Notas de prensa

Un proxecto de historia alternativa convida a crear microrrelatos que conecten Galicia cunha guerra civil en Portugal

Liderado pola Universidade do Porto, este proxecto conta coa participación da profesora da Facultade de Dirección e Xestión Pública Rosa Ricoy e centra a construción desta “novela en mosaico” nun acontecemento que tivo lugar en Portugal en 1919, a proclamación dun goberno monárquico no norte do país, que derivou nun enfrontamento coa República instaurada nove anos antes. A proposta de historia alternativa formulada é imaxinar que tería sucedido se aquel conflito, que durou tres semanas, se tivese estendido ao longo de tres anos e involucrase a outros países. Nomeadamente, este proposta vén de incorporar unha sección, HYP-Rexión de Galicia, co propósito de reunir historias alternativas que puidesen ter acontecido en Galicia “relacionadas coa monarquía do norte ou desencadeadas por ela”, sinalan as súas promotoras.

Aberta á participación de toda a cidadanía, esta iniciativa busca sumar novas historias que aborden como esa guerra civil entre os monárquicos do norte e os republicanos do sur puidera ter influído na política internacional. Con esa idea, propón preguntas como se Galicia teríase sentido “fortalecida polo movemento independentista monárquico no norte de Portugal” ou se este conflito tería contribuído a “espertar as raíces celtas” no país, apunta Ricoy, autora das primeiras entradas desta nova sección.

Múltiples propostas

Aberto a textos orixinais de entre dez e 1000 palabras, poden presentarse “desde nanorrelatos ata microrrelatos”, que abranguen desde o formato dunha crónica ou noticia, ata obituarios ou textos de “pura ficción”, conectados coa cronoloxía de historia alternativa arredor da que se estrutura este proxecto. Trátase do Universo Winepunk, desenvolvido polo colectivo artístico portugués Invicta Imaginaria, que propón “dúas diverxencias” sobre os feitos históricos acontecidos en Portugal en 1919. Por unha banda, que o conflito se tivese convertido nunha guerra civil de tres anos entre o goberno monárquico, con sede no Porto, e o republicano de Lisboa, e, por outra, que o goberno do norte tivese “desenvolvido un biocombustible a base de viño do Porto”, establecendo a súa vez “unha rede de conexións” con outros países.

De feito, un dos propósitos deste proxecto é que as persoas participantes poidan idear historias que conecten este universo coa historia de diferentes países europeos. Do mesmo xeito, ademais das propostas de escritura creativa baseadas neste universo, a iniciativa está tamén aberta a achegas procedentes de arquivos familiares ou comunitarios. Os textos enviados estarán sometidos a unha análise curatorial e traduciranse cando menos a outra das linguas do proxecto HYP; portugués, galego, castelán, inglés e francés.

O proxecto HYP

Coordinado pola investigadora da Universidade do Porto Ana da Silveira Moura, no proxecto HYP participa tamén, ademais da UVigo, a École Pratique des Hautes Études de París e conta coa colaboración do Museo de Historia Natural e Ciencia do Porto. O seu obxectivo é xerar sinerxías entre a escritura creativa e a historia alternativa que permitan á súa vez fomentar o interese pola memoria e a cultura europeas e pór en valor as achegas da Unión Europea en múltiples eidos, a través de iniciativas como esta “enciclopedia colaborativa trasnacional e multilingüe”·ou a investigación sobre creatividade verde que coordina Ricoy.