viernes, 6 de noviembre de 2026
O director xeral do Igape, Juan Cividanes, salientou en San Petersburgo (Rusia) a innovación e o saber facer do naval galego, un sector que conta con potencial e capacidade técnica para asumir novas alianzas e atender novos encargos.
Cividanes, que presidiu a delegación de empresarios galegos que foi recibida por autoridades do goberno rexional, destacou que Galicia está a recuperar o liderado do sector naval en España, grazas á ambición e ao traballo de estaleiros e empresas auxiliares para seren máis competitivos, contando para iso co apoio continuado da Xunta.
A construción naval en Galicia segue a reforzarse con novos contratos, o 47% dos conseguidos por España no primeiro semestre de 2017, ao tempo que abre novas oportunidades en ámbitos como o pesqueiro, a enerxía eólica ou os cruceiros.
Un total de trece empresas galegas vinculadas ao sector naval buscan desde hoxe novas oportunidades de negocio e alianza no mercado ruso, mediante unha misión empresarial organizada por Aclunaga e a Cámara de Comercio da Coruña, ao abeiro do plan Foexga financiado pola Xunta. Participan ata o xoves en San Petersburgo na feira internacional Neva, especializada na construción naval e a navegación. Os empresarios galegos do sector buscan consolidar, con encontros empresariais e visitas a estaleiros locais, as relacións que algunhas empresas do naval manteñen en Rusia, ao tempo que agardan abrir, como froito dos contactos no marco da Feira Neva, novas vías de negocio neste sector.
Juan Cividanes destacou que o pasado ano 130 empresas galegas exportaron a Rusia mercadorías por máis de 111 millóns de euros, un 5,48% máis que no ano anterior, e que as exportacións galegas a ese mercado seguen a medrar durante este ano. O director do Igape salientou que incrementar as exportacións galegas cara a Rusia é un dos obxectivos desta misión, ao tempo que lembrou a disposición de Galicia para acoller investimentos innovadores que completen as cadeas de valor nos sectores estratéxicos da economía galega.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
