sábado, 27 de diciembre de 2025
Está previsto que a Lei de Policía Autonómica de Galicia entre no Parlamento nesta primavera e estea aprobada antes de final de ano. Así o afirmou o conselleiro de Presidencia, Administracións Públicas e Xustiza, José Luis Méndez Romeu, durante a inauguración da Xornada sobre Seguridade e Policía Autonómica que tivo lugar no Centro de Estudos Xudiciais e Seguridade Pública de Galicia da Estrada (CEXESGA).
O titular de Presidencia recoñeceu que é necesario cubrir servizos especializados en eidos coma a sinistralidade vial, onde cómpre unha maior presencia de axentes nas estradas, a vixilancia nas costas e o medio ambiente, que precisan dunha forza máis dedicada a estes obxectivos que ten que depender do Goberno autonómico. Nese sentido, considerou que, tendo en conta os obxectivos que ten actualmente ten a unidade de policía adscrita, se precisarían entre 2.000 e 2.500 policías, dependendo do Goberno de Galicia, para tarefas especializadas.
Modelo de colaboración
Cremos que isto significa un modelo distinto, coma o que se ten iniciado en Cataluña e no País Vasco, que é plenamente de colaboración coas forzas de seguridade do Estado e que ten que permitirnos manter e mellorar eses niveis de seguridade, declarou Méndez Romeu, quen explicou que a creación dunha policía se trata dun servizo moi custoso en termos económicos e dunha actividade difícil de lograr con termos de eficacia profesional.
O conselleiro destacou que o CEXESGA, que vai ser o centro de formación da policía, será ampliado para acoller a formación das novas promocións. Gustaríanos que esta policía do futuro tivera a posibilidade de integrar a todos os membros da actual unidade adscrita e tamén a un número importante de gardas civís e de policías nacionais que queiran pasar ao novo corpo, afirmou.
Así mesmo, lembrou que en Galicia hai niveis de seguridade mellores que a media do Estado, e que os cidadáns teñen una percepción favorable dos corpos de seguridade. O feito de que a meirande parte dos gardas civís e policías nacionais destinados en Galicia sexan da propia comunidade favorece ese arraigo e esa convivencia doada, e polo tanto mellora as taxas de seguridade pública, asegurou.
Xornada sobre Seguridade e Policía Autonómica
O conselleiro fixo estas declaracións no decurso da Xornada sobre Seguridade e Policía Autonómica, que continuará esta tarde coa presenza do director xeral de Seguridade e Emerxencias do Goberno de Canarias, José Andrés García de las Casas, quen falará sobre A política de interior na Comunidade Autónoma das Illas Canarias. O desenvolvemento dun novo modelo policial e de seguridade nos seus inicios. Antes do remate da xornada, ás seis, falarase sobre O desenvolvemento dun novo modelo policial e de seguridade na súa fase de consolidación. A experiencia de Cataluña presentado por Jesús A. Solares, director de Servizos Territoriais de Interior de Barcelona do Departamento de Interior da Generalitat de Cataluña. O acto de clausura está previsto para as sete e media e contará coa participación da directora xeral de Interior da Xunta de Galicia, María Isabel Durántez Gil.
Cerca do 90% das empresas galegas con máis de 10 persoas empregadas utiliza aplicacións de software libre e a porcentaxe é de máis do 67% no caso das microempresas. Os datos forman parte do estudo O Software Libre nas Empresas de Galicia elaborado polo Observatorio da Sociedade da Información en Galicia (Osimga), adscrito á Axencia para a Modernización Tecnolóxica de Galicia. Os datos proceden da Enquisa sobre o uso de TIC e comercio electrónico nas empresas, que realiza o INE anualmente, que cede os datos a OSIMGA en virtude do convenio de colaboración. Entre os programas máis utilizados destacan os navegadores de Internet (95,5%), as aplicacións ofimáticas (75,3%) e os sistemas operativos libres (51,5%).
A Consellería de Sanidade publica, na súa páxina web, o informe de actividade das infeccións respiratorias agudas correspondente á semana do 15 ao 21 de decembro, que sinala que a actividade gripal en Galicia continúa con intensidade media e con tendencia decrecente. Segundo os datos recollidos polo servizo de vixilancia epidemiolóxica da Dirección Xeral de Saúde Pública, xa se acadou o pico da onda epidémica da gripe. Respecto da semana anterior, rexístrase un descenso na taxa de consultas por gripe en atención primaria dun 5 %.
