Notas de prensa

Ricardo Varela informou ao ministro de Traballo sobre o anteproxecto de Lei Galega de Inserción Laboral das Mulleres

O conselleiro de Traballo, Ricardo Varela, informou ao ministro de Traballo e Asuntos Sociais, Jesús Caldera, do contido do anteproxecto de Lei Galega para a Inserción Laboral das Mulleres, que ven de preparar a Consellería de Traballo.

O conselleiro tivo ocasión de comentarlle polo miúdo as liñas básicas do anteproxecto, no marco da XXIX Conferencia Sectorial para Asuntos Laborais, celebrada na sede do Ministerio. Precisamente a orde do día trataba exclusivamente os capítulos que abordan materia laboral do Anteproxecto de Lei Orgánica de Igualdade entre Mulleres e Homes, elaborado polo Ministerio.

Varela trasladoulle ao ministro que o anteproxecto elaborado pola administración galega ven a complementar os contidos en materia laboral que se recollen no anteproxecto estatal, e destacou aspectos tales como a introdución da perspectiva de xénero en todos os ámbitos de cara á incorporación das mulleres en clave de igualdade, ou o recoñecemento da necesidade de conciliación da vida persoal, familiar e laboral, como dereito de homes e mulleres á configuración do seu tempo buscando a corresponsabilidade.

Así mesmo, no marco normativo que regula ás cooperativas, materia na que ten plena competencia de desenvolvemento lexislativo a comunidade autónoma, se modificará co obxectivo de axustar dita normativa ao principio de igualdade no seu grao máximo, ostentando socias e socios as mesmas obrigas e os mesmos dereitos.

O conselleiro tamén comentou co ministro a integración da igualdade no emprego e, en concreto, na formación profesional e nas políticas activas de emprego, que se recolle no anteproxecto galego, establecendo que, en calquera actividade formativa se poidan implantar medidas de acción positiva, se introduzan contidos obrigatorios sobre igualdade de oportunidades e sobre corresponsabilidade familiar e doméstica, con profesorado especializado e, en todo caso, se fomente a conciliación da vida persoal, familiar e laboral, do alumnado.

Na véspera da conmemoración do Día da Seguridade e Saúde no Traballo, Varela tamén lle transmitiu a Caldera, que outra das cuestións que se contempla no Anteproxecto de Lei Galega, xira precisamente entorno á prevención de riscos laborais, a través da integración da igualdade na política preventiva, co obxectivo de evitar desigualdades na prevención, desagregando por sexo os datos relacionados coa saúde laboral, estudando accidentes de traballo e enfermidades profesionais manifestadas sobre un dos sexos, investigando a influencia da situación de mulleres e homes na familia con relación ás necesidades laborais, establecendo formación específica en materia de saúde laboral e prevención de riscos dende a perspectiva de xénero e adaptando equipos de proteción, cirscunstancias do posto de traballo e condicións da súa execución aos diversos condicionantes de xénero. Así mesmo, se articularán medidas para combater en orixe os riscos derivados do embarazo, o paro e a lactancia e se realizarán actuacións en materia de prevención sobre colectivos feminizados.