miércoles, 18 de marzo de 2026
O conselleiro de Sanidade, Julio García Comesaña, e o reitor da Universidade de Santiago de Compostela, Antonio López Díaz, asinaron esta mañá un convenio de colaboración para implantar o primeiro centro de produción de medicamentos CAR-T de Galicia.
Coa a posta en marcha deste centro, no que tamén se poderán producir fármacos destinados a diversas terapias celulares, a comunidade galega sitúase á vangarda da investigación e da produción de tratamentos avanzados, cuxo obxectivo é abordar diferentes patoloxías de carácter oncolóxico. Neste senso, a Xunta de Galicia investirá un total de 25 millóns de euros para levar a cabo as tarefas de reforma e a adquisición do equipamento preciso para pór en marcha o centro de produción.
O responsable do departamento sanitario da Xunta trasladou o seu agradecemento á Universidade de Santiago de Compostela, quen cederá as súas instalacións do Monte da Condesa, onde anteriormente se emprazaba o Instituto de ortopedia e o Banco de Tecidos Musculoesqueléticos. O inmoble, de preto de 1.000 metros cadrados, acollerá tanto o centro de produción de medicamentos CAR-T e outras terapias celulares, como a futura Unidade de Investigación.
Sobre este particular, García Comesaña avanzou o inminente comezo das obras de remodelación, cuxa finalización se prevé no último trimestre do ano, e coas que se adecuará a instalación existente ao novo dimensionamento dedicado a produción celular, laboratorios de control de calidade, salas de criopreservación, ademais doutros espazos destinados a usos auxiliares e administrativos.
O conselleiro de Sanidade subliñou que se trata dun chanzo importante na atención personalizada dos enfermos de cancro pois, estamos diante de medicamentos de alto impacto clínico e asistencial que, nalgúns casos, acadan unhas taxas de resposta do 80%.
Mediante este convenio, no que tamén participan a Empresa Pública de Servizos Sanitarios Galaria e o Servizo Galego de Saúde; a Consellería de Sanidade, comprométese a promover a constitución dunha Unidade de Investigación onde participará conxuntamente o persoal do novo centro CAR-T, grupos de Investigación do sistema universitario de Galicia, ademais doutros institutos e organismos de investigación sanitaria.
Tratamento de grande efectividade
Segundo o acordo asinado esta mañá, a Unidade de Investigación estará creada antes da finalización do primeiro trimestre do ano 2022. Así, o seu principal obxectivo será levar a cabo proxectos de investigación que permitan o desenvolvemento de novas terapias celulares para, posteriormente, ser elaboradas no centro de fabricación e, de seguido, seren aplicadas nos pacientes do sistema sanitario público.
Durante os dous primeiros anos de funcionamento, agárdase poder producir entre un e dous fármacos distintos en ensaios clínicos, o que poderá supoñer unha cifra de entre 50 e 100 pacientes tratados, tomando como referencia o dimensionamento dos ensaios desenvolvidos ata o momento no resto do Estado.
Así mesmo, a Empresa Pública de Servizos Sanitarios Galaria encargarase de adquirir o conxunto de materiais e equipamentos precisos para pór en marcha o Centro CAR-T e o mantemento das instalacións da USC, ademais de aportar o persoal necesario para a fabricación de medicamentos de inmunoterapia celular avanzada.
Os resultados da terapia CAR-T publicados ata o de agora evidencian unha grande efectividade deste tratamento en pacientes oncohematolóxicos, con altas cifras de remisión da enfermidade.
Por medio destas terapias pódese conseguir que o sistema inmune do paciente recupere, mediante técnicas de modificación xenética, a capacidade de recoñecer e destruír de forma selectiva as células tumorais. Neste senso, a propia American Society of Clinical Oncology recoñeceu o alto potencial das terapias CAR-T como avance do ano.
Con esta decisión, procúrase ampliar a internacionalización, unha maior apertura á creatividade dixital coa irrupción das novas tecnoloxías e darlle pulo a súa descentralización dentro e fóra de Galicia. O obxectivo con esta renovación é impulsar estes eidos na actividade deste centro museístico, referente da arte contemporánea en Galicia e España, tras case once anos con Santiago Olmo á fronte da súa dirección. Como resultado do seu labor, o Centro Galego de Arte Contemporánea acadou en 2025 ser recoñecido como Insignia da cultura galega polo Observatorio da Cultura da Fundación Contemporánea, segundo os resultados do prestixioso informe elaborado coas valoracións de máis de 400 expertos e profesionais de toda España.
O presidente da Xunta informou de que 'Galicia vai liderar un val especializado en tecnoloxía cuántica no que participarán nove países europeos' e que contará cun investimento de 14,3 millóns de euros. Rueda lembrou que a comunidade 'está a posicionarse como referente europeo' neste eido e asegurou que o feito de que Galicia lidere un proxecto 'nunha materia con tanto futuro é un reflexo da boa saúde da I+G+i galega'. A Comisión Europea acaba de conceder un novo proxecto de cuántica polo que a nosa Comunidade vai liderar un val de innovación, é dicir, unha iniciativa de colaboración entre rexións que destacan pola súa capacidade neste ámbito e que, grazas a este val, van conectalas para facer novos desenvolvementos e incrementar a soberanía da UE.
