Notas de prensa

Galicia defende máis apoios que garantan a rendibilidade dos profesionais do mar ante a suba do prezo do gasóleo

A conselleira do Mar, Rosa Quintana, defendeu hoxe no Parlamento a necesidade de máis apoios por parte da Unión Europea e do Goberno central que redunden na rebaixa do prezo dos carburantes para os sectores máis afectados, como o marítimo-pesqueiro, e outras medidas que contribúan a mellorar a liquidez dos profesionais do mar e a xeración de ingresos ante a suba do prezo do gasóleo.

Nesta liña, sinalou que estas medidas, ademais de ser a curto prazo, deben ter tamén unha visión a medio e longo prazo. Así o expuxo en resposta a unha interpelación sobre este tema onde destacou que, dentro das medidas a curto prazo, a Xunta está a traballar nas que é posible aplicar desde Galicia como a bonificación do 100% das taxas dos portos galegos durante un mínimo de dous meses. Neste ámbito, apelou a Portos do Estado a ir máis alá da bonificación da taxa de descarga de pesca fresca.

Outra das medidas que acordou a comunidade autónoma galega é axilizar o abono das axudas concedidas aos axentes do sector a través das diferentes ordes de achegas convocadas polo Goberno autonómico. Ademais, engadiu a conselleira, a Xunta volverá lanzar de inmediato a campaña GALICIA SABE AMAR para animar á sociedade a consumir produtos do mar, elevar os seus prezos e agradecerlle á xente do mar o compromiso que está a mostrar saíndo ao mar nun difícil contexto económico.

Ao mesmo tempo, expuxo a titular de Mar, o Goberno galego segue insistindo en medidas xa solicitadas ao Executivo central como a posibilidade de empregar os fondos europeos non executados ao abeiro da declaración da situación excepcional e apoios específicos para os sectores transformador e comercializador de produtos do mar. Tamén incidiu na importancia de actuar desde o punto de vista fiscal, como demandou Galicia desde o primeiro momento, aplicando rebaixas de impostos na medida do posible para facilitar que as empresas poidan contar con liquidez.

Outros aspectos demandados pola Xunta ao Executivo estatal e que lembrou a conselleira son a flexibilización temporal e limitada das medidas normativas de importación de materias primas e a flexibilidade interanual das cotas de pesca.
En canto ao medio prazo, Rosa Quintana salientou a necesidade de medidas de eficiencia enerxética que permitan racionalizar o uso do combustible e axustar o seu consumo. Neste sentido, sinalou que a Xunta leva traballando neste ámbito desde hai anos impulsando o desenvolvemento de proxectos deste tipo na pesca, na acuicultura e na transformación.

Na parte relativa á visión a longo prazo, a conselleira subliñou a necesidade de traballar nunha descarbonización progresiva do sector, adecuando os barcos a novos combustibles que fagan viable a actividade e que sexan asumibles tanto en prezo coma en tecnoloxía.

Impacto

En relación ao impacto xerado no sector marítimo-pesqueiro polo encarecemento dos combustibles e dos custes das materias primas, así como polo paro do trasporte, a titular de Mar sinalou que na terceira semana de marzo as descargas e a facturación nas lonxas caeron nun 60% con respecto á mesma semana de 2019. Tamén expuxo que o prezo dos combustibles supón de media un 14% dos custes de explotación dos buques de pesca, variando entre o 7% na frota de baixura e o 22% no caso dos arrastreiros de altura, cuestión que se ve alterada seriamente coa suba do seu prezo.

Ademais, Rosa Quintana puxo de relevo o compromiso e a solidariedade do sector marítimo-pesqueiro para subministrar alimentos de calidade á cidadanía, do mesmo xeito que fixo durante a alerta sanitaria polo coronavirus, período no que foi declarado esencial e no que traballou.