Notas de prensa

Danza, teatro e creación audiovisual protagonizan a Primavera Cultural do Campus de Lugo

A edición número 24 do Encontro de Danza da USC serve de marco, este venres 17 de abril, no Auditorio Fuxan os Ventos, ás 20.30 horas, para a presentación de producións de danza das compañías das universidades de Vigo, A Coruña e da propia da USC, baixo a dirección de Juan Carlos Zahera. A Aula de Danza do Campus de Ourense da Universidade de Vigo, coa obra titulada 'Xeometría dun silencio aprendido', dirixida por Nuria Sotelo e coreografiada por Ainhoa Linaza e Creación Colectiva, é a encargada de abrir o programa.

A Aula de Danza da Universidade de Coruña intervén a continuación coa obra 'Deriva', coreografiada por Alicia López e Alba Fernández. 'Esquecid@s' é o titulo da obra da Compañía de Danza da USC, dirixida por Juan Carlos Zahera e coreografiada por Rosa Acuña que completa o programa do Encontro. Reúnense de novo as tres Compañías de Danza da USC (campus de Compostela, campus de Lugo e Sen Vergoña) nunha soa produción.

XXXII Festival de Teatro Universitario

Entre os días 19 e 23 de abril, regresa o Festival de Teatro Universidade a Lugo, na que será a súa trixésimo segunda edición. O domingo 19 estréase a peza ‘Do marabilloso mundo dos animais: os cordeiros’, da compañía de teatro da USC-Lugo, con primeira función ás 18.00 horas e segunda función ás 20.30 horas, no Pazo de San Marcos de Lugo. Para estas representacións as entradas xa están esgotadas.

O 20 de abril será a quenda da compañía de teatro da UDC-A Coruña, coa peza ‘Encrobas 77: A precuela’, ás 20.30 horas, no Auditorio Gustavo Freire. ‘Insurección’ é a peza que representará a Aula de teatro do campus de Ourense da UVigo-Grupo Maricastaña o 21 de abril ás 20.30 horas, tamén no Auditorio Gustavo Freire; mentres que ‘Irmás’ é a peza que representará a compañía de teatro da USC-Santiago o 22 de abril ás 20.30 horas no mesmo escenario. Finalmente, o 23 de abril a compañía Vaites Vaites IV ciclo USC-Lugo representará ‘Lectura dramatizada das asemblearias’, ás 20.30 horas na Casa do Saber. Para asistir ás funcións dos días 20, 21 e 22 de abril hai que solicitar entrada en https://entradaslugo.es/

Últimos días para o Findecurta

O certame de curtametraxes Findecurta mantén aberto o seu prazo de inscrición ata o 21 de abril. O día 24 realizarase a tradicional sesión informativa na Casa do Saber na que se lles explicará ás persoas participantes o reto desta edición do certame. O devandito reto consiste en certas condicións que a curtametraxe deberán ter ou que deberá aparecer nela. Todos os anos ese reto cambia e cada grupo participante deberá estar representado na xuntanza por unha persoa debidamente acreditada.

Os premios que se poden acadar son un primeiro de 450 euros, que supón ademais a participación da curtametraxe na Semana de Cine de Lugo onde se competirá polo Premio do Público á Mellor Curtametraxe Galega, e un segundo premio (Premio do Público), que tamén supón a participación da curtametraxe na Semana de Cine de Lugo.

Estas iniciativa enmárcase dentro da programación da Primavera Cultural da USC que se artella ao abeiro do convenio que desenvolven a USC, Cultura e Turismo do Concello de Lugo e a Vicepresidencia da Deputación Provincial de Lugo.