Notas de prensa

O teatro universitario retorna a Pontevedra coa XV Miteu

Promovida pola Vicerreitoría do campus, coa colaboración do Concello, a mostra abrirase cun espectáculo da compañía colombiana Sin mente Teatro e continuará o venres 26 coa aula teatral da Universidade de Santiago de Compostela (USC). Xa á semana seguinte poderán verse tres montaxes saídas das aulas da UVigo, Desequilibrios, do grupo Maricastaña, de Ourense; Soño dunha noite de verán, da aula do campus vigués, e Estupidez Artificial, resultado do obradoiro de teatro do campus pontevedrés.

A programación da Miteu foi presentada este xoves pola vicerreitora do campus, Eva María Lantarón, e o director de área adxunto á Vicerreitoría, Luis Torres, acompañados polo coordinador da mostra e responsable da aula do campus, Salvador del Río, de Ningures Producións. Alén de incidir no positivo de “pór en valor diante da sociedade” o traballo realizado nunhas aulas abertas ao conxunto da cidadanía, Lantarón destacou a importancia da Miteu e da programación cultural para o proxecto de especialización Campus Crea, así como o carácter internacional desta mostra. Torres, pola súa banda, lembrou que esta, ao igual que as Miteu de Vigo e Ourense supoñen “a culminación do traballo que se vén realizando nos obradoiros de teatro”.
De Bogotá a Vigo

De inaugurar a programación encargarase a convidada internacional desta edición, Sin mente Teatro, unha compañía impulsada en 2015 por estudantes da Universidad Distrital Francisco José de Caldas, de Bogotá. Tras o seu paso pola Miteu de Vigo, o mércores 24 presentarán en Pontevedra Tomás, cuando el silencio es complicidad, unha obra dirixida por Germán Frasio Montenegro, que combina a linguaxe corporal, visual e musical co manexo de monicreques. Dous días máis tarde, poderá verse Antropoloxía do bico (O síndrome do túnel carpiano), unha montaxe realizada pola aula da USC, “unha das compañías máis antigas do teatro universitario”, como lembrou Salvador Del Río. Baixo a dirección de Roberto Salgueiro, esta agrupación presentará unha montaxe conformada a partir de textos de Laura Valeiras, Paulo Mouriño, Maurice Blanchot, Leila Guerreiro e o propio Salgueiro.

O luns 29 poderá verse Desequilibrios, montaxe pola que o grupo Maricastaña do campus de Ourense era premiado recentemente no Ciclo de Teatro Universitario da Beira Interior. Con dramaturxia e dirección de Fernando Dacosta, trátase dunha obra ambientada nun manicomio e inspirada no libro Alguén voou sobre o niño do cuco, de Ken Kesey. Esa mesma semana, o xoves 2, poderá verse no Teatro Principal a adaptación que a Aula de Teatro do Campus de Vigo realizou de Soño dunha noite de verán, “unha das obras máis máxicas de Shakespeare”. Baixo a dirección de Sonia Alfaro e Casilda Rúa, será levada ao escenario por “un elenco moi coral”, formado por máis dunha ducia de actores e actrices.
A aula do campus pecha a programación

Esta XV Miteu clausurarase o venres 3 de maio con Estupidez Artificial, o espectáculo desenvolvido ao longo do curso polos participantes no obradoiro de teatro do campus de Pontevedra, estreado este mércores na Miteu de Vigo. Dirixido por Omar Ferrín e Salvador del Río, trátase dun espectáculo conformado a partir de tres textos breves, realizados por Manuel Cortés, Ana Abad de Larriva e Déborah Vukusic, no Torneo de Dramaturxia da Mostra Internacional de Teatro de Cangas. “Todos teñen como nexo de unión a intelixencia artificial”, salientou Del Río dunha montaxe na que esta “ferramenta chamada a revolucionar a maneira na que os seres humanos teñen ou terán que relacionarse” vincúlase coa busca de compañía para “escapar da soidade”, coa procura de inspiración por parte dun “artista frustrado” ou cunha “indagación arredor da fórmula que permita dominar o mundo”, como recolle o seu texto de presentación.