Notas de prensa

O SLG denuncia o financiamento público para a investigación de pesticidas na Universidade de Santiago

Un grupo de científicos do departamento de Química Orgánica da Universidade de Santiago vén de patentar un novo tipo de herbicida polo que xa se interesou a multinacional Bayer. Diante desta nova, o Sindicato Labrego Galego quere denunciar o feito de que, desde institucións públicas galegas, se estean a financiar investigacións totalmente inútiles, prexudiciais e lucrativas para as multinacionais.

Xa hai tempo que foi superada a necesidade inevitable de empregar agrotóxicos nas actividades agrarias –aínda que sexan herbicidas pretendidamente intelixentes, coma neste caso-. Hoxe en día, o control das herbas só se debería realizar con métodos ecolóxicos, que non inclúen a utilización de substancias químicas estrañas. A pretensión de crear un herbicida hipersensible e potente é un delirio das elites científicas, xa que está máis que demostrado que unha substancia estraña sempre altera o ecosistema e favorece a aparición doutras herbas resistentes.

Os departamentos de Química Orgánica de todo o mundo teñen fracasado sistematicamente neste campo dos biocidas, xa que a súa metodoloxía parte do descoñecemento dos equilibrios dos ecosistemas e da fisioloxía da planta, polo que non poden –nin deben- seguir enganando aos gobernos e contribuíntes sacando novos coellos da chistera. Por todo isto, o SLG esixe a paralización destas pescudas e a cancelación inmediata de fondos públicos de calquera orixe para apoialas.

Por se non abondasen os argumentos científicos, resulta inmoral que desde a Xunta non se dediquen os fondos do Plan Galego de I+D+I ao fomento de técnicas sustentábeis e respectuosas co medio ambiente e, en troques, se desvíen cartos ás multinacionais que xa dispoñen de centros de pescuda hipersubvencionados polos gobernos dos seus países, como acontece coa Bayer Crop Science. Neste senso, cómpre saber que o posíbel socio para comercializar o achado galego, a multinacional Bayer, xa fabrica e vende todo tipo de agrotóxicos; de feito, só na categoría de herbicidas fabrica sete substancias altamente perigosas - Anilofos, Bromoxynil, Diclofop, Fenoxaprop, Oxadiazon, Isoxaflutol e Metribuzin- con evidencias científicas de que provocan cancro, intoxican o sistema reprodutivo e inhiben a enzima colesterasa nas persoas.

No “Libro negro das marcas”, dos xornalistas alemáns Klaus Werner e Hans Weis, a Bayer ocupa un lugar de privilexio entre as multinacionais con menos escrúpulos do planeta. Nacida da IG Farben, que deseñou e fabricou o Zyklon B co que os nazis gasearon a miles de persoas nos campos de exterminio, e a parte de estar acusada de explotación infantil e contribuír ao sostemento de guerras, Werner e Weis explican que “os herbicidas de Bayer ocasionaron lesións graves en persoas e animais, sobre todo no Terceiro Mundo. Por exemplo, co Baysiston (utilizado no cultivo do café); co Gaucho (para o xirasol, e causante da morte de miles de colmeas de abellas en Europa); ou cos perigosísimos Nemacur, Folidol e Baycor, denunciados pola Comisión de Dereitos Humanos da ONU por provocar graves enfermidades no sueste asiático”.