domingo, 6 de julio de 2025
Esta é a primeira dunha serie de intervencións que se estenderán polas facultades de Farmacia, Ciencias, Veterinaria, Psicoloxía, Bioloxía e a Escola Técnica Superior de Enxeñaría coa vontade de prender o espírito crítico do alumnado. Ademais, esta segunda vaga das Faiscas ten como pano de fondo a mostra Un rastro de furia e algas. Reflexións sobre o futuro do planeta Terra que pode visitarse no Salón Artesoado do Colexio de Fonseca. A exposición acolle artistas do Norte de Portugal e Galicia que, nalgúns casos, abordan a través da súa obra a complexidade da loita medioambiental, mentres que noutros acométese o relato de historias concretas, ademais de analizar causas e consecuencias, intentando pensar como chegamos ata aquí e que podemos facer ao respecto, tal e como explica o profesor da USC Federico López Silvestre, comisario da mostra xunto a María Gil e Sergio Meijide.
As faíscas son partículas que se desprenden dun corpo que arde. A partir deste concepto, a USC lanzou o pasado curso un novo proxecto artístico-pedagóxico co que se logrou que o lume das manifestacións culturais e artísticas saltase ata as aulas universitarias e prendese a través da reflexión no alumnado, inseríndose no seu currículo académico. As Faíscas pretenden conectar o que a USC realiza no eido cultural e artístico co que se está estudando nas aulas e forman parte da programación do Outono Cultural integrado por un amplo e diverso abano de actividades no que música, teatro, danza, exposicións, faladoiros, cursos ou propostas audiovisuais danse a man.
Programa
O cambio climático visto dende o meu laboratorio é a Faísca que se desenvolverá en Farmacia o vindeiro 22 de novembro, ás 19.00 horas. O mesmo día pero ás 11.00 horas será a quenda da Facultade de Ciencias coa intervención titulada Urxencias climáticas. Un planeta na UCI? + Bahía Botánica, unha acción performativa con música e plantas a cargo de Hugo Torres. A mesma Faísca desenvolverase en Veterinaria a partir das 18.00 horas.
Psicoloxía acollerá o 29 de novembro, ás 16.30 horas, a Faísca titulada Canto cres que sabes de psicoloxía ambiental? A importancia da conduta humana. A xestión de residuos como panca clave na loita contra o cambio climático é o nome da intervención que terá lugar na Escola Técnica Superior de Enxeñaría, o 1 de decembro, ás 12.30 horas. Finalmente, o 13 de decembro, Bioloxía albergará a Faísca Bioarte para a concienciación sobre o cambio climático. A sesión terá lugar ás 12.00 horas.
Ás accións desenvolvidas nas escolas e facultades da USC súmase, o 21 de novembro ás 11.00 horas, no Salón Artesoado do Colexio de Fonseca, a palestra-performance titulada 'A Grande Sucessão: Sobre Redes'. Desenvolvida polo colectivo artístico Landra, consistirá na tradución dos procesos biolóxicos a música e ruído. Terá o compoñente performativo, pero tamén servirá de workshop interactivo para que o alumnado entenda a peza dende o proceso creativo dos e das artistas.
Como colofón a esta segunda vaga de Faíscas desenvolverase a ruta dirixida por Luís Miguel Serrano Desvelando a flora urbana e o seu potencial na configuración dunha cidade biodiversa. Será o 1 de decembro ás 12.00 horas.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
