viernes, 18 de septiembre de 2026
Durante os cinco días que dura o encontro, persoal investigador procedente de distintas universidades e centros de investigación aprenderá a empregar DynaFit, un software especializado que permite interpretar experimentos complexos e comprender mellor como funcionan os procesos químicos e biolóxicos a nivel molecular. Este tipo de ferramentas resultan fundamentais en áreas como o desenvolvemento de novos medicamentos, o estudo de enfermidades ou o deseño de sistemas químicos e biotecnolóxicos avanzados.
O programa combinará sesións teóricas, obradoiros prácticos baseados en datos reais e presentacións científicas das persoas participantes, fomentando unha contorna de formación avanzada e intercambio científico. Un dos principais atractivos será a participación do Dr. Petr Kuzmič, creador de Dynafit e referente internacional no desenvolvemento de ferramentas matemáticas para o estudo de procesos bioquímicos. A súa presenza sitúa este evento nunha cita destacada para a comunidade científica interesada en metodoloxías avanzadas de análise de datos experimentais.
O evento conta ademais co apoio da Rede CIGUS, a rede de Centros de Investigación do Sistema Universitario de Galicia impulsada pola Xunta de Galicia, a Universidade da Coruña e a Real Sociedade Española de Química, a través da Sección Territorial de Galicia e o Grupo Especializado de Química Biolóxica.
Máis información sobre o evento e o programa completo en: https://www.dynafitworkshop2026cica.eu
Perfil do Dr. Petr Kuzmič
Petr Kuzmič naceu en Checoslovaquia, actual República Checa. Estudou Química Orgánica e Medicinal no Instituto de Tecnoloxía Química de Praga e doutorouse en Química Bioorgánica na Academia Checa de Ciencias en 1985.
En 1987 trasladouse aos Estados Unidos como investigador invitado pola Academia Nacional de Ciencias. En 1991 fundou BioKin Ltd., unha empresa especializada en consultoría científica e desenvolvemento de software.
Traballou na Universidade de Wisconsin-Madison como investigador e profesor, onde desenvolveu ferramentas matemáticas e informáticas para estudar a inhibición de encimas, especialmente a proteasa do VIH.
Desde 1999 adícase á consultoría para empresas farmacéuticas e biotecnolóxicas, á docencia, á producción científica e ao desenvolvemento do software DynaFit.
Sobre o CICA
O Centro Interdisciplinar de Química e Bioloxía (CICA) creouse en 2015 como un centro de investigación de ciencias avanzadas e que, actualmente, conta con máis de 200 investigadores e investigadoras pertencentes a tres áreas científicas: Biomedicina; Alimentación, Contaminación e Saúde; e Nanociencia e Materiais Avanzados.
Desde 2024, o CICA conta co apoio financeiro da Unión Europea a través do Pograma Galicia FEDER 20212027 e forma parte da rede CIGUS da Xunta de Galicia, que acredita a calidade e impacto da súa investigación no sistema universitario galego.
A excelencia investigadora, a transferencia tecnolóxica e a transmisión de coñecemento á sociedade forman os tres piares sobre os que se fundamenta o centro de investigación. É recoñecido pola atracción de talento, a visibilidade da muller científica e a promoción da igualdade de xénero, contando cunha presenza feminina superior ao 50%.
Medio milleiro de investigadoras e investigadores e máis de 150 actividades científicas nas sete cidades galegas: Vigo, Ourense, Pontevedra, Santiago, A Coruña, Ferrol e Lugo. Así se celebrará en Galicia a sexta edición da Noite Galega das Persoas Investigadoras, G-Night 2026, unha actividade na que a comunidade científica galega une talento e esforzos co obxectivo de achegar a ciencia á cidadanía e espertar vocacións científicas, ao tempo que se ofrecen propostas de lecer científico, cultural e educativo para toda a familia.
A Xunta de Galicia reclama ao Goberno central medidas estruturais de apoio ao sector agrogandeiro. Do mesmo xeito, esíxese que se teña en conta a realidade de cada territorio á hora de levar a cabo estas actuacións, que deben executarse de xeito urxente. Así o trasladou a conselleira do Medio Rural, María José Gómez, na Conferencia Sectorial celebrada en Madrid, na que se dirixiu ao ministro de Agricultura, Pesca e Alimentación, Luis Planas, para facer estas reclamacións. Alí, reafirmou tamén o compromiso do Executivo galego con este sector.
