domingo, 3 de mayo de 2026
O vicepresidente da Xunta, Anxo Quintana, presentou a proposta do Acordo Galego polo Fomento da Responsabilidade Social na Empresa, documento que ten como finalidade favorecer a creación dunha cultura de responsabilidade social nas empresas de Galiza. Quintana explicou que o Acordo parte do convencemento de que a día de hoxe o mundo da empresa debe ser máis que produtividade, conta de resultados, balance, beneficios ou débedas. A empresa no mundo moderno tamén ten unha responsabilidade social, xa que o seu funcionamento ten que servir para vertebrar a sociedade e conseguir a igualdade de oportunidades, aseverou Anxo Quintana.
O vicepresidente da Xunta explicou que o obxectivo xeral da proposta promovida pola Vicepresidencia da Igualdade e do Benestar é establecer unha nova dinámica nas relacións laborais para avanzar na instalación da cultura da responsabilidade social na empresa. Este é un paso fundamental para construír unha sociedade cohesionada e incluínte, apuntou.
Anxo Quintana recoñeceu que é evidente que na actualidade subsisten disparidades entre os diferentes colectivos sociais no mercado de traballo, polo que hai que favorecer o desenvolvemento da igualdade de oportunidades en todos os eidos, iso é a responsabilidade social. Nesta liña, quixo deixar claro que apostar pola responsabilidade social é un xeito inequívoco para conseguir máis produtividade e máis competitividade.
Diálogo social
Segundo explicou Anxo Quintana, a Vicepresidencia da Igualdade e do Benestar está a implicar nesta iniciativa a organizacións empresariais, representantes sindicais, colexios profesionais, cámaras de comercio e industria, organizacións da sociedade civil e empresas de servizo público. Estes axentes sociais están a recibir a proposta do acordo para que poidan estudala e realizar as súas achegas. Establécese o mes de xullo como período de intercambio, debate e discusión da proposta, co que se busca un amplo consenso social que respalde o Acordo. O obxectivo é que a finais do mes de xullo se poida asinar formalmente o documento.
Na súa intervención Quintana asegurou que non é casual a coincidencia da proposta do Acordo Galego polo Fomento da Responsabilidade Social na Empresa coas distintas iniciativas lexislativas encamiñadas a mellorar a situación laboral en Galiza. Segundo explicou Anxo Quintana, hai que darlle alma ao corpo lexislativo posto en marcha pola Xunta, xa que non se acadan obxectivos se non existe unha vontade política, social e individual para facer efectivo ese marco lexislativo.
No tocante á resposta dos sectores implicados neste proceso, Quintana amosou a súa satisfacción polo positivo recibimento que está a ter a proposta entre os seus destinatarios. Ademais, lembrou que xa son moitas as empresas que traballan no eido da responsabilidade social, xa que entenden a empresa como un ben social.
Igualdade de oportunidades
No mercado laboral actual subsisten as disparidades entre diferentes colectivos sociais, e son as mulleres, a xente moza e as persoas con discapacidade os grupos máis prexudicados. Esta situación pon de manifesto a necesidade de favorecer unha auténtica estratexia de loita activa contra toda clase de discriminacións.
O Acordo Galego polo Fomento da Responsabilidade Social na Empresa promove, no caso do colectivo feminino, un primeiro paso que é o coñecemento e recoñecemento da situación laboral das mulleres, identificando as limitacións existentes no relativo á garantía dos seus dereitos como cidadás. Promóvese a posta en valor da contribución das galegas ao desenvolvemento económico do país, a loita contra o desemprego feminino e a igualdade salarial e profesional en todos os sectores. A finalidade é promover unha cultura empresarial favorable ao desenvolvemento de políticas de conciliación ca vida familiar, persoal e laboral nos centros de traballo.
Asemade, o Acordo incide na necesidade de fomentar prácticas responsables na contratación da mocidade e das persoas con discapacidade. Búscase así impulsar o concepto da mocidade como motor do mercado laboral, impulsando a súa implicación e participación en condicións de igualdade de oportunidades; promover e estimular a presenza e participación das persoas con discapacidade no eido laboral, que debe converterse nun novo escenario de oportunidades para unha integración social completa; e favorecer un contorno que estimule a aprendizaxe continua, garantindo o acceso do persoal aos recursos de formación e asesoramento como elementos determinantes para mellorar as condicións de acceso ao emprego, á estabilidade laboral e ás posibilidades de promoción.
O Acordo Galego polo Fomento da Responsabilidade Social na Empresa está baseado nunha estratexia global que busca implicar a empresas, ao seu persoal, a administracións públicas, a representantes sindicais e ao conxunto da sociedade galega como actores impulsores da igualdade de oportunidades e a prol do desenvolvemento sostible.
CiberLabFP configúrase como un espazo de aprendizaxe, experimentación e desenvolvemento de competencias en contornos reais que integran tecnoloxías da información (IT) e de operación (OT) para así adaptar a Formación Profesional aos novos escenarios de transformación dixital. Entre as súas funcionalidades destacan a formación especializada do profesorado, a simulación de ciberataques e defensa en contornos virtuais, a análise forense industrial ou a validación de sistemas. Ademais, contará cunha estación móbil que permitirá levar a tecnoloxía a centros educativos e realizar demostracións en empresas e feiras.
Celebrouse hoxe a sesión constitutiva do Foro do Litoral de Galicia, que será o máximo órgano colexiado de consulta e participación do conxunto da sociedade co fin de optimizar a xestión e ordenación da costa galega. Nel están representadas a Administración autonómica e as locais así como os sectores social, científico, económico e medioambiental e as entidades implicadas na protección do patrimonio natural co fin último de garantir unha gobernanza que permita unha participación suficiente de todos os sectores da sociedade interesados no litoral. A constitución do foro facilitará a partir de agora facer un seguimento das normas, políticas e instrumentos do litoral.
