jueves, 17 de julio de 2025
A Consellería de Economía e Facenda acolleu unha reunión entre o titular do departamento, José Ramón Fernández Antonio; o conselleiro de Medio Ambiente, Manuel Vázquez; e o vicepresidente e conselleiro delegado de Unión Fenosa, Honorato López Isla, acompañado polo delegado da compañía eléctrica en Galicia, Luis Díaz López. Con esta reunión a Xunta de Galicia e a empresa avanzaron no obxectivo de reforzar os proxectos da compañía en Galicia e afondar na súa relación co tecido produtivo e a sociedade galega.
No ámbito da reunión incluíronse temas de interese mutuo en relación coa actividade da empresa e cos proxectos de investimento da mesma en Galicia. O conselleiro de Economía destacou o clima de colaboración intensa de Fenosa coa Xunta de Galicia e subliñou a boa disposición da compañía para colaborar coa Administración en diferentes ámbitos. Fernández Antonio citou, entre outras, a colaboración en materia de desenvolvemento sostible nas áreas onde a firma conta con embalses e centrais hidroeléctricas. Tamén indicou outras áreas de investimento da eléctrica nos sectores das telecomunicacións e proxectos vinculados á sociedade da información, en alusión ao proxecto de creación dunha factoría de software.
En canto aos espectos tributarios, e dentro do conxunto de estudos que a consellería fai neste ámbito, Fernández Antonio fixo referencia específica ao marco medioambiental onde, segundo indicou, existen posibilidades de creación dun tributo medioambiental vinculado ao uso da auga nas centrais hidroeléctricas. Lembrou, neste sentido, que se trata dun tema que corresponde á Xunta e indicou que, nun sentido máis amplo, o proceso se enmarca no da propia revisión do Estatuto e mesmo na revisión do sistema de financiamento autonómico.
O Goberno galego incrementará o orzamento destinado á formación do persoal dos servizos de prevención de incendios forestais ata os 1,8 millóns de euros no bienio 2025-2026, o que supón un 19% máis que no período anterior. Esta medida enmárcase no Plan de Prevención e Defensa contra os Incendios Forestais de Galicia (Pladiga), cuxo obxectivo é minimizar o impacto ecolóxico, económico e social dos lumes, optimizando os recursos dispoñibles. O compromiso formativo da Consellería do Medio Rural xa se reflectiu en 2024, cando se impartiron 473 cursos con 11.447 participantes e máis de 108.000 horas de adestramento. Entre 2019 e 2024 investiuse un total de 2,6 millóns de euros, permitindo a realización de 159 accións formativas e case 469.000 horas lectivas.
O 58% dos 855 ciclos de Formación Profesional ofertados para o próximo curso en Galicia complétanse na primeira adxudicación de prazas pechada onte pola Consellería de Educación, Ciencia, Universidades e FP, e que dá dereito a matricula. Segundo os datos recabados, un total de 56.049 persoas presentaron solicitude para cursar algunha modalidade de Formación Profesional, o que representa un incremento do 3,5% (1.898 solicitudes máis) con respecto ao curso 2024-25, e supón acadar de novo un máximo histórico que confirma o interese que espertan estas ensinanzas.
