Notas de prensa

Ponse en marcha Galaxy-Lab, o laboratorio avanzado de drons da Cidade das TIC

A Cidade das TIC acolleu hoxe o acto fundacional do Galaxy-lab, o laboratorio de investigación con drons que promove o Instituto Tecnolóxico de Galicia (ITG) nunha das naves do complexo de Pedralonga cedida pola Universidade da Coruña e que conta co financiamento parcial da Xunta de Galicia.

O reitor da UDC, Julio Abalde, e o director de ITG, Carlos Calvo, recibiron esta mañá ao vicepresidente segundo e conselleiro de Economía, Facenda e Innovación, Francisco Conde, xunto co delegado da Xunta na Coruña, Gonzalo Trenor, o presidente do Clúster TIC de Galicia, Antonio Rodríguez del Corral, a directora da Axencia Galega de Innovación, Patricia Argerey, o vicerreitor de Política Científica, Investigación e Transferencia, Salvador Naya, e a vicerreitora de Infraestruturas e Sustentabilidade, Amparo Casares, no que foi o acto fundacional do Galaxy-Lab, o laboratorio de drons de ITG, o primeiro en poñerse en marcha na Cidade das TIC.

Galaxy-Lab, o laboratorio avanzado de Intelixencia Artificial aplicada a drons que o Instituto Tecnológico de Galicia desenvolve na Cidade das TIC permitirá situar a Galicia como referente europeo en probas con sistemas aéreos non tripulados. Una vez estea operativo, previsto para finais deste año, dará servizo ás empresas que precisen experimentar e testar os seus sistemas de mobilidade aérea urbana para mercancías ou persoas, tanto nas primeiras fases da súa I+D ou como paso previo á certificación e operación comercial dos seus produtos.

O vicepresidente Francisco Conde resaltou o significativo deste acto fundacional. “Desde a Xunta queremos poñer en valor o traballo que está a impulsar a Universidade da Coruña co desenvolvemento da Cidade das TIC para converterse nun ecosistema de innovación de Galicia”, declarou recoñecéndolle ao reitor “a visión de promover a Cidade das TIC como un elemento de colaboración entre o coñecemento e o tecido produtivo”. O conselleiro amosouse “convencido de que a Cidade das TIC vai ser un factor tractor para outras industrias”.

Julio Abalde, reitor da UDC, destacou que a posta en marcha do Galaxy-Lab supón o primeiro acto de posta en marcha real do proxecto de Cidade das TIC que definiu como “un polo de innovación tecnolóxica vinculado á Intelixencia Artificial e ao Big Data para establecer sinerxías entre o coñecemento que se produce na Universidade da Coruña e o sector empresarial”. “A Cidade das TIC vén potenciar e facer máis competitivo o sector de innovación das nosas empresas e o Galaxy-Lab é un magnífico exemplo disto”, concluíu.

Na súa intervención, Carlos Calvo, director Xeral de ITG, afirmou que “Galaxy-Lab será un centro de excelencia de primeiro nivel con tres grandes eixos: desenvolvemento de intelixencia para voos con drons, escenario de probas para empresas e investigación; será un dos campos de probas de drons máis completo en Europa, con características que o fan único”. Ademais, “polas súas características de nodo urbano de drons, esta infraestrutura complementa outras xa existentes en Galicia e permite dar unha resposta adecuada ás necesidades dos operadores internacionais de drons cos que ITG xa está traballando”.

Galaxy-Lab, centro de referencia internacional no ámbito da Intelixencia Artificial e as TIC orientadas ao desenvolvemento de Sistemas Aéreos No Tripulados

Esta infraestrutura tecnolóxica, froito da colaboración público-privada entre a Xunta de Galicia e ITG e grazas á cesión dos terreos na Cidade das TIC por parte da UDC, constará, por un lado, dun edificio de máis de 1.000 m2 dotado dun centro de control de voos; unha zona de voo indoor reconfigurable; un laboratorio electrónico; espazos para montaxe, test e verificación; taller de mecanizado; impresión 3D e soldadura SMD e zona de deseño e desenvolvemento con postos de traballo de oficina, salas de reunións e almacén. Ademais, no exterior crearase unha gran gaiola de 15m de altura e 225 m2 de superficie cunha rede de seguridade que permitirá realizar probas de voo exterior con maior axilidade e total seguridade. Xunto a ela habilitarase un vertiporto para o despeque e aterraxe vertical de drons.

