Notas de prensa

Creatividade emerxente, reflexión e debate danse a man no Outono Cultural da USC

“Tal e como sucedeu coa Primavera Cultural, este é un programa compacto que concentra a maioría de propostas culturais impulsadas dende a Universidade, integrando baixo un mesmo paraugas as iniciativas que levamos anos desenvolvendo xunto con outras novas a cargo de artistas emerxentes”, explica a vicerreitora de Estudantes e Cultura, Pilar Murias. Deste xeito, quere dárselle unha maior visibilidade á programación cultural da USC entre o alumnado, conscientes de que “a cultura é ferramenta esencial no proceso de formación transversal”.

Unha das citas máis inmediatas será o concerto de hydn e Mondra o vindeiro 18 de outubro, ás 21.00 horas, na Igrexa da Universidade. Xa no mes de novembro será a quenda das Fillas de Cassandra que ofrecerán un concerto, tamén na Igrexa da Universidade, o día 15.

“Queremos plasmar a través das iniciativas artísticas o que lle preocupa á sociedade de hoxe”, apunta Pilar Murias. “Os e as artistas emerxentes afrontan moitas das cuestións actuais que tamén preocupan ao noso estudantado, cunha linguaxe (musical, plástica, audiovisual…) moi próxima a eles. Por iso queremos aumentar a súa participación na programación cultural da USC. Comezamos hai uns meses coa Primavera Cultural e agora damos un paso máis nesta liña”, engade. Así, entre os nomes máis destacados que participarán neste Outono Cultural atópase o colectivo Landra, Mariana Vilanova, Damián Ucieda ou Diego Vites. Ademais, entre as novidades do eido da formación destacan o curso de videocreación nos dous campus e o de Podcast en Compostela.

Faíscas culturais

Dentro da Outono Cultural enmárcase unha nova edición das Faíscas culturais que botaron a andar o pasado curso e que “resultaron todo un éxito” xa que permitiron introducir na dinámica das aulas diferentes propostas artísticas que serviron de base para “fomentar o debate, a reflexión e o espírito crítico do alumnado”, continúa a relatar a vicerreitora.

As Faíscas deste ano xirarán arredor do centenario da creación do Seminario de Estudos Galegos (SEG) a través dunha exposición divulgativa que viaxará por diversos centros dos campus de Santiago e Lugo, así como en torno a unha mostra de artistas emerxentes de Galicia e do Norte de Portugal que se situará no Colexio de Fonseca. No primeiro dos casos, a mostra servirá de contexto para diversas intervencións nas aulas vinculadas ao nacemento do SEG; mentres que na segunda serán os propios artistas os que interveñan coa vontade de dar a coñecer, entre outros aspectos, o seu propio proceso creativo.

Esta é unha iniciativa que botou a andar a finais do ano pasado e co que a USC introduce, nas clases de diversas materias, proxectos artístico-pedagóxicos que serven de ancoraxe para a reflexión. “Queremos conectar o que facemos no eido cultural e artístico co que se está estudando nas aulas”, explica Pilar Murias á hora de definir este proxecto que se sitúa na intersección entre o coñecemento académico e a expresión artística.