Notas de prensa

Facenda volve prexudicar ao colectivo labrego coa orde de redución de módulos no IRPF

Trátase, en principio, dun feito positivo, pois redúcense eses módulos para tratar de compensar o tremendo aumento dos custes de produción que experimentou a actividade agraria nos últimos tempos.

A pesares de ser unha boa nova, Facenda volveu demostrar coa publicación desta orde o seu desprezo de cara ao colectivo labrego. Vexamos por que:

• Como ben é sabido, o prazo para presentar a Declaración da Renda comezou o 2 de maio, e as contas desa declaración hai que facelas dende o 1 de xaneiro. A pesares destas evidencias, o feito de publicarse a orde o 23 de maio fixo que labregos e labregas perdesen case un mes do prazo estipulado por Facenda para facer a declaración.

• A maiores, quen xa presentase a súa declaración podendo acollerse á redución dos módulos, atópase con que agora deberá solicitar unha rectificación da mesma. Evidentemente, para que se puidesen facer as cousas de xeito correcto, Facenda debería ter publicado esta orde antes do 31 de decembro de 2005.

• Por outra banda, aquelas explotacións que teñan a súa titularidade como comunidade de bens ou sociedade civil, xa presentaron o modelo 184, que tiña de prazo ata o 30 de marzo e no que se atribuíron as rendas aos seus socios e socias, cuns rendementos incorrectos; isto provocará requerimentos polas discrepancias que xurdirán.

De todos xeitos, esta maneira de actuar non sorprende, pois o Ministerio de Economía xa ten afeitos aos labregos e as labregas deste país a un trato despectivo que os marxina. Neste senso, cómpre lembrar o desmantelamento de servizos que se está a facer nas delegacións comarcais da Axencia Tributaria, para centralizalos nas grandes cidades e apostar pola xestión a través de Internet. E isto a sabendas de que o traballo agrario deixa moi pouco tempo libre para realizar grandes desprazamentos innecesarios, e que no meirande do medio rural galego non hai posibilidade de conectarse á Rede.