Notas de prensa

Sumo Valor, 'unha alianza estratéxica' entre sociedade e Universidade

'Que a sociedade nos coñeza e queira colaborar co que facemos', así definiu o reitor da USC a meta da campaña de micromecenado Sumo Valor que inclúe entre as súas liñas de actuación, unha específica para facer fronte á loita contra a COVID-19. O reitor presidiu un encontro con representantes do tecido empresarial e social galego que serviu para dar a coñecer esta iniciativa que leva recadado dende a súa posta en marcha (finais de 2019) arredor de 125.000 euros.

'Crear a cultura da conexión da universidade coa sociedade e alimentar deste xeito os proxectos que estamos a desenvolver' constitúe para o reitor 'unha alianza estratéxica'.

A COVID-19 supuxo un antes e un despois para Sumo Valor, tal e como tamén explicou o vicerreitor de Planificación, Tecnoloxías e Sustentabilidade, Gumersindo Feijoo Costa. “A finais de 2019, cando o programa botou a andar como unha iniciativa piloto, e ata marzo de 2020, a meirande parte das microdoazóns dirixíanse a actividades culturais e deportivas. A aparición da COVID-19 fixo que os investimentos en investigación pasasen a ocupar un rol protagonista”, sinalou o vicerreitor. A iniciativa conta ademais co apoio do Consello Social da USC. Neste senso, a súa presidenta, Cecilia Sierra, quixo subliñar que “a nosa Universidade conta con talento científico e grupos de investigación con gran capacidade tractora para atraer máis talento e novas vías de financiamento”.

Talento investigador

Os investigadores da USC Dolores Pérez e Rubén Nogueiras, pertencentes ao Centro Singular de Investigación en Química Biolóxica e Materiais Moleculares (CiQUS) e ao Centro Singular de Investigación en Medicina Molecular e Enfermidades Crónicas (CiMUS), respectivamente, tomaron parte no acto para achegar as súas vivencias á hora de desenvolver a súa actividade investigadora e lograr financiamento para os seus proxectos. “Sumo Valor é unha ferramenta extraordinaria”, sinalou Dolores Pérez ao permitir que a sociedade apoie a investigación da Universidade. “A inconsistencia na convocatoria de proxectos, a falta de flexibilidade na execución dos mesmos e a alta carga burocrática” son algunhas das eivas que o profesor Nogueiras sinalou á hora de acometer a actividade investigadora e que evidencia a necesidade de desenvolver novas vías de financiamento. “O que nos vai facer evolucionar non é a Universidade cos seus 500 anos de historia, senón a xente que traballa nela”, concluíu.

Ademais, os fondos captados a través de Sumo Valor serviron como fonte de financiamento para distintos proxectos de investigación no eido da COVID-19. Así, o profesor da USC e tamén científico do CiQUS, Javier Montenegro, é o investigador principal dun proxecto que prepara vectores peptídicos para o transporte de ARN mensaxeiro de potencial aplicación en vacinas. Pola súa parte, o grupo que dirixe o profesor José Martínez Costas traballa tamén dende o CiQUS, no desenvolvemento dunha vacina fronte á COVID-19 en base a unha nova metodoloxía, creada no propio centro e patentada pola USC, que permite resultados en marxes de tempo reducidos e a baixo custo.

Jorge Mira é o investigador principal do proxecto 'Predico' sobre modelos de predición dinámica sobre escenarios de afectación por COVID-19 a curto e medio prazo. O obxectivo deste proxecto tamén financiado pola campaña de micromecenado da USC, é o de predicir a evolución da expansión e incidencia da enfermidade. A cartografía de risco coordinada polo profesor Ángel Miramontes permite, pola súa parte, coñecer onde se localizan os principais focos de contaxio pola COVID-19, con que factores territoriais están relacionados e cales son os espazos de actuación chave para frear a súa propagación. 'Sumo valor' toma tamén parte na elaboración deste mapa actualizable que realiza un diagnóstico sobre o comportamento espacial do contaxio.

