Notas de prensa

A Federación Galega de Dano Cerebral premia o CITIC da UDC por favorecer a inclusión social a través da innovación e a I+D+i

“É unha gran honra recibir este recoñecemento polo noso compromiso cos dereitos e a inclusión social. Este premio impúlsanos a seguir traballando no noso labor de investigación e desenvolvemento de tecnoloxías que melloren a calidade de vida das persoas con dano cerebral. O noso obxectivo é continuar xerando solucións innovadoras que lles permitan alcanzar unha maior independencia e participación activa na sociedade. Quero agradecer á Federación e a asociacións que a integran a súa colaboración e aos investigadores do CITIC a súa dedicación e compromiso para acadar unha sociedade más xusta, igualitaria e accesible”, sinalou o Manuel F. González Penedo, ao recoller o premio.

Neste senso, o director destacou o traballo do CITIC “no fomento da inclusión no ámbito tecnolóxico e a mellora da calidade de vida de todas as persoas, a través de múltiples iniciativas como o programa Talentos Inclusivos, un proxecto desenvolvido polo CITIC da UDC, en colaboración con ASPACE, que ten como obxectivo espertar vocacións STEM entre a mocidade e dar a coñecer a realidade da discapacidade a través de equipos colaborativos de traballo para resolver desafíos tecnolóxicos propostos por persoas con parálise cerebral”.

Espazos personalizados de Realidad Virtual

Así mesmo, persoas usuarias de ADACECO participan no proxecto do CITIC “ Espazos Personalizados de Realidade Virtual para a Neurorrehabilitación”, que achega a posibilidade de traballar actividades cotiás sen ter que cambiar de localización, contribuíndo isto á rehabilitación das persoas con dano cerebral adquirido como paso previo a realizalas nas súas contornas reais. Trátase dunha iniciativa na que a realidade virtual na que se pode interactuar con diferentes elementos de maneira semellante ao que sucedería no mundo real, tal e como recorda a investigadora Thais Pousada, que dirixe este proxecto, que se atopa en fase de desenvolvemento, cuxos escenarios foron realizados polo informático e doctorando Manuel Lagos e probados por persoas usuarias de Adaceco.

Rede de I+D+i

Por outra banda, a FEGADACE e as asociacións de dano cerebral da Coruña, ADACECO, e de Compostela, Sarela, forman parte da Rede de I+D+i de Tecnoloxías de Apoio para unha Sociedade Inclusiva, unha rede promovida tamén polo CITIC, coa finalidade de reunir a entidades representativas de persoas con discapacidade e/ou en situación de dependencia para establecer un espazo de posta en común de necesidades e posibles solucións para a autonomía persoal e a calidade de vida; un espazo de escoita para definir e desenvolver proxectos I+D+i cun enfoque centrado na persoa.

O CITIC

CITIC é un centro de investigación que potencia o avance e a excelencia en I+D+i aplicada ao TIC, creado en 2008 pola Universidade dá Coruña. A actividade científica do centro estrutúrase en catro áreas de investigación principais: Intelixencia Artificial; Ciencia e Enxeñaría de Datos; Computación de Altas Prestacións; e Servizos e Redes Intelixentes, e unha área de investigación transversal a todas elas: a de Ciberseguridad. Na actualidade, o CITIC está acreditado como Centro de Investigación de Galicia. A acreditación, estruturación e mellora do CITIC está cofinanciada pola Xunta de Galicia e a Unión Europea no marco do Programa Operativo FEDER Galicia 2014-2020, co obxectivo temático de promover o desenvolvemento tecnolóxico, a innovación e unha investigación de calidade. Un dos obxectivos do CITIC pasa por pór ao alcance da sociedade os resultados das súas investigacións, polo que o centro promove accións de ciencia cidadá e actividades divulgativas que potencien as vocacións científicas e garantan a renovación do talento no ámbito do TIC.

Premio FEGADACE – Miguel Blanco

O Premio FEGADACE ten a súa orixe nos recoñecementos entregados no I Foro de Familias de Persoas con Dano Cerebral a diferentes persoas especialmente implicadas no traballo das asociacións e ao psicólogo clínico Miguel Anxo García. Estes recoñecementos institucionalizáronse a través do premio, que recoñece o traballo e a traxectoria dun axente social implicado na defensa do colectivo e na sensibilización sobre o dano cerebral adquirido. En 2016 a Xunta Directiva da Federación aprobou o cambio de nome do galardón para lembrar ao neurólogo Miguel Blanco, falecido repentina e prematuramente en outubro de 2015. Blanco dirixía a Unidade de Ictus do CHUS e foi un estreito colaborador da Federación, que lle quixo render homenaxe incluíndo o seu nome no premio, que el mesmo recibiu no ano 2014.