jueves, 5 de noviembre de 2026
O secretario xeral do PSdeG, Gonzalo Caballero, protagonizou un almorzo informativo organizado por Nueva Economía Fórum, un escenario dende o cal amosou a súa preocupación pola situación que atravesa Galicia e apelou a traballar para reverter esta situación.
Nesa tarefa, o líder dos socialistas galegos explicou que o PSdeG ten iniciado un tempo novo da man de novos referentes e coa incorporación dunha nova xeración, que é a súa, co reto por diante de convencer á sociedade galega de que Galicia precisa un cambio.
Como loitador polo que cre, considerando a súa traxectoria como afiliado de base, incidiu na idea de que o socialismo reformista que el encabeza ten a misión de catalizar a modernización de Galicia.
Pola súa banda, Gonzalo Caballero garantiu todo o seu traballo e esforzo nesa liña e mantivo que el é un instrumento ao servizo do seu partido, despois de reivindicar a política como servizo público e de explicar que el compatibiliza a súa tarefa profesional co seu compromiso político.
Cando aínda non transcorreron 100 días dende o congreso no que foi ratificado como líder dos socialistas galegos, avanzou a próxima creación dunha fundación coa que o PSdeG porá as mellores ideas ao servizo do país, para reverter a situación dunha Galicia que dixo- vai a peor. E preocúpanos, afondou.
Gonzalo Caballero observou que o goberno autonómico carece de rumbo e de estratexia política ou económica e, fronte a iso, situou entre as súas prioridades que a recuperación económica chegue á cidadanía.
E, tras constatar que Galicia ten perdido peso político no mapa estatal, advertiu de que non podemos permitir que as eivas do Estado das Autonomías deriven nunha tendencia recentralizadora. Galicia, proseguiu, necesita do seu autogoberno para dar calidade de vida á cidadanía dun xeito solidario e leal.
O secretario xeral, que foi presentado polo alcalde de Vigo como un gran político, fiou un discurso galeguista, comprometido coa terra pero aberto á complexidade do mundo, internacionalista no que atinxe a calquera dificultade ou inxustiza, ecoloxista e feminista.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
