sábado, 7 de junio de 2025
Baixo o título Os sons da Ponte este venres celébrase a décimo segunda edición de Ponte...nas Ondas!. Cincuenta e tres centros educativos de tres continentes, América, África e Europa, participarán nesta xornada de radio interescolar na que involucrarán 25 mil alumnos de primaria, secundaria, e universitarios.
A xornada foi presentada no edificio da Área Panorámica en Tui, onde o venres 26 de maio se sitúa o centro neurálxico de Ponte...nas Ondas!, xa que o seu Teatro alberga este programa radiofónico, e brinda a oportunidade de asistir ao mesmo a escolares e público en xeral. A presentación correu a cargo de Moisés Rodríguez, Concelleiro de Cultura de Tui, Santiago Veloso, Xerardo Feijoo, e Lourdes Carita da Asociación Ponte...nas Ondas! e Jose Font director da Radio Municipal de Tui.
Esta experiencia naceu en 1995 coincidindo coa apertura da Ponte Internacional entre Salvaterra e Monçao, segundo recordaba Xerardo Feijoo, Secretario de Ponte...nas Ondas!, indicando que se fixo outra ponte virtual que uniu aos alumnos galegos e aos portugueses co obxectivo de polos en contacto cos medios de comunicación e rachar o descoñecemento mutuo que existía. Dende entón o treito percorrido foi longo dicía, explicando que houbo dous momentos determinantes, o primeiro en 1999 coa emisión do programa ao través de internet, o que supuxo achegar a iniciativa a recunchos de todo o mundo, e o segundo en 2000 cando entrou na parte técnica a Radio Municipal de Tui explicou Xerardo Feijoo, sinalando que dende entón este foi un dato determinante na evolución da experiencia que este ano se acrecenta.
Lourdes Carita, representante de Ponte...nas Ondas! en Portugal, destacou pola súa parte a gran novidade na parte lusa da incorporación dunha escola de Madeira, e a volta a participación do Instituto de Beradêro e do Colexio Pedro Segundo de Brasil. A isto engadiu o feito de que por vez primeira as radios do Alto Minho van emitir integramente o programa, o que redundará na súa maior difusión e seguimento.
A este feito contribuirá tamén na parte galega a emisión de Ponte...nas Ondas! ao través da Asociación de Emisoras Municipais Galegas, EMUGA, o que segundo explicaba Jose Font, Director da Radio Municipal de Tui, converte a emisión en máis complexa ao enlazarse entre as diferentes emisoras por aire, por rdsi e por satélite.
Os sons da Ponte o lema que este ano ten esta xornada de radio interescolar é unha nova aposta de Ponte...nas Ondas! polo patrimonio inmaterial galego portugués que se candidatou a Patrimonio da Humanidade ante a UNESCO o ano pasado. Apostase amais, segundo Lourdes Carita, polos sons do pasado, do presente e do futuro, porque as tradicións se renovan e refaen en cada xeración.
Santiago Veloso, Presidente de Ponte..nas Ondas!, pola súa parte destacou as colaboracións musicais que haberá nesta edición de Ponte...nas Ondas! con estreas e temas feitos para esta xornada. Así Narf e Amelia Muge puxeron música a un poema de Rosalía de Castro para interpretar este venres día 26. Mentres Luanda Cozetti estrenará Alecrin, un tema galego portugués. E nesta xornada e logo o día 3 de xuño na V Mostra da Oralidade do Porriño, haberá oportunidade de coñecer o timbila un instrumento mozambiqueño proclamado Obra Mestra da Humanidade.
Santiago Veloso fixo amais unha invitación ao público e aos escolares a asistir en directo no Teatro Municipal de Tui á esta décimo segunda xornada de radio interescolar, ao tempo que manifestaba o seu agradecemento ao Concello de Tui e a emisora municipal pola colaboración prestada. Do mesmo xeito, Moisés Rodríguez, Concelleiro de Cultura de Tui, agradeceu que a presentación deste ano tivese lugar en Tui e destacou á Radio Municipal de Tui e o Teatro Municipal coma elementos importantes nesta edición.
A Xunta de Galicia completou esta semana os trámites para a autorización dos nove proxectos de repotenciación voluntaria de parques eólicos recibidas entre finais de 2023 e comezos de 2024 e que permitirán suprimir 286 aeroxeradores do territorio galego así como, coa mesma potencia, incrementar un 35 % a produción de enerxía renovable. Trátase dun procedemento que destacou pola súa axilidade pois os prazos de autorización administrativa acurtáronse considerablemente, completándose en menos dun ano desde a recepción do proxecto definitivo e cumprindo así co mandato comunitario de axilizar as xestións e garantir que non se alongan máis de dous anos.
O director xeral de Relacións Exteriores e coa UE, Jesús Gamallo, participou na asemblea xeral Comisión do Arco Atlántico da Conferencia das Rexións Periféricas Marítimas en Sevilla, na que se fixo balance do último ano e se presentaron as previsións para 2026. O director xeral interveu na sesión Un novo marco financeiro plurianual da UE: que hai para o Atlántico, onde defendeu un futuro da política de cohesión descentralizado e o rexeitamento ao cambio de modelo cara un plan único por estado membro, postura baseada nas experiencias previas que mostran que os programas operativos rexionais son a fórmula máis eficiente para a xestión dos orzamentos destinados á cohesión.
