lunes, 6 de mayo de 2024
O secretario xeral de Política Lingüística, Valentín García, participou hoxe na mesa inaugural do Foro da Cooperación Municipalista da Lusofonía: os municipios, pezas clave do desenvolvemento, que acolle a Escola Galega de Administración Pública - EGAP ata mañá, promovido polo Fondo Galego de Cooperación e Solidariedade co apoio da Dirección Xeral de Relacións Exteriores e coa Unión Europea da Xunta de Galicia.
O responsable de Política Lingüística destacou a potencialidade das entidades locais na promoción do uso do galego no ámbito da lusofonía, polo importante papel xa desempeñado por elas no proceso de normalización lingüística da lingua propia de Galicia. Así mesmo, recordou que desde os inicios da política galega de cooperación para o desenvolvemento a lusofonía ten sido un criterio de referencia na definición e establecemento das prioridades xeográficas e que canda aos ámbitos estratéxicos, a continuidade das alianzas de traballo cos países africanos de lingua oficial portuguesa (PALOP) constitúe un dos valores diferenciais da cooperación galega.
Un contexto que cómpre trasladar tamén á cooperación no referido á aplicación da Lei Paz-Andrade, que establece que deberán ser promovidas as relacións a todos os niveis cos países de lingua oficial portuguesa, constituíndo este un obxectivo estratéxico do Goberno galego. Galicia é punto de referencia da lusofonía. Por iso, o Goberno galego apoia a vindeira candidatura de incorporación do Estado español á Comunidade dos Países de Lingua Portuguesa (CPLP), que suporá un recoñecemento histórico dos vínculos existentes e maior apertura cara á intensificación das relacións en ámbitos como os lingüísticos e culturais, económicos e sociais, concluíu.
Participaron, canda el, Juan González, presidente do Fondo Galego de Cooperación e Solidariedade e alcalde de Nigrán; Gumersindo Guinarte, concelleiro de Presidencia, Relacións Institucionais e Turismo do Concello de Santiago de Compostela, e Vítor Ramalho, secretario xeral de Unión de Cidades Capitais da Lingua Portuguesa.
Fondo Galego de Cooperación e Solidariedade
O Fondo Galego de Cooperación e Solidariedade é unha asociación sen ánimo de lucro, con personalidade xurídica propia e independente, que na actualidade agrupa 97 concellos e as Deputacións da Coruña, Lugo e Pontevedra, comprometidos coa idea de cooperar en Galicia para ser máis eficaces na colaboración con terceiros países. Persegue impulsar un maior compromiso de cooperación para o desenvolvemento das entidades locais, nun marco máis estable e permanente.
O Fondo constituíuse no ano 1997, produto da vontade integradora das políticas de cooperación para o desenvolvemento no ámbito da cooperación oficial descentralizada local. Desde o ano 2000, a Xunta de Galicia, a través da Vicepresidencia e Consellería de Presidencia, Administracións Públicas e Xustiza, asina anualmente un convenio de colaboración co Fondo para a realización de accións de fortalecemento da propia organización e accións de sensibilización e concienciación, co obxectivo final de fortalecer a solidariedade municipalista galega.
Nese obxectivo encádrase a organización do encontro que acolle a EGAP entre hoxe e mañá e que reúne representantes políticos de sete países de lingua oficial portuguesa, coa finalidade de achegarlles as súas realidades ás diversas autoridades locais galegas que participarán nel e, ao tempo, reflexionar sobre o relevante papel dos gobernos municipais na consecución dos Obxectivos de Desenvolvemento Sostible fixados pola ONU.
O presidente da Xunta, Alfonso Rueda, destacou que o Consello aprobou hoxe a Estratexia galega de Mobilidade, a folla de ruta a seguir ata 2050 para 'garantir uns desprazamentos máis sostibles, seguros e funcionais' que estará dotada de 420 millóns de euros para implantar 'un centenar de medidas'. A estratexia contén un plan de acción que implica as diferentes administracións públicas, a autonómica, a estatal e a local, para facilitar os desprazamentos das persoas e mercadorías, apoiar a competitividade do territorio e transformar os patróns de mobilidade. Preséntase como un instrumento para deseñar solucións que permitan transformar o actual modelo nun máis funcional, sustentable e seguro.
O presidente da Xunta, Alfonso Rueda, salientou hoxe que o Goberno galego xa adxudicou 985M de fondos do Mecanismo de recuperación e resiliencia (MRR) desde a posta en marcha do plan de recuperación. Así, o Executivo autonómico autorizou a publicación de convocatorias por importe de 1.097M e adxudicou o 90%, o que supón 'un grado de execución moi razoable', tal e como sinalou o titular da Administración. Segundo o informe analizado hoxe na reunión do Consello, na actualidade, a suma dos recursos do MRR asignados polo Goberno central á Administración galega ascenden a 1.545 M, o 5,8 % do distribuído entre as comunidades autónomas, o que supón menos recursos dos que corresponderían á comunidade por PIB per cápita.
