martes, 3 de noviembre de 2026
En base ao estudo da evolución da pandemia en Portugal, os científicos, xunto co equipo do proxecto homólogo que se está a desenvolver no país veciño, desenvolveron un novo modelo matemático co que levar a cabo un control eficaz da pandemia.
O artigo Optimal control of the covid-19 pandemic: controlled sanitary deconfinement in Portugal, que acaba de ver a luz na revista Scientific Reports, do grupo Nature, presenta os resultados obtidos logo de aplicar a teoría matemática do control óptimo, en combinación coa análise da rede social Twitter dese país, para axustar a curva portuguesa de persoas infectadas. Alberto Pérez Muñuzuri, Alejandro Carballosa, Juan Nieto e Jorge Mira son os científicos da Universidade de Santiago de Compostela que asinan a investigación xunto a Iván Area da Universidade de Vigo.
O equipo afondou na evolución da pandemia durante a primeira onda en Portugal, un país no que, durante o seu confinamento, explican os investigadores do proxecto, concorreron circunstancias de homoxeneidade (a nivel de comportamento poboacional, sen fragmentación territorial e de regulamentacións) e illamento de fluxos de visitantes exteriores. Estas características, sumadas ao seu relativamente gran tamaño de poboación, fixeron dese país un bo exemplo a analizar, sinalan. As políticas de confinamento adoptadas foran ben implementadas e evitaron unha sobrecarga do sistema nacional de saúde portugués, engaden os investigadores.
Estudo da rede social
Os autores do artigo propoñen nel un modelo matemático que axustou a curva portuguesa de persoas infectadas, con parámetros corrixidos en base á análise da rede social Twitter do país veciño, para detectar mudanzas na opinión pública ao longo do tempo. A continuación, aplicaron a teoría matemática do control óptimo, coa que determinaron estratexias que maximicen o número de persoas que poidan retornar á vida normal, minimizando ao mesmo tempo o número de infectados activos, con custos económicos mínimos e garantindo un baixo nivel de hospitalizacións, explican os investigadores. Deste xeito, engaden, lógrase determinar a intensidade e duración dos períodos de desconfinamento que permiten manter o número de infectados activos, e consecuentemente de hospitalizacións, por debaixo dun nivel considerado seguro para o sistema nacional de saúde.
A teoría do control óptimo é unha rama das matemáticas que ofrece unha ferramenta para abordar o problema de atopar estratexias óptimas para deter a transmisión do SARS-CoV-2. É unha poderosa ferramenta para deseñar estratexias de control e actuar de maneira óptima nun sistema dado, sinalan os investigadores do estudo, engadindo como pode axudar ás autoridades sanitarias a comprender, anticipar e mitigar a propagación do virus e avaliar a efectividade potencial de estratexias de prevención específicas.
Cristiana Silva, Carla Cruz e Delfim F.M. Torres, da Universidade de Aveiro; Rui Fonseca-Pinto, da Politécnica de Leiria; Rui Passadouro e Estevaõ Soares dos Santos, do ACES Pinhal Litoral, e Wilson Abreu, do Centre for Health Technology and Services Research de Porto, completan por parte de Portugal a listaxe de asinantes do artigo publicado este mércores en Scientific Reports. O proxecto Predico, liderado pola USC, conta con financiamento do Ministerio de Ciencia e Innovación do Goberno de España.
O Plan constitúe o primeiro documento estratéxico específico de Galicia dedicado á planificación, organización e desenvolvemento dos coidados paliativos pediátricos e nace coa finalidade de dar resposta ás necesidades propias desta poboación, garantindo unha atención adaptada ás características evolutivas da infancia e da adolescencia. O documento aprobado hoxe conta co aval científico da Sociedade de Pediatría de Galicia e da Sociedade Española de Coidados Paliativos Pediátricos e está dirixido á poboación pediátrica con enfermidades crónicas complexas e situacións susceptibles de atención paliativa. Articúlase arredor de catro liñas estratéxicas orientadas a fortalecer a organización asistencial e a dar resposta ás necesidades clínicas, emocionais e sociais dos pacientes pediátricos e das súas familias.
Galicia ocupa un lugar destacado nos Premios Nacionais de Investigación 2026, con cinco científicos galardoados. Tivo lugar o acto de entrega destes premios, celebrado no Palacio de Congresos de Europa, en Vitoria-Gasteiz. Os investigadores galegos que recibiron esta distinción son Ángel Carracedo, natural de Santa Comba, catedrático de Medicina na USC e director da Fundación Pública Galega de Medicina Xenómica; a compostelana Carmen Álvarez Lorenzo, catedrática da USC e directora do Instituto de Materiais da USC (iMATUS); e Laura Castro Santos, de Betanzos, catedrática da Escola Politécnica de Enxeñaría de Ferrol, pertencente á UDC.
