domingo, 8 de noviembre de 2026
O presidente da Xunta de Galicia, Emilio Pérez Touriño, defendeu a necesidade de reformar as deputacións provinciais para modernizar e pór ao día o seu papel na Galicia do século XXI. O máximo mandatario galego considerou que cómpre cambiar a política de subvención e dependencia por un modelo de concertación e cooperación que reforce a autonomía dos concellos e lles proporcione capacidade para atender as demandas dos cidadáns. Para o presidente, é o momento de cambiar o modelo do PP no que os concellos están ao servizo dos entes provinciais para poñer a estes ao servizo dos municipios.
Así o asegurou o xefe do Executivo galego en resposta a unha pregunta do voceiro parlamentario do PP, Alberto Núñez Feijóo, a quen lle lembrou que a Xunta pretende con esta reforma dar cumprimento ao que demanda o propio Estatuto de Autonomía e a Lei de Bases de Réxime Local: o primeiro fixa a potestade de coordinar a acción das deputacións na medida que afecta ao interese xeral mentres a segunda mandata á Xunta para coordinar os plans provinciais das Deputacións. Dous obxectivos que o acordo de bases que sustenta a acción do Goberno recolle no compromiso de que o Executivo galego coordinará a acción dos entes provinciais por medio dunha lei e da elaboración dun plan único de obras e servizos.
Artellamento territorial
Pérez Touriño explicou que o Goberno que preside pretende modernizar e poñer ao día o papel das deputacións, actualizando as súas funcións na Galicia do século XXI e integrándoas nun modelo de artellamento territorial eficaz fronte ao executado polos gobernos do PP, que non ten contribuído ao equilibrio do país. Dezaseis anos de goberno do PP, de asfixia financeira da maioría dos concellos de Galicia, de dependencia clientelar da inmensa maioría dos concellos de Galicia. Non sei se vostede pode sentirse satisfeito da evolución de provincias como Ourense ou como Lugo, co modelo, co funcionamento e coa práctica establecida polas súas deputacións provinciais, censurou o presidente.
Transcorridos 25 anos dende a constitución das primeiras corporacións locais, o xefe do Executivo considera que existen importantes déficits que esixen que o Goberno non fique inmóbil cando determinados resultados son un fracaso. Se estamos diante dun modelo que no seu funcionamento efectivo e concreto ten fracasado estrepitosamente queremos asumir unha política que non será de brazos cruzados, señor Núñez Feijóo, queremos cambiar a política voluntarista de subvención e dependencia por unha política moderna de concertación e de cooperación, que reforce a autonomía dos municipios e que lles dea capacidade a estes para atender a demanda da cidadanía, explicou Pérez Touriño, quen fixo fincapé en que se busca pasar dunhas deputacións nas que os concellos están ao servizo das deputacións, para facer deputacións ao servizo dos concellos deste país.
Saldos negativos
O máximo mandatario galego argumentou ademais a necesidade da reforma en feitos como que cada ano se produce un saldo negativo cando se avalían as transferencias e as subvencións das deputacións aos concellos; en que un terzo do orzamento dalgunhas deputacións se dedica a subvencións ou en que tamén nalgúns entes se producen modificacións de crédito que acadan o 80%. Tamén cuestionou a negativa dos presidentes das deputacións, agás o da Coruña, de acudir ao Parlamento a dar conta e a establecer as relacións mínimas de coordinación coa Cámara. Por iso é necesario revisar e pór ao día as deputacións, expresou.
Tamén lembrou Pérez Touriño que a necesidade da reforma é compartida polos propios concellos e polo presidente da Federación Galega de Municipios e Provincias, coa que en seis meses de Goberno se logrou asinar o Pacto Local. Un pacto firmado co presidente da Fegamp, que defende os municipios, defende o municipalismo e sabe o que necesitan os municipios do país. E acabo de firmar con el o que por primeira vez na historia deste país é un avance para rachar co clientelismo, coa dependencia e coa asfixia financeira do seu modelo fracasado. Por iso hai que falar de reformas e mirar con optimismo e con esperanza ese futuro modernizador, subliñou.
Para Emilio Pérez Touriño, o rexeite do PP á reforma dos entes provinciais débese ao seu inmobilismo e ao dos seus presidentes provinciais. Señor Feijóo, non sei moi ben o que lle dirán o señor Louzán, o señor Cacharro Pardo, o señor Baltar cando falan con vostede pero certamente mo podo imaxinar cando ten que preguntar o que pregunta e ven aquí a defender o imposible, que é o inmobilismo e a continuidade na súa función e no seu papel dunhas deputacións que sabe vostede perfectamente que deben ser modernizadas, que deben ser reformadas para servir a este país. E ese é o compromiso deste goberno, que presido e que teño a vontade firme, clara e decidida para levar adiante ese proceso modernizador, apuntou o presidente, quen manifestou o seu desexo de contar coas deputacións e co PP nesa reforma.
Reforma estatutaria
Por último, Emilio Pérez Touriño instou ao voceiro popular a abandonar a actitude reacia ás reformas, tanto das deputacións como do Estatuto de Autonomía. Así, cominouno a deixar de estar á defensiva, poñendo obstáculos, cada día unha pedra no camiño da reforma. Pídolle determinación, autonomía plena para exercer o compromiso co país de pór en marcha dunha vez a reforma do estatuto de autonomía, concluíu.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
