jueves, 23 de abril de 2026
O director xeral de Cultura, Anxo M. Lorenzo, inaugurou hoxe a Feira do Libro de Ferrol, a primeira das citas do circuíto que a Xunta de Galicia impulsa en colaboración coa Federación de Librarías de Galicia e que percorrerá 13 cidades e vilas ata finais do mes de agosto.
É innnegable o bo momento que está a vivir a cultura galega coa consolidación dunha Galicia cada vez máis lectora, destacou Anxo M. Lorenzo, antes de precisar que un 96,5% de persoas le de xeito frecuente, o que supón case dous puntos máis que a media estatal. Nesta liña, o director xeral de Cultura, resaltou o número de persoas que le ocasionalmente ou habitualmente na nosa lingua medrou en case nove puntos ata acadar o 72%.
Por outra banda, o representante da Consellería de Cultura, Lingua e Xuventude destacou o papel das feiras do libro como escaparates dos nosos profesionais e unha oportunidade única para abrir a porta, tal e como indica o lema deste ano, a universos infinitos. Aproveitou así para facer un chamamento á cidadanía a achegarse estes días á praza da Constitución, participar nas actividades e descubrir a oferta que traen os libreiros.
A Feira do Libro de Ferrol estará aberta en horario de 11,00 a 14,00 e de 17,00 a 21,00 horas, excepto o domingo que pechará ás 20,00 horas, cunha programación que se iniciou hoxe coa lectura do pregón a cargo da docente e escritora, Cristina Otero. Entre as propostas inclúense obradoiros, presentacións, sesións de teatro infantís, mesas redondas, un contacontos musical e sinaturas de libros nas que participarán máis de 25 escritores e escritoras.
13 vilas e cidades de abril ata agosto
Ferrol é a primeira das 13 citas co libro e a lectura que terán os galegos e galegas en diferentes vilas e cidades das catro provincias. Tras esta cidade, recollerá o relevo Santiago de Compostela, do 2 ao 10 de maio; Lugo, do 13 ao 17 de maio; O Porriño, do 14 ao 17 de maio; Redondela, do 11 ao 14 de xuño, e Ourense, do 17 ao 20 de xuño.
Xa no mes de xullo, Vigo abrirá o día 1, prolongándose ata o día 7, continuando en Ponteareas, desde o día 9 ata o 12, e en Rianxo do 23 ao 26. Finalmente, en agosto, as Feiras do Libro viaxarán ata A Coruña, do 1 día ata o 10; Viveiro, do día 13 ao 19; Foz do 20 ao 23, e rematarán en Monforte de Lemos, onde se celebrará do día 26 ao 29 de agosto.
O apoio a esta iniciativa encádrase no compromiso da Consellería de Cultura, Lingua e Xuventude co sector do libro e o fomento do hábito lector. Así, ademais do apoio ao circuíto impulsado coa Federación da Librarías de Galicia, a Xunta inviste máis de 3 millóns de euros en convocatorias para promocionar este eido con medidas de impulso á promoción, produción e edición do libro en galego, o avance nas accións previstas no Plan de dinamización da Lectura Galega ou a consolidación do servizo móbil A Furgoteca.
O festival Play-Doc desenvolverá do 29 de abril ao 3 de maio en Tui a súa 22ª edición para conectar memoria, creación actual e futuro do cinema galego e internacional. No ámbito galego, a programación desta edición volve ocupar un lugar central cunha Competición Galicia que reúne títulos de Xiana do Teixeiro, Roi Fernández, Xacio Baño, Adrián Canoura, Cristina Souto, Hugo Amoedo, Bea Lema, Berio Molina e Chloé Lecci López, entre outras voces. O festival mantén, ademais, a sección Sombras, dedicada nesta ocasión á recuperación da figura de Rafael Luca de Tena, e unha nova edición de Coming Soon, espazo no que se presentarán proxectos galegos en desenvolvemento. O Play-Doc continúa a reforzar a súa función de escaparate e plataforma de difusión para a produción audiovisual do país e como punto de encontro para novas obras e profesionais.
O número de persoas en Galicia que le ocasional ou habitualmente na nosa lingua medra en case nove puntos ata acadar o 72 %, isto é, sete de cada dez galegos. Ademais deste incremento do 13 por cento na lectura ocasional ou habitualmente en galego con respecto ao ano anterior, o estudo de 2025 tamén revela a consolidación dunha Galicia lectora, reflectida no sindicadores que sinalan que o 96,5 % da poboación maior de 14 anos le en calquera medio e soporte, o que sitúa a nosa Comunidade nun 1,4% por enriba da media de España. Ademais, o 70 % destas lecturas son de libros.
