jueves, 20 de agosto de 2026
O conselleiro de Traballo, Ricardo Varela, interveu no pleno do Parlamento para dar conta do proxecto de Lei de Inserción Laboral das Mulleres e das liñas de actuación sobre o emprego feminino que está a desenvolver o seu departamento.
Varela anunciou na Cámara que antes de que remate o semestre, a Lei de integración laboral da muller no mercado de traballo iniciará a súa andadura parlamentaria e será nese intre cando o seu texto poda ser enriquecido, aínda máis, coas aportacións dos grupos parlamentarios. Nese senso, a Consellería de Traballo presentará ao Parlamento un Proxecto de Lei que conteña medidas directas, concretas e de inmediato cumprimento, asegurou Varela.
O conselleiro de Traballo afirmou que xa o título que se está a barallar (Lei para a Inserción Laboral das Mulleres), fuxe das indefinicións e fai referencia explícita ás destinatarias das mesmas, as mulleres e engadiu que as medidas que conteñan serán medidas, non brindes ao sol nin declaracións de intencións.
Ricardo Varela sinalou que a perspectiva de xénero está incluída en todo o diálogo social, aparecendo como tema consensuado cos axentes económicos e sociais, pois na mesa de traballo referente ás Políticas de Emprego, Saúde Laboral e de Economía Social e da mesa sobre Cohesión Social e Igualdade terá un tratamento mais fondo e preciso. Varela sinalou, que o seu departamento ten claro que a muller é un obxectivo prioritario e tal prioridade no emprego xa a puxemos de manifesto nas medidas urxentes para mellorar a empregabilidade da mocidade galega onde contamos co consenso das organizacións económicas e sociais de Galicia.
Por outro lado, o responsable de Traballo asegurou que se apoiará explicitamente todas as iniciativas que aposten pola igualdade e axudará a que as empresas implanten Plans de Igualdade.
Consideracións sobre actuacións anteriores
Durante o pleno do Parlamento a deputada popular Susana López Abella preguntou ao titular de Traballo por accións promovidas polo anterior goberno como os Plans de Igualdade para as empresas, regulado pola Lei 7/2004 e polo suposto Plan de Emprego Feminino 2004-2006.
En canto aos Plans de Igualdade para as empresas, o titular de Traballo quixo recordar aos presentes e, especialmente a esta deputada, que esa Lei 7/2004, elaborada polo Goberno popular, carece da concreción precisa para o seu desenvolvemento e se cadra por iso vostedes,-dirixíndose a López Abella-, que gobernaban ata fai 7 meses, nunca desenvolveron tal previsión legal. O titular de traballo sinalou que nos 54 artigos dos que consta a devandita Lei e nas sete disposicións adicionais non sei fai referencia ao que é un Plan de Igualdade para as empresas.
Así mesmo o conselleiro explicou que esa Lei de Igualdade de Homes e Mulleres, posta en marcha polo Goberno anterior, nin sequera facía referencia no título ás destinatarias, faltaban uns obxectivos claros e concretos, referencias temporais en canto a prazos de execución, posta en marcha, etc... deficiencias que a maioría parlamentaria da que gozaban vostedes entón, non permitiron completar.
Con respecto ao Plan de Emprego Feminino 2004-2006 ao que fixo referencia a deputada do Partido Popular, Varela asegurou que non existe en Galicia tal Plan de Emprego Feminino 2004-2006. O conselleiro mostrou aos deputados un documento titulado A muller e o emprego, que conta cun subtítulo no que se pode ler Plan de Emprego feminino. Segundo o conselleiro este documento parece máis un resumo de programas da Consellería que incluía todo o vixente, xa que tamén se incluía o Plan Labora. Varela advertiu de que, o devandito documento, que non Plan, nunca foi presentado publicamente, nin tan sequera falado nin presentado aos axentes económicos e sociais, nin enunciado ou presentado no Comité Autonómico de Emprego, é máis nin contaba con dotación orzamentaria e nin sequera foi elaborado polos responsables políticos da Consellería senón por unha consultora privada, polo tanto o que nunca existiu non merece nin pode ser valorado polo Goberno.
O sistema educativo galego contará con 536 centros plurilingües o próximo curso 2026/27 nas etapas de Infantil, Primaria, ESO ou Bacharelato e FP. Seis centros decidiron incorporarse a esta iniciativa e outros dous ampliar a súa participación na mesma a outras etapas, o que confirma o incremento progresivo deste modelo, voluntario para os centros, desde a súa posta en marcha. Do total dos centros con modelo plurilingüe, 445 serano en Primaria e 93 en ESO (se ben parte deles sono en ambas etapas á vez), 259 en Infantil, 16 centros en Bacharelato e 40 en FP. Ademais dos centros plurilingües, a Consellería oferta diversas modalidades. Así, outros centros optan por contar con seccións bilingües.
O Proxecto Xenoma Galicia, que procura detectar variantes de risco para enfermidades hereditarias graves como o cancro de mama e ovario, a síndrome de Lynch ou a hipercolesterolemia familiar, xa permitiu detectar 42 persoas positivas entre as 2.504 mostras que se levan analizado. Este programa pioneiro de cribado xenético acada 2.504 mostras analizadas ata o de agora dos 4.261 participantes reclutados ata o momento, rexistrando unha taxa de positividade do 1,7 %.