Finalmente, o proxecto de vacina contra a COVID-19 no que está a traballar a profesora e investigadora do CiMUS, María José Alonso, recibe tamén financiamento deste programa da institución compostelá; xunto ao de vixilancia de SARS-CoV-2 en EDAR, dirixido por Jesús Romalde; e o de vixilancia e detección do SARS-CoV-2 en augas residuais, coordinado por Juan Manuel Lema. Con todo, o programa abrangue doazóns para a investigación científica de tipo xeral e a difusión dos seus resultados. Así, por exemplo, o proxecto ‘Lingua viva. Plataforma de datos lingüísticos’ que aspira a crear un espazo que reúna as doazóns lingüísticas de todos/as os/as falantes do galego vivo recibe tamén apoio dende o programa de micromecenado, entre outras iniciativas.

Cultura e deporte

Sumo Valor aspira tamén a contribuír á consolidación de programas de produción propia da USC. Ampliar a oferta e o apoio ás iniciativas culturais e deportivas da comunidade universitaria, así como afrontar a mellora e mantemento das instalacións e equipamentos deportivos son, polo tanto, outros dos horizontes que persegue esta iniciativa.

Empresas e particulares poden apoiar o programa a través de microdoazóns por valor non superior aos 3.000 euros, xa sexa unha cantidade monetaria ou un ben. As doazóns poden realizarse a través da páxina web do programa. No transcurso do acto, o reitor fixo tamén entrega á actriz María Mera do diploma de embaixadora de Sumo Valor.

Universidade de Santiago de Compostela, 2021-09-15

Actualidad

Foto del resto de noticias (camino-cunchas.jpg) Percorrer o tempo. Visións contemporáneas do Camiño inclúe unha escolma de fotografía e vídeo e sitúase na zona portuaria, onde permanecerá ata o mes de novembro. Na iniciativa participan artistas de Galicia, como Carla Andrade, Luis Díaz Díaz, Iván Nespereira, Bandia Ribeira e Lúa Ribeira, xunto a profesionais de fóra que representan os diferentes Camiños e enlaces con outras rutas históricas. Así, figuran tamén a inglesa Olivia Arthur, presidenta da Axencia Magnum; o portugués André Cepeda, o francés Michel Le Belhomme, a alacantina Cristina de Middel, que foi Premio Nacional de Fotografía, e o xienense Miguel Ángel Tornero. O docente e artista visual Nicolás Combarro é o comisario da mostra.
Foto de la tercera plana (mare.jpg) Este festival será lugar de encontro de artistas, músicos, poetas e escritores de ambas as dúas beiras do Atlántico que conflúen en Santiago para celebrar a súa diversidade e creatividade cultural. Máis de 30 propostas musicais e artísticas, oito delas aínda inéditas aquí e dúas que serán unha estrea mundial, procedentes dunha decena de países e comunidades autónomas que comparten vínculos con Galicia. Así, ademais dunha ampla representación galega, o cartel inclúe artistas de Catalunya, Portugal, Colombia, Brasil, Mozambique, Cabo Verde, Güiana, Arxentina, Malí, Inglaterra, Sáhara Occidental ou Paraguai que farán que Compostela fale catalán, inglés, mambara, guaraní ou chopi timbilia, entre outros.

Notas

Na fin de semana do 25 e 26 de setembro subirán ao escenario o cantautor ourensán Emilio Rúa co seu concerto íntimo A canción de autor de Ourense, e Teatro Sarabela, coa obra O Secuestro da Bibliotecaria, unha peripecia divertida a refrescante que aposta polos valores da solidariedade e ao amor á literatura para público maior de seis anos. Xa en outubro, o día 1 o actor e director Avelino González narrará a vida e obra do intelectual ourensán Vicente Risco en Risco Contando a todo Risco.
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 2.580 deles 687 son da área da Coruña, 510 da de Lugo, 276 da de Ourense, 177 da de Pontevedra, 433 da área de Vigo, 409 da de Santiago e 88 da de Ferrol. Do total de pacientes positivos, 32 están en UCI, 84 en unidades de hospitalización e 2.464 no domicilio. Polo de agora, en Galicia hai un total de 176.385 persoas curadas, rexistrándose 2.614 falecementos.
PUBLICIDAD
ACTUALIDAD GALICIADIGITAL
Blog de GaliciaDigital
PROMOCIÓN
PUBLICACIONES
Publicaciones
Publicaciones Amencer
Revista Egap
Obradoiro de Artesania