jueves, 12 de febrero de 2026
Identidades latentes suma, coa de Seara, dez obras que amosan como a tradición sociocultural influencia a produción contemporánea e viceversa. A exposición presenta instalacións, pinturas, esculturas e fotografías baseadas na procura das identidades feministas, culturais, de xénero, sociais...
Un abano de formas de traballar
Mar Ramón, estudante de doutoramento da Facultade de Belas Artes, explica que se trata dunha exposición que deixa espazos para diferentes visións dunha temática e, neste senso, afirma que hai un amplo abano de formas de traballar a problemática da identidade. Asegura que é interesante observar como, aínda sendo socializadas dunha maneira parecida polo feito de ser mulleres e galegas, as nosas miradas cara o exterior son tan diverxentes.
Para a profesora Itziar Ezquieta, do Departamento de Didácticas Especiais, o proxecto ideado por Seoane e Seara supón un reencontro consigo mesma e coa súa produción despois dun tempo no que deixara abandonada a práctica no taller. Considera ademais que a súa obra, formada por siluetas e sombras de figuras fragmentadas, encaixa moi ben coa proposta expositiva, xa que o seu fío condutor é a procura constante de significados sobre a subxectividade, a vida e os porqués do estar e do ser.
Segundo Silvia García, docente do Grao en Belas Artes, Identidades latentes permite dialogar coas pezas doutras mulleres e ofrecer un retrato coral onde se plasma a nosa identidade como artistas en permanente construción. A súa proposta, relativa á memoria dos oficios e da intimidade, conta con dúas partes: un colaxe con fotografías antigas de mulleres e unha cadeira construída con roupa branca trenzada, procedemento que enlaza cos labores femininos e co traballo da súa nai, que era atadeira.
Entre as creacións presentes na sala de exposicións temporais do Museo do Mar aparecen puntos comúns, cuestión evidente no caso de Silvia García e Itziar Ezquieta, que xogan cos conceptos da memoria, da intimidade, do recordo e do esquecemento. Doutra banda, as fotografías e a escultura que expón Mar Ramón constitúen enlaces ou conversacións entre os obxectos domésticos e os corpos.
Poñer en valor a lingua e a identidade galega
Co patrocinio da Secretaría Xeral de Política Lingüística e o Fondo de Proxectos Culturais Xacobeo 2021, Ana Seoane e Neves Seara apostaron nesta mostra polo emprego da lingua galega en todos os textos relacionados co proxecto, xa que, segundo argumentan, no ámbito das Belas Artes o galego presenta un uso moi baixo, tanto nas facultades como na maioría das artistas consagradas.
Son varias as creacións que abordan a identidade galega desde perspectivas autobiográficas e antropolóxicas. A egresada Melania Freire establece un paralelismo entre o traspaso xeracional ou familiar e o uso do pano tradicional, unha prenda feminina que, como no caso dos mandilóns empregados por Rebeca Lar, homenaxea á cultura popular, ás nosas amigas, irmás, nais e avoas.
Unha das propostas co gallo do 25N
A perspectiva de xénero caracteriza a maioría dos traballos das creadoras de Identidades latentes. Nun acto que inaugurou as actividades propostas pola Xunta de Galicia arredor do 25N, Día Internacional para a Eliminación da Violencia contra a Muller, Marta Lucio, directora do Museo do Mar, Valentín García, secretario xeral de Política Lingüística, e Marta Fernández-Tapias, delegada territorial da Xunta en Vigo, salientaban a importancia de apoiar este tipo de proxectos. A artista Mar Ramón tamén sinala a pertinencia dos actos culturais reivindicativos nestas datas e destaca que moitas das obras falan da violencia contra a muller en maior ou menor medida.
Identidades latentes forma parte da programación do Museo do Mar de Galicia co gallo do 25N, na que tamén haberá teatro, coa representación de Soa, e cine, coa proxección do filme documental Saberes de muller.
A Mesa Sectorial do Ensino, conformada polas organizacións sindicais CIG, CC.OO., ANPE e UGT-SP Ensino, analizou esta mañá o decreto de oferta pública de emprego e a orde de convocatoria das probas das oposicións deste ano. Son un total de 1.601 prazas en 42 especialidades e, tal e como explicou o director xeral de Centros e Recursos Humanos, Jesús Álvarez, as probas comezarán o 20 de xuño, unha vez remate o curso. Deste xeito, a previsión é que todos os exames estean rematados o 19 de xullo. A continuación, adxudicaranse os destinos provisionais das persoas que gañen praza para que os docentes se incorporen aos seus postos en setembro.
A Xunta acaba de editar o catálogo Films from Galicia 2026, unha ferramenta de difusión exterior que reúne 63 novos títulos do audiovisual galego, con 23 estreas recentes e 40 proxectos en diferentes fases de desenvolvemento. A publicación da Consellería de Cultura, Lingua e Xuventude edítase en inglés, en formato tanto físico como dixital interactivo, para favorecer a súa máxima difusión. Ofrécese e compéndiase deste xeito información útil para profesionais da distribución, das vendas e da programación e incorporarase á actividade de promoción do Goberno galego en diferentes mercados e encontros especializados do circuíto internacional, co obxectivo de aumentar as oportunidades e a competitividade do sector audiovisual do país asociado, ademais, á marca Galicia Calidade.
