viernes, 7 de agosto de 2026
Estes eventos, de forma bianual, teñen por obxectivo estandarizar este tipo de reunións entre o persoal especialista na área coa finalidade de converterse nun punto de encontro onde o persoal investigador de diferentes especialidades das ciencias non lineais (como son o ámbito numérico e multifísico, a mecánica de fluídos, os avances na área de medicina e bioloxía ou as técnicas computacionais, entre outras) poidan compartir os seus traballos e resultados.
A inauguración que terá lugar o luns 16, ás 09.30 horas, estará presidida pola vicerreitora de Política Científica da USC, Pilar Bermejo Barrera; e contará coas intervencións do decano da Facultade de Matemáticas e coordinador do foro, Alberto Cabada Fernández; da directora científica do CITMAga, Rosa M. Crujeiras; e da coordinadora do comité científico, Peregrina Quintela Estévez. Nesta ocasión, formarán parte desta cita en calidade de conferenciantes plenarios Alfredo Bermúdez de Castro da USC, Elena Gaburro da Università degli Studi di Verona, Jean Mawhin da Université Catholique de Louvain e Mercè Ollé Torner da Universitat Politècnica de Catalunya.
A investigación nas ciencias non lineais en Galicia ten un importante recoñecemento tras unha continuada achega de destacados resultados de enorme calidade e unha presenza sólida e estable nas súas contribucións académicas ao longo dos anos, explican dende o comité organizador. Neste sentido, o Centro de Investigación e Tecnoloxía Matemática de Galicia (CITMAga) asume nas liñas de actuación da súa axenda científica a investigación e capacitación do seu persoal investigador neste ámbito de estudo.
FisEs'25
Xusto a continuación, dende o día 18, bota a andar, tamén na Facultade de Matemáticas, a Reunión de Física Estatística. Este foro desenvólvese en intervalos de ano e medio dende 1987, data na que tivo lugar a primeira edición en Barcelona. Desde o ano 1996 esta reunión é coñecida tamén como FisEs. Coa FisEs'25, organizada polo grupo de Física Non Lineal da USC e a Real Sociedad Española de Física a través da División de Física Estadística, No Lineal y Sistemas Dinámicos (DIFENSC), cumpriranse 38 anos de reunións. O foro inaugurarse o mércores, ás 14.30 horas, na Aula Magna da Facultade de Matemáticas da USC, nun acto presidido pola vicerreitora de Política Científica, Pilar Bermejo. O principal obxectivo da xuntanza, que se estenderá ata o 20 de xuño, é promover a Física Estatística e Non Lineal en España e o intercambio científico e académico entre os grupos que investigan nestas disciplinas.
O encontro está apoiado polo Centro de Investigación Interdisciplinar en Tecnoloxías Ambientais (CRETUS), o Instituto de Materiais (iMATUS) e o Centro de Investigación e Tecnoloxía Matemática de Galicia (CITMAga). No acto inaugural participarán tamén o decano da Facultade de Matemáticas, Alberto Cabada Fernández; a presidenta da División de Física Estadística, No Lineal y Sistemas Dinámicos (DIFENSC) da Real Sociedad Española de Física, Rosa Benito; e o coordinador do Comité Organizador, Alberto Pérez Muñuzuri, profesor da Facultade de Física da USC.
Xusto a continuación da sesión de apertura, ás 14.45 horas, terá lugar o relatorio do científico español e profesor da Universidade de Harvard, Juan Pérez Mercader, cuxo equipo de investigación traballa na creación de vida artificial a través de vesículas poliméricas que nacen, medran e se replican de maneira autónoma. A diferenza das células vivas, estas vesículas non están feitas de lípidos ou proteínas, senón de polímeros sintetizados a partir de compostos químicos simples e luz verde.
Ademais do profesor Mercader, tamén figuran entre as conferencias convidadas os relatorios de Jose A. Cuesta da Universidad Carlos III de Madrid, Cristina Masoller da Universitat Politècnica de Catalunya, Miguel Rubí da Universitat de Barcelona, Saúl Ares do Centro Nacional de Biotecnología do CSIC, Alberto Fernández Nieves da Universitat de Barcelona, Clara Granell da Universitat Rovira i Virgili, Inma Leyva da Universidad Rey Juan Carlos, Samuel Martin do Complexity Science Hub Vienna e da Universidad Politécnica de Madrid (UPM), Marisol Ripoll da Forschungszentrum Jülich de Alemaña.
Comité organizador
O comité organizador, composto por persoal da USC en ambos os foros, está integrado por Saray Busto Ulloa, Alberto Cabada Fernández, Rosa María Crujeiras Casais, María Teresa Flores Arias, Jorge Mira Pérez, Begoña Nicolás Ávila, Alberto Pérez Muñuzuri, Vicente Pérez Muñuzuri e María Elena Vázquez Cendón.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