Este equipamento de vangarda complementarase cun centro de operacións móbil nun vehículo adaptado que contará con sistemas de comunicacións, navegación, vixilancia e control, sistemas que permitan a operación remota de drons, unha estación de recarga de enerxía específica para drons, unha estación meteorolóxica de prestacións aeronáuticas e licencias de servizos U-Space.

Unha vez entre en funcionamento, Galaxy-Lab permitirá estender sistemas e servizos U-Space para probar en voo drons nun escenario urbano e suburbano realista, onde se poderán probar efectos como a perda de sinal GPS en espazos estreitos urbanos ou a perda de enlace de comunicacións; o axuste de sistemas de xeoposicionamento, navegación e comunicacións (con presenza de edificios e outros obstáculos urbanos); a coordinación co espazo aéreo controlado real; o axuste de sistemas de detección de drons; probas de servizos utilizando infraestrutura urbana real, tráfico real, simulado e unha combinación de ambos con escenarios U‐Space, transporte de persoas e mercadorías, tráfico denso e variado; simulacros e adestramentos nun contorno real; así como demostracións comerciais (lanzamentos de produtos e solucións, resultados de proxectos de I+D, etc.).

Deste modo, Galaxy-Lab resultará de especial interese para aqueles operadores (empresas, centros tecnolóxicos ou universidades) que precisen realizar ensaios cos seus produtos de I+D ou ben para casos de uso previo a ser certificados ou operados de forma comercial. En particular, este laboratorio avanzado de ITG permitirá facer ensaios temperás, ou nas primeiras fases de desenvolvemento dun produto de I+D, favorecendo o acurtamento dos tempos de desenvolvemento da I+D no ámbito dos UAVs.

Galicia, referente europeo en desenvolvemento de I+D para drons

Galaxy-Lab enmárcase no Programa de Infraestruturas da Estratexia Aeroespacial de Galicia 2021-2025 que contempla, entre outros aspectos, estender os equipamentos máis aló do CIAR de Rozas cara a outras localizacións de Galicia para consolidala como o lugar idóneo para realizar I+D con UAVs. Ademais, funcionará de forma coordinada con outras infraestruturas de referencia na comunidade, como é o caso do centro de probas especializado en UAVs lixeiro Ancora DroneTest Center, que ITG xestiona en Cervo (Lugo), e que dispón dunhas condicións inmellorables para realizar probas de integración e validación de operacións coordinadas terra-aire-mar, voos máis aló da liña de vista do piloto (BVLOS) ou nocturnos.

ITG, referente no desenvolvemento de solucións no ámbito da mobilidade aérea autónoma

O Instituto Tecnolóxico de Galicia é o centro tecnolóxico de referencia en I+D e innovación aplicada aos sistemas aéreos non tripulados. Especializado en automatización e robótica aérea, e no control de tráfico de drons, a súa capacidade e infraestruturas permítenlle liderar neste ano 2022 o maior demostrador de Mobilidade Aérea Urbana do sur de Europa, AMU-LED. Neste proxecto internacional participan 17 compañías e institucións de Europa, China e Estados Unidos e combinará exercicios con vehículos non tripulados, incluíndo a primeira demostración de taxi aéreo non tripulado en España, que ITG traerá a Santiago de Compostela en setembro deste ano.

Ademais, é membro de EUROCAE (European Organization for Civil Aviation Equipment); dispón dun laboratorio propio especializado en microelectrónica e sistemas embebidos; e xestiona a súa propia pista de voo especializada en operacións terra-aire-mar (ANCORA). O Instituto Tecnolóxico de Galicia é así mesmo o único centro tecnolóxico galego que dispón de Unidades Mixtas de Investigación en colaboración con empresas no ámbito UAV e U-space.

Sobre ITG

ITG é unha fundación privada sen ánimo de lucro recoñecida oficialmente como Centro Tecnolóxico Nacional e situada na cidade da Coruña desde o seu nacemento en 1991. Formamos parte do consello reitor da Federación Española de Centros Tecnolóxicos (FEDIT) e o seu director xeral asume desde 2015 a presidencia dos 32 centros tecnolóxicos asociados.

A súa misión é mellorar a capacidade competitiva das organizacións a través da investigación e prestación de servizos profesionais no ámbito da industria 4.0, sistemas aéreos non tripulados, enerxía, tecnoloxías da auga e medioambiente. Ofrece desenvolvemento profesional en equipos de traballo que participan en proxectos de vangarda aliñados cos valores que lles diferencian