Notas de prensa

O Colectivo Egeria presenta 'Imos coller niños novos… Os poemas galegos de Francisco de Fientosa nos cinco idiomas ibéricos'

Morreu de xeito alevoso no Madrid de 1936, con vinte e catro anos de idade, cando xa era autor dunha obra narrativa e poética, especialmente en castelán, que o elevou a categoría dos grandes da escrita.

O profesor e escritor Ricardo Polín en “A primeira luzada” recompila a obra de Francisco de Fientosa, pechando a recolleita da súa poesía cos “Versos galegos”, que chamaron a atención do tamén profesor e escritor, nado na Ponte Outeiro de Castro de Rei, Xosé Otero Canto, que foi facendo análise literario e lingüístico de cada un destes poemas, e publicándoos en GaliciaDigital.

Diante deste estudo, o Colectivo Egeria decidiu publicar o libro “IMOS COLLER NIÑOS NOVOS...” con motivo dos 110 anos do nacemento de Francisco de Fientosa, que se cumpriron o 22 de maio pasado, e preto dos 86 anos do pasamento do escritor.

Na publicación, ademais do estudo do profesor Otero Canto, inclúese o limiar “Versos e ausencia: Cartografía literaria do Lorca Galego”, de Ricardo Polín, máximo entendido sobre a vida e obra do escritor; un traballo de Otero Canto sobre “Francisco de Fientosa e Crecente Vega, unidos pola Ponte de Outeiro”, e a versión en castelán, catalán, vasco e portugués, que proporcionan unha dimensión inédita para a poesía en galego do escritor da Ponte de Outeiro.

A versión en castelán dos poemas estivo a cargo do propio Otero Canto, Catedrático de Lingua e Literatura españolas; as versións aos idiomas catalán e portugués son da escritora, historiadora e investigadora da cultura celta Ana Mar Fraga Rábade, e a versión en vasco de Aitor Fernández de Martikorena, profesor de éuscaro, tradutor, asesor didáctico e formador.

Cada poema do libro vai acompañado dun debuxo da mestra vilalbesa María Guerrero Rico, debuxante e ilustradora, que responde artisticamente á forza poética deste grande escritor, ao que se homenaxea nos 110 anos do seu nacemento.

O título de “Imos coller niños novos…” procede do primeiro verso do primeiro poema galego recollido por Ricardo Polín:

“Imos coller niños novos
agora que é primadeira.
Na beira do amor somentes
o choupal do corpo dela”.

O libro está publicado coa axuda da Xunta de Galicia e do Concello de Castro de Rei, figurando ao comezo cadansúa salutación de Román Rodríguez González, Conselleiro de Cultura, Educación e Universidade, e do Alcalde de Castro de Rei, Francisco Javier Balado Teijeiro. Vai ser presentado o próximo 29 de xuño, mércores, en Castro de Rei e Lugo. En Castro de Rei, ás 17:00 horas, na Biblioteca municipal Crecente Vega, e na capital lucense ás 19:30 h., no salón de actos da Biblioteca Nodal (Avenida de Ramón Ferreiro).

Nos dous actos intervirán, ademais dos responsables da obra, o Secretario Xeral de Política Lingüística da Xunta, Valentín García Gómez, e o Alcalde de Castro de Rei Francisco Javier Balado. A entrada será libre, ata completar aforo, e os asistentes serán agasallados coa publicación.