sábado, 27 de diciembre de 2025
Emilio Pérez Touriño destacou, logo da reunión do Consello da Xunta, o amplo programa de traballo do Executivo que preside para este ano 2006. O presidente da Xunta sinalou que o Goberno promoverá, ata finais de ano, un total de 36 proxectos lexislativos,19 dos cales serán remitidos ao Parlamento neste semestre para ser tramitados no primeiro período de sesións.
O máximo mandatario galego agrupou en tres grandes áreas os proxectos que serán promovidos. Dunha banda, referiuse ás leis que teñen que ver coa modernización e a transparencia como o Proxecto de Lei de Transparencia; o Proxecto de Lei de Publicidade Institucional; o Proxecto de Lei de Subvencións; o Proxecto de Lei de Policía; o Proxecto de Lei de Fundacións; o de Emerxencias; e o Plan Galego de Estatística.
Un segundo bloque de proxectos lexislativos refírese ao desenvolvemento territorial e, entre eles, inclúese o proxecto de Lei de Portos; o Plan de Seguridade Viaria; o Plan Integral de Transportes de Galicia; o de Infraestruturas; a Lei de Mobilidade de Terras; o proxecto de Lei de Montes; o proxecto de Lei de Protección do Medio Ambiente; o proxecto de Lei de Minería; o de Horarios Comerciais; o de Comercio Interior e o Plan Integral de Residuos de Galicia.
Finalmente, un terceiro bloque inclúe proxectos de lei que teñen que ver coa mellora de servizos e cos dereitos da cidadanía. Entre eles destacan o proxecto de Lei de Sanidade; o proxecto de Lei contra a Violencia de Xénero; o de Servizos Sociais; o do Libro e a Lectura; ou o da Linguaxe de Signos.
Cerca do 90% das empresas galegas con máis de 10 persoas empregadas utiliza aplicacións de software libre e a porcentaxe é de máis do 67% no caso das microempresas. Os datos forman parte do estudo O Software Libre nas Empresas de Galicia elaborado polo Observatorio da Sociedade da Información en Galicia (Osimga), adscrito á Axencia para a Modernización Tecnolóxica de Galicia. Os datos proceden da Enquisa sobre o uso de TIC e comercio electrónico nas empresas, que realiza o INE anualmente, que cede os datos a OSIMGA en virtude do convenio de colaboración. Entre os programas máis utilizados destacan os navegadores de Internet (95,5%), as aplicacións ofimáticas (75,3%) e os sistemas operativos libres (51,5%).
A Consellería de Sanidade publica, na súa páxina web, o informe de actividade das infeccións respiratorias agudas correspondente á semana do 15 ao 21 de decembro, que sinala que a actividade gripal en Galicia continúa con intensidade media e con tendencia decrecente. Segundo os datos recollidos polo servizo de vixilancia epidemiolóxica da Dirección Xeral de Saúde Pública, xa se acadou o pico da onda epidémica da gripe. Respecto da semana anterior, rexístrase un descenso na taxa de consultas por gripe en atención primaria dun 5 %.
