Notas de prensa

A Universidade da Coruña entre as 50 universidades máis sustentables do mundo e cuarta das españolas no ránking internacional Green Metric

A Universidade da Coruña sitúase no posto 49 no ránking internacional Green Metric que mide a sustentabilidade ambiental dos campus, e mellora os seus resultados da edición do ano pasado en 16 postos. Nesta listaxe, a UDC está no cuarto posto no ámbito español e continúa como Universidade líder en sustentabilidade en Galicia.

O Green Metric Ranking of Universities, a clasificación universitaria de maior alcance internacional, é un informe elaborado anualmente pola Universidade de Indonesia no cal se comparan os esforzos das universidades cara a sustentabilidade ambiental e as políticas de xestión respectuosas co ambiente, promovendo así a loita contra o cambio climático. Ao mesmo tempo, tamén pretende promover a mellora continua e o compromiso destas institucións para abordar os problemas de sustentabilidade.

Para elaborar este ránking analízanse múltiples indicadores agrupados en seis eixos: Infraestruturas, Enerxía e cambio climático, Residuos, Auga, Transporte, e Educación e investigación. Nesta convocatoria, marcada pola situación derivada da Covid-19, incluíronse novos indicadores que permitiron valorar os esforzos das universidades para continuar os seus programas e políticas de sustentabilidade na situación especial de pandemia.

A Universidade da Coruña continúa a tendencia positiva dos últimos anos e mellora en 16 postos a súa clasificación global. Con isto, a UDC sitúase na 49ª posición mundial de entre as 956 universidades participantes (45 máis que no ano anterior), ao tempo que se inclúe no 5% das universidades líderes (percentil 95).

O ránking internacional está encabezado pola Universidade de Wageningen (Holanda); e en España, pola Universidade Complutense de Madrid (posición 38 a nivel mundial).

No cómputo español, a UDC é a cuarta universidade máis sustentable, das 28 presentadas.

Análise por eixos

Infraestruturas, Enerxía e cambio climático e Auga son os sectores nos que se deu unha mellora respecto da puntuación obtida en anos anteriores. Ao mesmo tempo, mantense a puntuación para Residuos e Transporte. Por outra banda, Enerxía, Residuos e Educación son os eixos cunha mellor posición a nivel mundial. Cabe destacar a mellora substancial na puntuación obtida en Infraestruturas, de 325 puntos respecto o 2020, o cal permitiu mellorar en 253 posicións o posto en dito ítem e situarse como a segunda Universidade española con mellor resultado, só por detrás da Universidad de Alcalá de Henares. No eixo de Educación e investigación, a UDC mantense no percentil 94 mundial e é, ademais, a líder no Estado español neste eixo de valoración.

Universidade da Coruña, 2022-01-13

Actualidad

Foto del resto de noticias (improversions-cdg.jpg) O Centro Dramático Galego (CDG), unidade teatral da Xunta de Galicia, ofrece todos os luns ás 20,00 horas, a partir do 24 de xaneiro e ata o 7 de marzo, accións escénicas improvisadas para promocionar A peste, a súa nova produción. Trátase do programa ImproVersións, un proxecto dirixido por Antón Coucheiro co que se representará un espectáculo diferente cada semana no Salón Teatro de Santiago de Compostela. As pezas inspiraranse na temática e na atmosfera de A peste, así como nas suxestións do público, para realizar variantes libres e aloucadas arredor do clásico de Albert Camus. Ademais, utilizaranse a escenografía, o atrezzo e a iluminación da montaxe que vén de estrear o CDG con dirección e dramaturxia de Cándido Pazó.
Foto de la tercera plana (coronavirus.jpg) A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 71.376 deles 15.114 son da área da Coruña, 7.266 da de Lugo, 7.350 da de Ourense, 8.508 da de Pontevedra, 18.876 da área de Vigo, 10.811 da de Santiago e 3.451 da de Ferrol. Do total de pacientes positivos, 47 están en UCI, 582 en unidades de hospitalización e 70.747 no domicilio. Polo de agora, en Galicia hai un total de 307.012 persoas curadas, rexistrándose 2.881 falecementos. O número de PCR realizadas é de 3.510.328. O número de doses de vacina contra a covid-19 administradas é de 6.291.596.

Notas

A mostra ‘Defensoras’ lembra ata finais de febreiro na Facultade de Humanidades do Campus de Lugo o cometido desenvolvido ao longo da historia por once mulleres que destacaron pola súa loita a prol da defensa dos dereitos humanos. A exposición, coordinada pola profesora Beatriz Fernández Herrero e elaborada por alumnado de último curso do grao en Ciencias da Cultura, está estruturada en paneis informativos que achegan unha semblanza de once mulleres que, en distintos ámbitos, constitúen verdadeiras referentes na loita polos dereitos humanos.
O pasado mes de outubro, a sala de exposicións do campus de Pontevedra iniciaba unha nova etapa baixo o nome de Sala Universitaria Profesor Manuel Moldes, que se inauguraba cunha exposición dedicada a este pintor e docente falecido en 2017. Baixo o título de 'Manuel Moldes. Vieiros na memoria', este proxecto expositivo complétase agora coa publicación dun catálogo que afonda tanto nas obras reunidas na mostra como na propia figura e traxectoria do artista pontevedrés.
PUBLICIDAD
ACTUALIDAD GALICIADIGITAL
Blog de GaliciaDigital
PROMOCIÓN
PUBLICACIONES
Publicaciones
Publicaciones Amencer
Revista Egap
Obradoiro de Artesania