Notas de prensa

As tecnoloxías da lingua, unha oportunidade para a sociedade galega

O secretario xeral de Política Lingüística, Valentín García, participou na apertura da xornada, lembrando “que unha lingua de presente e de futuro coma o galego ten que participar dos avances que se producen no terreo das tecnoloxías da fala para que unhas ferramentas pensadas para facilitar a inclusión e a comunicación non se convertan en ferramentas de exclusión”. Neste sentido, o secretario xeral avogou “por traballarmos sen descanso desde a Administración, desde o ámbito da investigación, desde as empresas... para producir recursos e aplicacións que reduzan a nada a fenda dixital”. Acompañaron o secretario xeral na presentación desta xornada Rosario Álvarez, presidenta do CCG, e Carmen García Mateo, coordinadora do encontro.

Transcrición voz-texto e procesamento da linguaxe natural

Os obxectivos da xornada As tecnoloxías da lingua, unha oportunidade para a sociedade galega son mostrar o estado da cuestión en dous aspectos relevantes das tecnoloxías lingüísticas: o campo da transcrición automática de voz a texto, como elemento fundamental para mellorar a accesibilidade das persoas con discapacidade auditiva aos contidos audiovisuais, e o campo da tecnoloxía do procesamento de linguaxe natural como axente facilitador de medios en galego.

Os temas abordados foron “Accesibilidade” (coa intervención de Lourdes Lorenzo, do Departamento de Tradución e Lingüística da Universidade de Vigo, e de Francisco Armero Real, director da Área de Accesibilidade de TVE) e “Estado da tecnoloxía de subtitulado”, coas análises de Belén Ruiz Mezcúa, directora do Centro Español del Subtitulado y la Audiodescripción, Pablo Romero-Fresco, director do observatorio galego de accesibilidade aos medios GALMA, e Artantza del Pozo, directora do Departamento de Tecnologías del Habla y del Lenguaje Natural de Vicomtech. Na segunda parte da xornada, foi a quenda de José Ramón Pichel, de Imaxín Software, que falou de “As tecnoloxías da linguaxe como facilitadoras de medios en galego”; de Pedro J. Moreno, de Google Research, que se referirá ao “Desenvolvemento de sistemas de recoñecemento de fala multilingües”, explicando “por que Google desenvolve tecnoloxía en galego”; e de Carmen García Mateo, directora do Grupo de Tecnoloxías Multimedia da Universidade de Vigo, quen presentou unha “Panorámica de ferramentas e corpora de tecnoloxía de fala en galego” e fixo unha reflexión sobre futuras liñas a seguir.