jueves, 20 de agosto de 2026
O conselleiro de Innovación e Industria, Fernando X. Blanco, xunto co director xeral de Turismo, Rubén Lois, mantivo reunións de traballo cos touroperadores internacionais Gebeco Reisen, Ibero Tours, Dertour e TUI, no marco da Feira Internacional de Turismo de Berlín (ITB 2006) que se desenvolve na capital alemá desde hoxe e ata o vindeiro domingo.
Segundo explicou o conselleiro, o que se está a promocionar fundamentalmente nestes contactos cos touroperadores é a oferta cultural de Galiza combinada co termalismo e o obxectivo é que os touroperadores deseñen paquetes turísticos que inclúan visitas ao patrimonio galego xunto con estancias en balnearios. Blanco sinalou que Santiago é un punto de referencia fundamental desde o que se queren establecer itinerarios culturais por todo o país. Para o conselleiro nacionalista o turista alemán é moi importante para Galiza tanto polo seu alto nivel adquisitivo como polo seu dinamismo á hora de viaxar e alto nivel de esixencia, o que a xuízo de Blanco débenos levar a reforzar o concepto de calidade de Galiza como destino.
Por último, o titular de Innovación e Industria confirmou tamén que se manterán contactos coas compañías aéreas, caso de Air Belin, buscando pór todas as facilidades posibles para que se incrementen os enlaces entre Galiza e Alemaña.
Varias informadoras galegas especializadas, así como persoal da área de feiras de Turgalicia, están atendendo os mostradores galegos na ITB. A Internationale Tourismus-Börse reúne uns 10.000 expositores de 180 países de todo o mundo. Na pasada edición déronse cita nesta feira, ademais, un total de 7.285 xornalistas de 85 estados. Celébrase no Centro de Congresos da capital alemá.
Galicia vén de acadar os 43.000 beneficiarios do Bono Coidado no Fogar e consolídase como referente na atención á dependencia en España. Esta medida pioneira, posta en marcha pola Xunta hai dous anos e única no conxunto do país, permite que as persoas dependentes poidan recibir coidados no seu fogar e forma parte do compromiso da Xunta coa atención á dependencia. Neste sentido, o Executivo autonómico destinou este ano 179 millóns de euros para esta prestación. O Bono Coidado no Fogar consiste nunha axuda de 5.000 euros ao ano para os dependentes que son coidados nos seus domicilios por un familiar ou calquera outra persoa da súa contorna.
O sistema educativo galego contará con 536 centros plurilingües o próximo curso 2026/27 nas etapas de Infantil, Primaria, ESO ou Bacharelato e FP. Seis centros decidiron incorporarse a esta iniciativa e outros dous ampliar a súa participación na mesma a outras etapas, o que confirma o incremento progresivo deste modelo, voluntario para os centros, desde a súa posta en marcha. Do total dos centros con modelo plurilingüe, 445 serano en Primaria e 93 en ESO, 259 en Infantil, 16 centros en Bacharelato e 40 en FP. Ademais dos centros plurilingües, a Consellería oferta diversas modalidades.
