A Fundación Paideia promove as bandas emerxentes a través do concurso Sonidosmans
O concurso para músicos e bandas emerxentes SonidosMans acaba de abrir a convocatoria da súa terceira edición, organizada de novo pola Fundación Paideia Galiza coa colaboración da Consellería de Cultura e Turismo a través da Axencia Galega das Industrias Culturais (Agadic). O obxectivo é facilitarlles aos grupos e solistas que están a comezar a súa carreira unha plataforma de difusión do seu traballo.
Así, incluirase ós gañadores nos carteis de oito destacados festivais galegos e ofrecéndolles a oportunidade de gravar nos Estudios Mans da Coruña.
O concurso diríxese a artistas e bandas españolas que non teñan editado nin distribuído traballos de xeito comercial. Para participar, deberán presentar un tema orixinal e inédito en letra e música a través da web ata as 12,00 h. do vindeiro 1 de abril.
Entre os inscritos, un xurado formado pola manager Patricia Hermida e os xornalistas musicais Javier Becerra e Nonito Pereira seleccionará 50 semifinalistas, que pasarán á segunda fase do proceso. Esta desenvolverase entre o 16 e o 30 de abril e dela sairán, mediante votación popular, os 25 finalistas. Destes últimos, un xurado designado por cada un dos festivais colaboradores deste ano decidirá que agrupación formará parte dos seus respectivos carteis: O Son do Camiño (en Santiago de Compostela), PortAmérica (Caldas de Reis), Atlantic Fest (A Illa de Arousa), Sinsal SON Estrella Galicia (Vigo), SonRías Baixas (Bueu), Revenidas (Vilaxoán, en Vilagarcía de Arousa), 17º Ribeira Sacra (diferentes concellos da Ribeira Sacra) e Festival de la Luz (Boimorto).
Esta iniciativa, enfocada a poñer en valor e a darlle visibilidade ao talento da mocidade emprendedora no sector musical, enmárcase na liña de colaboración no eido da promoción musical que a Agadic mantén nos últimos anos coa Fundación Paideia Galiza.
Neste sentido, desenvolven tamén unha nova edición das súas xornadas sobre industria musical, que se veñen celebrando desde finais de xaneiro arredor da fotografía, o turismo e a innovación na música en directo. A terceira e última destas sesións terá lugar o vindeiro 28 de marzo na sede da Fundación Paideia na Coruña coa innovación como tema central.
Fundación Paideia, 2019-03-13
Actualidad
A primavera comeza este mércores 20 de marzo, ás 4 horas e 6 minutos e prolongarase durante case 93 dias ata as 22 horas e 51 minutos do 20 de xuño. Durante a primavera haberá ao amencer unha curiosa aliñación planetaria de Venus, Marte e Saturno; na segunda quincena de abril agregarase Mercurio e xa a finais de maio, Xúpiter substituirá a Venus, mentres a Lúa vai ir pasando por esa aliñación a comezos de cada mes, segundo explica o coordinador de investigación do Observatorio Astronómico da USC, José Ángel Docobo. O inicio da primavera prodúcese cando o Sol pasa polo punto Aries, ou equinoccio de marzo, un dos dous puntos de corte da eclíptica co ecuador celeste; nestes dias, na contorna do equinoccio, a duración do día e da noite son teoricamente iguais.
Presentouse o programa da décima edición de Escenas do cambio na Cidade da Cultura, unha cita que consolida a aposta por xerar espazos para o desenvolvemento da vangarda nas artes escénicas. Dirixido pola bailarina e coreógrafa Kirenia Martínez, este aniversario, que decorrerá entre os días 3 e 5 de maio, concíbese como unha celebración da traxectoria do festival e da súa capacidade transformadora. O director xeral de Cultura, Anxo M. Lorenzo, destacou na presentación o carácter rompedor e diverso do festival, no que o público poderá gozar de 13 propostas que desafían, nos seus procesos e resultados, os límites da creación artística.
Notas
Aínda que a pandemia orixinada polo SARS-CoV-2 ficou atrás, o seu eco persiste e aínda son moitas as incógnitas que a ciencia tenta despexar. Hoxe en día sábese que para moitos pacientes de COVID-19, o final da etapa aguda da infección é só o comezo doutra experiencia difícil: a post-COVID. Durante a denominada COVID persistente ou long COVID, estas persoas desenvolven unha amálgama de síntomas prolongados que poden incluír dificultade respiratoria, fatiga, tose ou perda de olfacto, entre outros.
A mostra está composta por nove paneis que recollen as obras de mulleres clave dos últimos dous séculos: Mary Shelley -con Frankestein ou o moderno Prometeo-, Harriet Beechet Stowe -con A cabana do Tío Tom-, Bertha Von Suttner -con Abaixo as armas-, Betty Friedan -con A mística da feminidade-, Clara Campoamor con O voto feminino e eu-, Harper Lee -con Matar a un reiseñor-, Rachel Carson -con Primavera silenciosa- e Hanna Arendt -con Eichmann en Xerusalén-.