Notas de prensa

Normal acolle o ciclo de cinema feminista 'E ti que miras?'

Normal, o Espazo de Intervención Cultural da Universidade da Coruña, acollerá entre os días 15 e 29 de abril o ciclo de cinema feminista “E ti que miras?”, unha proposta coordinada por Bea Saiáns que reúne unha selección de filmes realizados por mulleres e de especial relevancia no panorama audiovisual nacional e internacional. A programación foi deseñada baixo o criterio de visibilizar obras que abordan temáticas inherentes ao patriarcado, ao tempo que se pon en valor o papel das creadoras no ámbito cinematográfico.

O ciclo dará comezo o 15 de abril coa proxección de “Función de noche”, de Josefina Molina, considerada a primeira muller graduada nunha escola de cinema en España. A continuación, o día 16, exhibirase “Retrato de una mujer en llamas”, da directora Céline Sciamma, filme premiado internacionalmente e último traballo da actriz protagonista, Adèle Haenel, quen anunciou a súa retirada da industria como forma de denuncia do sexismo.

A reflexión sobre a construción social da locura nas mulleres estará presente na sesión do martes 21, que inclúe “O corpo de Cristo”, de Bea Lema e “Els buits”, de Marina Freixa, Isa Luengo e Sofía Estevez, centrado no Patronato de Protección á Muller en España. As catro directoras participarán nun coloquio posterior ás proxeccións; Bea Lema estará presente logo da súa sesión e no caso das outras tres directoras o encontro será en formato online.

A seguinte xornada, o xoves 23, contará coa ópera prima da directora portuguesa Paula Tomás Marques “Dúas vezes João Liberada”, un filme baseado en xuízos inquisitoriais que afonda na representación, a persecución de xénero e as disidencias ao longo da historia.

O ciclo concluirá o mércores 29 de abril cunha sesión especial na que, acompañada das artistas musicais galegas High Paw e Russ, Bea Saiáns presentará unha mostra dos seus últimos traballos audiovisuais, entre os que se atopan as series “Réxime” e “Delirio Sketchs”, así como a curtametraxe “Plumass”. A sesión inclúe un coloquio co equipo participante nos proxectos.

“E ti que miras?” busca promover a reflexión crítica a través do cinema, fomentando o diálogo arredor da creación audiovisual con perspectiva de xénero, e conta co apoio da Área de Cultura da Deputación da Coruña.

Universidade da Coruña (UDC), 2026-04-14

Actualidad

Foto del resto de noticias (autopista-ap9.jpg) A conselleira de Vivenda e Planificación de Infraestruturas, María M. Allegue, instou ao Goberno central a paralizar a suba dos prezos da AP-9 para 2027 e que os conxele como a Xunta fará coas autoestradas de titularidade autonómica. Allegue respondeu a unha interpelación sobre a situación da autoestrada no Parlamento autonómico, e apuntou que a suba prevista para AP-9 e AP-53 é dun 5% e un 4% respectivamente, o que as converte nas máis caras de España. Incidiu en que nesta lexislatura houbo un incremento dun 20% nos prezos mentres que nas da Xunta non houbo ningún aumento.
Foto de la tercera plana (agro-tractor.jpg) A conselleira do Medio Rural, María José Gómez, reclamou en Bruxelas 'financiamento suficiente, estabilidade e seguridade' para a nova PAC. Foi durante a súa intervención no evento da Coalición Agriregions, no Comité Europeo das Rexións, no que estivo acompañada polo director xeral da PAC e do Control da Cadea Alimentaria, Juan José Cerviño. Na organización da xornada tomou parte a Fundación Galicia Europa, que prestou apoio técnico á delegación galega na capital comunitaria para participar nesta reunión conxunta con membros do Parlamento Europeo e do devandito Comité das Rexións.

Notas

O Instituto Galego de Física de Altas Enerxías (IGFAE), centro mixto da USC e a Xunta de Galicia, organzia do 23 ao 27 de novembro a novena edición da Semana da Ciencia, a cita anual coa que pretende achegar o seu labor investigador á sociedade. Nesta ocasión, o programa centrarase nos retos e oportunidades de futuro que se abren nas áreas de investigación nas que traballa o persoal do IGFAE.
Ata o 12 de xaneiro de 2027 a Sala Alterarte, o espazo expositivo do campus de Ourense, acolle a mostra Glaciares a derreterse, da artista italiana Cinzia N. Rojas e comisariada por Vítor Nieves e Xosé Lois Vázquez. Na exposición, o público visitante pode ver unha proxección sobre o desexo glaciar. A mostra foi inaugurada contando coa participación da artista.
PUBLICIDAD
ACTUALIDAD GALICIADIGITAL
Blog de GaliciaDigital
HOMENAXES EGERIA
PUBLICACIONES