viernes, 16 de mayo de 2025
Na inauguración da cita, Francisco Javier Rodríguez Rajo, vicerreitor do campus de Ourense, subliñou que para a institución académica é unha satisfacción traballar cos colexios profesionais para dar unha formación complementaria tanto aos seus membros como ao noso alumnado. Neste senso lembrou como a transferencia é, xunto a docencia e a investigación, unha das tres funcións da universidade e fixo fincapé na importancia de fomentar a transferencia que chega á cidadanía con iniciativas como esta xornada. Do mesmo xeito, Xosé Manuel Cid, decano da Facultade de Educación e Traballo Social, destacou a importancia da alianza entre universidades e entre o mundo académico e profesional para facer a mellor educación social posible e reivindicou o papel que os seus profesionais xogan na sociedade.
Do público ao privado
Pola súa banda, Sonia González, presidenta do Colexio de Educadoras e Educadores Sociais de Galicia, coincidiu en salientar o interese e a necesidade desta colaboración entre o mundo académico e colexial, polo que agradeceu a boa acollida que tivo no campus de Ourense esta xornada. Sobre a temática elixida para ela, lembrou que a educación familiar é unha das áreas onde a educación social ten o seu traballo. Así, explicou que unha parte moi importante das e dos titulados en Educación Social remata traballando en concellos, nos seus servizos de atención e apoio familiar, onde a figura da educación social está contemplada como parte das súas equipas interdisciplinares.
A presidenta do órgano colexial engadiu que ese traballo en educación familiar que realizan as e os educadores sociais está chegando tamén ao terceiro sector e a espazos privados, a familias que precisan dese acompañamento socio-educativo. Porén, comentou que é necesario seguir traballando pola incorporación e recoñecemento da figura do educador e educadora social, dando a coñecer o traballo que realizan. A educación familiar é un dos retos fundamentais que se está dando agora na sociedade, afirmou Sonia González, pondo o aceno no impacto que ten nela aspectos como a tan manida e tan complicada de acadar conciliación familiar. Neste senso puxo o aceno na importancia desta conciliación e de ter tempo e espazos de calidade para un futuro máis máis saudable a nivel físico e emocional nas familias.
A programación da xornada arrancou cunha conferencia sobre o tempo de lecer en familia a cargo de Laura Varela, profesora da Universidade de Santiago de Compostela, e continuou cunha palestra centrada na dimensión tempo compartido no acompañamento socioeducativo con familias. Nesta última participaron as e os educadores sociais Sonia González, Felisindo Estévez e Natalia Gómez, coa moderación de Nazaret Blanco, da Universidade de Vigo. Ao longo das intervencións, as e os relatores afondaron nas novas dinámicas de convivencia intrafamiliar e as estratexias de acción dende a educación social e analizaron os retos futuros da educación familiar e a dimensión tempo compartido en familia e o seu impacto na intervención socioeducativa.
O ciclo de concertos Orballo Cultural vén de presentar a súa edición 2025, que se celebrará entre os meses de maio a setembro. Este ciclo propón levar ata distintas localidades da xeografía galega, concretamente aos concellos de Estrada, Tomiño, O Porriño, Ribadavia, Muxía, Noia, Ferrol e Sanxenxo, a artistas da escena musical galega. Entre os nomes xa confirmados están Xabier Díaz & Adufeiras de Salitre, Su Garrido Pombo, Herdeiros da Crus ou The Limboos. O ciclo Orballo Cultural busca unir a variada oferta musical de Galicia co patrimonio cultural e natural de distintas localidades, de tal modo que se pon en valor a rica variedade de opcións turísticas da comunidade. Ademais, integra a gastronomía e a artesanía como valores engadidos, nunha proposta que quere apostar pola sostibilidade e a igualdade.
A exposición afonda na realidade das cantareiras dende o século XVIII ata os nosos días. Daquelas, as mulleres das aldeas tocaban por pura necesidade, xa que non había outra maneira de escoitar música ca creándoa. Frei Rosendo Salvado e Rosalía de Castro xa se interesaron no seu tempo polas cantigas populares galegas considerándoas 'pura poesía, sen artificio' a pesar de estar nunha lingua diferente da oficial e proviren de mulleres labregas, de clase baixa. Rosalía foi, de feito, quen máis se identificou con esa literatura, empatizando co sentimento do pobo e levándoo ás altas esferas da época. A mostra tamén recolle, a través de varios documentos, o interese de persoas estranxeiras como Dorothé Schubarth, Alan Lomax ou Gustav Henningsen pola nosa tradición.
