martes, 27 de octubre de 2026
Este encontro innova o seu formato e desenvolverá boa parte das actividades en modalidade dixital e abríndoas ao público xeral, previa inscrición.
Así, esta nova edición da Semana Micolóxica Galega, impulsada polo Laboratorio MicoUvigo, a spin-off MycoPlantae a o Grupo Micolóxico Galego Luis Freire, constará, entre o 16 e o 20 de novembro, dun ciclo de conferencia e unha mesa redonda, varios concursos e unha exposición que, do 16 ao 22 de novembro, amosará un amplo abano de exemplares de diferentes especies e familias de cogomelos. A mostra, que tradicionalmente se instalaba no vestíbulo do Edificio de Ciencias Experimentais dentro da programación de actividades de celebración do patrón de Bioloxía, Ciencias do Mar e Química, San Alberte, este ano terá lugar por primeira vez en formato completamente dixital. Ademais, durante esa semana tamén estará a disposición do público unha mostra dos relatos e fotografías que envíen todos os participantes.
Catro conferencias e unha mesa redonda
O ciclo de conferencias da Semana Micolóxica terá lugar entre o día 16 e o 19 de novembro, un relatorio diario en liña ás 20.00 horas. O primeiro día centrarase na micoloxía en Vigo, o segundo na micobiota nas illas Cíes, o terceiro nos mixomicetos e o cuarto no impacto que o cambio climático pode ter nos cogomelos. O venres día 20 ás 19.00 horas concluirán as actividades cunha mesa redonda na que diferentes persoas relacionadas con este eido debaterán sobre a divulgación en micoloxía, as orixes da divulgación micolóxica en Galicia, as entidades e persoas que durante anos se encargaron de dar a coñecer o mundo dos cogomelos e a situación actual da micoloxía na nosa comunidade autónoma.
Concurso de relatos e fotografía micolóxicos
A Semana Micolóxica Galega complétase con dous concursos que tratan de implicar á cidadanía dun xeito directo no coñecemento sobre as diferentes especies do cogomelos. Para iso, ata o día 6 de novembro está aberto o prazo de participación no certame de fotografía micolóxica e no de relatos micolóxicos.
O I Certame de Relatos Micolóxicos está aberto a toda a cidadanía e comprende tres categorías (infantil, ata os 12 anos; xuvenil, de 13 a 18 anos e adultos para maiores de 18 anos) Cada participante poderá presentar unha obra cuxo contido debe estar relacionado dalgún xeito coa micoloxía, os cogomelos, as tradicións micolóxicas, as micogastronomía, a superstición sobre os cogomelos, etc. Os premios na categoría infantil consistirán nun lote completo de A miña primeira guía micolóxica e unha baralla do O xogo dos cogomelos para o primeiro clasificado e outra baralla para o segundo. Na categoría xuvenil, o primeiro premio será un exemplar de A miña primeira guía micolóxica: macrofungos domesticados e unha paca de cultivo El monstruo de las setas, mentres que o segundo clasificado recibirá outro exemplar do libro. Na modalidade de adultos, a persoa gañadora recibirá o libro Cogomelos de Galicia e norte de Portugal, de Edicións Xerais, asinando pola autora, mentres que o segundo premio será Guía micolóxica dos ecosistemas galegos, de Baía Edicións, asinado pola autora.
O I Concurso de Fotografía Micolóxica está aberto a calquera persoa maior de 18 anos, que poderán presentar imaxes relacionadas coa temática citada, sempre que estas non teñan sido alteradas dixitalmente nin por calquera outro medio. A organización tampouco acepta fotomontaxes, pero si permite mínimas correccións de cor e luminosidade e, en caso de dúbidas, o xurado podería solicitar ao autor o arquivo Raw para a súa comprobación. O primeiro premio constará dun libro de fotografía e un segundo premio de produtos variados de MycoGalicia.
O proxecto Xenoma Galicia, que conta cun investimento de 20 millóns de euros, ten por obxecto recompilar o ADN de 400.000 galegos para identificar os xenes relacionados co cancro de mama e ovario hereditario, a síndrome de Lynch e a hipercolesterolemia familiar. Ata o de agora, foron analizadas 3.112 mostras biolóxicas. En concreto, 1.037 mostras de sangue na primeira pilotaxe do proxecto, 796 de saliva no segundo piloto e, coa primeira fase do proxecto en marcha, 1.279 mostras dos voluntarios dos primeiros distritos participantes. A análise das mostras destes 1.279 participantes da fase 1 permitiu detectar 25 novos casos positivos. En concreto, 14 participantes deron positivo en cancro de mama e ovario hereditario, dous na síndrome de Lynch e nove en hipercolesterolemia familiar.
A Pedreira e Fillas de Cassandra estarán presentes no Womex 2026, o máis importante encontro mundial das músicas folk e de raíz que se celebra ata este domingo en Las Palmas de Gran Canaria. Trátase dunha iniciativa que ofrece aos artistas e ás empresas galegas un espazo para dar a coñecer o seu traballo ante programadores, festivais, axencias de contratación e outros profesionais de diferentes países. A artista foi escollida por un xurado internacional independente para formar parte dos Official Showcases, a selección oficial de concertos coa que Womex achega aos profesionais propostas das músicas do mundo.
