Notas de prensa

A Xunta presenta a primeira oferta de mellora salarial para persoal funcionario e laboral da Administración Xeral

A Xunta de Galicia presentou a primeira oferta para mellora salarial que realiza o Goberno para persoal laboral e funcionario da Administración Xeral da Comunidade Autónoma. Esta oferta presentouse esta mañá nunha xuntanza mantida coa Mesa Sectorial de Negociación de Funcionarios e co Comité Intercentros de Persoal Laboral da Xunta.

Así, a Consellería de Presidencia, Administracións Públicas e Xustiza, atendendo ás demandas das distintas representacións dos empregados públicos, pretende chegar a un acordo retributivo plurianual que unifique condicións e sexa aplicable tanto ao persoal funcionario como ao laboral que non conta con acordos retributivos específicos, como sucede cos funcionarios docentes, o persoal ao servizo da Administración de Xustiza e o persoal que presta os seus servizos en institucións sanitarias do Servizo Galego de Saúde.

Segundo o acordo proposto, a Xunta destinará en concepto de fondos adicionais un total do 1,05 % da masa salarial correspondente a persoal funcionario da Administración Xeral e ao persoal laboral dependente da Dirección Xeral da Función Pública, ao que lle é aplicable o réxime retributivo previsto na Lei 4/1988, da Función Pública de Galicia. Nos anos 2007, 2008 e 2009 o incremento será do 1%.

Durante o ano 2006, o complemento específico de tódolos funcionarios afectados (12.192 no ano 2006) incrementarase en 180 euros anuais, como primeira fase dun proceso real de valoración de postos de traballo a través do desenvolvemento de complementos específicos. Nos anos 2007, 2008 e 2009 o incremento xeral será de 90 euros cada ano (270 euros no período de 2007-2009).

As mesmas cantidades, en cómputo anual, serán de aplicación ao persoal laboral representado no Comité Intercentros (9.899 efectivos en 2006), a través do incremento do plus de funcións.

Programas de incentivación

As cantidades anuais sobrantes para cada ano serán destinadas para programas de incentivación ou valoración de postos de traballo e, en especial, para a adaptación dos complementos específicos ás circunstancias especiais do posto de traballo, e para o recoñecemento do complemento de singularidade de posto que retribúa as circunstancias de penosidade, toxicidade, perigosidade, ou outras semellantes, de acordo co que se estableza no Convenio Colectivo.

Nos últimos anos tense producido, por razóns de política económica xeral, unha contención xeral dos incrementos dos salarios dos empregados públicos, con establecemento de límites cuantitativos de crecemento nas Leis de Orzamentos do Estado, con carácter de normativa básica e de obrigado cumprimento polas distintas Administracións Públicas. Esta contención salarial ten sido tamén a tónica xeral no sector privado.

Segundo a estatística elaborada polo Ministerio de Traballo e Asuntos Sociais, o incremento medio salarial previsto nos convenios asinados no ano 2005 foi do 2,98%. No último dato publicado, referido ao mes de abril de 2006, a media de incremento sitúase nun 3,1%. O incremento real dos salarios dos empregados públicos en Galicia para o ano 2006 sitúase nun 3,5%.

Sen embargo, é posible establecer incrementos adicionais sobre o límite global fixado na Lei de Orzamentos Xerais do Estado, sempre que as medidas se xustifiquen en programas de incremento da productividade ou de motivación vinculados ás características específicas do posto de traballo.