Notas de prensa

O CITEEC reúne á súa comunidade investigadora nunha xornada divulgativa dedicada aos Proxectos de Xeración de Coñecemento

Este evento reuniu na Sala de Visualización do centro a persoal investigador vinculado aos diferentes laboratorios do CITEEC, e deu comezo coa intervención do Grupo de Mecánica de Estruturas (GME).

Jacobo Díaz García presentou o proxecto no que traballa con Aitor Baldomir García sobre a optimización do deseño global das aeroestruturas, como os tanques de almacenamento de combustible ou as estruturas de fuselaxe multi-burbulla, para incrementar a súa eficiencia e seguridade. Dentro do mesmo grupo de investigación, Félix Nieto Mouronte interveu cun proxecto baseado no estudo de técnicas de baixo custo para mellorar o comportamento aeroelástico de pontes de gran van fronte á acción do vento.

O Grupo de Enxeñaría da Auga e do Medio Ambiente (GEAMA) tamén participou con dous proxectos de investigación. Jerónimo Puertas Agudo compartiu a proposta que lidera xunto a Luis Cea Gómez sobre a mellora das previsións de inundación proporcionadas actualmente polos modelos meteorolóxicos mediante a utilización de técnicas de IA, con resultados moi prometedores con data de 3 anos.

No ámbito portuario, José Sande González-Cela presentou un proxecto enfocado na monitorización e a utilización de técnicas avanzadas e Machine Learning para mellorar a seguridade e eficiencia dos portos, no que tamén traballan Enrique Peña González e Juan R. Rabuñal Dopico.

Dende o Grupo de Construción (gCONS), Sindy Seara Paz e Belén González Fonteboa achegaron os seus avances sobre a incorporación da nanocelulosa procedente de biomasa ao formigón, co obxectivo de promover un desenvolvemento máis sostible e eficiente no sector da construción, aumentando a durabilidade do material a longo prazo mediante o selado de fisuras, proxecto no que tamén participa Blas Cantero Chaparro.

Finalmente, no que respecta ao Grupo de Métodos Numéricos en Enxeñaría (GMNI), durante a xornada José París e Fermín Navarrina presentaron o proxecto no que están a traballar, o cal xira arredor da optimización topolóxica de estruturas mediante métodos matemáticos, é dicir, o modelo de cálculo permite deducir, a partir da forma e das dimensións, o deseño máis adecuado para cada estrutura.

Por outra banda, a investigación dirixida por Guillermo Lorenzo González sobre oncoloxía computacional está orientada á descrición e predición do crecemento de tumores do cancro de próstata e a súa resposta a diversos tratamentos. O proxecto enfócase en deseñar e implementar métodos computacionais para optimizar a atención clínica da enfermidade mediante predicións personalizadas.

A xornada puxo de manifesto o alto nivel científico dos equipos de investigación que integran o CITEEC, ademais do seu compromiso co avance do coñecemento en múltiples disciplinas. A presentación dos proxectos concedidos no Plan Nacional permitiu visibilizar os avances acadados dende a concesión da financiación, ademais de intercambiar ideas entre o persoal investigador e promover a colaboración entre as diferentes áreas estratéxicas do centro.