e CC.OO), integran o Consello Asesor: Fernando Sabio Maroño, Juan Carlos Fernández Fernández e Félix María Sarmiento Escalona, respectivamente. En representación da Confederación de Empresarios de Galicia: Eduardo Giménez Domínguez, Miguel Castrillón Fagil e José Ramón Pais Curto. A proposta da Comisión Interdepartamental de Ciencia e Tecnoloxía de Galicia, forman parte do Consello Asesor: Javier Riera Nieves, José Luis Fernández Carnero e Laura Tato Fontaíña. Finalmente, ocupa o cargo de secretario deste órgano asesor José Manuel Cotos Yáñez, Subdirector Xeral de Innovación Empresarial.