sábado, 27 de junio de 2026
O Centro Dramático Galego (CDG) convida o estudantado da USC a acudir á preestrea do espectáculo 'Manuela Rey is in da house' que terá lugar este mércores 13, a partir das 20.30 horas, no Teatro Principal de Santiago de Compostela. Para asistir a este pase dirixido á comunidade estudantil da USC, é preciso enviar nome e datos de contacto de cada asistente ao Consello do Estudantado a través do enderezo consello.estudantado@usc.gal antes das 14.00 horas do día 13.
Esta iniciativa enmárcase dentro da nova vaga de Faiscas Culturais centradas na recuperación da figura da actriz galega Manuela Rey. A mindoniense converteuse na grande estrela lisboeta de mediados do século XIX. Naceu en 1842 e finou aos 23 anos como primeira actriz do Teatro Dona María II da capital portuguesa. As Faíscas, unha iniciativa da Vicerreitoría de Estudantes e Cultura que ten como obxectivo prender a reflexión cultural nas aulas da USC e complementar a formación do estudantado a través de intervencións e actividades de carácter cultural, alumean agora a traxectoria vital e profesional aínda moi descoñecida de Manuela Rey, tal e como apuntan dende a organización.
O CDG en coprodución co Teatro do Noroeste_CDV (Viana do Castelo), co Teatro Nacional Sao Joao de Porto e co Teatro Nacional D. María II de Lisboa únense para poñer en valor e reivindicar a figura da alcumada como muller lirio. Con dramaturxia e dirección de Fran Núñez, director do CDG, un equipo artístico galego-portugués leva a escena o espectáculo 'Manuela Rey is in da house', estreado recentemente en Portugal e que en Galicia representarase o próximo 14 de marzo, no Teatro Principal de Santiago de Compostela, coa excepción da sesión que o día 13 se desenvolverá para a comunidade universitaria.
O presidente da Xunta, Alfonso Rueda, destacou que, entre os obxectivos principais da nova Estratexia da Biotecnoloxía en Galicia, está a incrementar nun 20% os empregos no sector para chegar aos 7.000 en 2030 así como ampliar un 15% o número de investigadores neste eido e acadar os 1.600. Durante a presentación da Estratexia da Biotecnoloxía de Galicia 2026-2030, na que estivo acompañado de Román Rodríguez e María Jesús Lorenzana, o presidente definiu o documento como 'unha visión compartida de país', as 'vimbias para facer este gran cesto do que vai ser o horizonte biotecnolóxico de Galicia os próximos cinco anos'.
Galicia formalizou en Bruxelas o traspaso de funcións para asumir, durante o vindeiro semestre, a representación de todas as Comunidades Autónomas de España no Consello de Ministros de Agricultura e Pesca da Unión Europea (Agrifish). Esta función estratéxica, coordinada a través da Consellería do Mar, confírelle á comunidade a responsabilidade de liderar e defender unha postura común forte ante a Unión Europea. O propósito é garantir que o peso socioeconómico e a realidade do sector mariñeiro galego e estatal conten con argumentos científicos sólidos nas futuras negociacións.
