As II Xornadas Internacionais Educación, Xénero e Igualdade debaten Políticas públicas e violencia contra as mulleres
As políticas públicas e a violencia contra as mulleres centran este martes a temática das xornadas de Formación, educación, xénero e igualdade promovidas polo Centro Interdisciplinario de Investigacións Feministas e de Estudos de Xénero (Cifex) da USC e que se desenvolven na Facultade de Ciencias da Educación da USC (Campus Vida).
O programa, xa na súa décima edición, dá continuidade á actividade de formación e divulgación promovida desde hai máis de tres lustros polo Cifex da USC, segundo indica a directora deste centro de investigación da USC, Rita Radl.
Nesta ocasión, o debate está focalizado en aspectos significativos das políticas públicas en relación coa problemática da violencia contra as mulleres. O programa das xornadas afonda así na cuestión da prostitución como forma de violencia, se cabe extrema contra as mulleres, ao tempo que aborda as medidas e políticas no ámbito da Universidade referente á temática da violencia e ao acoso en función do xénero.
A dimensión educativa constitúe outros dos aspectos a salientar destas xornadas, cuxos promotores pretenden tamén favorecer o debate e a toma de conciencia para avanzar tanto no coñecemento como na modificación da práctica social, a fin de solucionar a problemática da violencia de xénero, unha realidade lamentablemente relacionada coa dinámica das sociedades actuais.
Programa
A vicerreitora de Comunicación, Cultura e Servizos da USC, Mar Lorenzo Moledo, presidiu a sesión inaugural na Facultade de Ciencias da Educación da USC, no marco dun acto no que tamén interviñerán a concelleira de Igualdade do Concello de Santiago, Marta Lois González; a decana da Facultade de Ciencias da Educación, Carmen Fernández Morante; e a propia Rita Radl, en calidade de directora do Cifex.
A profesora de Socioloxía e directora da Unidade de Igualdade da Universidade de Vigo, Agueda Gómez Suárez, abriu a quenda de intervencións co relatorio Prostitución e gramática sexual do putero no noso tempo. Deseguido, a propia Gómez Suárez participa xunto coas responsables das oficinas de Igualdade de Xénero da USC e da UDC, Eva Aguayo e Ana Jesús López Díaz, respectivamente, nunha mesa de debate sobre medidas políticas no seo da universidade referidas a violencia e acoso en función de xénero.
O programa das xornadas continua en quenda de tarde cunha mesa de debate sobre as múltiples formas de violencia contra as mulleres e o valor preventivo da educación. A profesora da USC Begoña Gómez Vázquez modera este coloquio, no que interveñen como relatores o vicepresidente da Cátedra de Estudos de Xénero do Instituto Superior Mineiro Metalúrxico de Moa (ISMM), en Cuba, Víctor Hugo Pérez; a profesora da UDC Rosa Caramés, e Lourdes Pazo, en representación do programa Vagalume.
Universidade de Santiago de Compostela, 2018-10-03
Actualidad
O equipo, eminentemente galego e cunha moi alta porcentaxe feminina, está a filmar en distintas localizacións das provincias da Coruña e Lugo, a través das que se reconstrúe o nacemento e a evolución da mítica fábrica de cerámica, que se deu en chamar a Bauhaus galega polas cores, formas e deseños vangardistas das súas creacións. Ao tempo, contarase tamén a historia de Galicia a través do seu deseño, cos seus elementos diferenciais e de calidade no centro do discurso. Outros dos escenarios polos que discorrerá Hoxe e o resto do mundo son Cervo (Lugo), onde comeza esta historia a primeiros do século XIX, Sada (A Coruña) e Santiago de Compostela, ademais doutros espazos da cidade herculina.
O CDG celebra os 40 anos da súa fundación desenvolvendo unha intensa programación que estende a súa actividade á produción e participación en 15 espectáculos e proxectos escénicos, a máis de 100 concellos de toda a Comunidade e á colaboración con entidades dunha decena de países en Europa e América. En palabras de Román Rodríguez, conselleiro de Cultura, a unidade teatral continuará avanzando nunhas liñas mestras que, desde o respecto ao pasado, poñen o foco en novas vías de encontro coa cidadanía, na accesibilidade, na proxección exterior ou na creación galega.
Notas
A Facultade de Química será entre os días 3 e 6 de setembro a sede do XI Congreso Internacional de Nanociencia e Nanotecnoloxía Analítica (XI NyNA 2024). O encontro está organizado polo grupo de investigación de Elementos Traza, Espectroscopía e Especiación (GETEE) e o Instituto de Materiais (iMATUS) da USC coa colaboración do Grupo Especializado en Ciencia e Tecnoloxías (Bio) Analíticas da Real Sociedade Española de Química (RSEQ).
Os vindeiros 9, 10 e 11 de abril celébrase na Universidade da Coruña o primeiro congreso IA & Hospitality, un espazo onde se analizará a relación presente e futura entre a Intelixencia Artificial e o turismo, un dos principais motores económicos do noso país. O programa do congreso, que terá lugar no Paraninfo da UDC, inclúe oito mesas de debate nas que se tratará dende a experiencia do cliente ata a ciberseguridade e os destinos e a IA.