miércoles, 14 de mayo de 2025
A Consellería de Cultura, Educación e Ordenación Universitaria -a través das secretarías xerais de Política Lingüística e de Cultura e mais da Axencia Galega das Industrias Culturais (Agadic)- pon en marcha a segunda edición do programa Redecinema, que -tras difundir por toda Galicia o filme Vilamor na súa primeira edición- levará a 16 concellos da Rede de Dinamización Lingüística as (co)producións galegas Maimiño, A praia dos afogados e 9 ondas en formato de cinema de verán.
O secretario xeral de Política Lingüística, Valentín García, foi o encargado de presentar en rolda de prensa un programa de dinamización lingüística que desenvolve os obxectivos do Plan xeral de normalización da lingua centrados na promoción da creatividade con base en galego e no aumento da oferta de produtos de cultura e de ocio no idioma propio de Galicia, precisamente nunhas datas en que moita xente goza duns días de vacacións e precisamente en Sanxenxo, un dos centros turísticos estivais máis relevantes da nosa comunidade.
A canda o secretario xeral, participou na rolda de presentación Paz Lago, concelleira de Educación, Cultura e Mocidade de Sanxenxo, onde se abrirá o venres 21 de xullo ás 22:30 horas esta segunda edición de Redecinema coa proxección do filme Maimiño na praza dos Barcos do Concello de Sanxenxo.
16 localidades en xullo e agosto
Abegondo, Boimorto, Boiro, Noia e Vedra na provincia da Coruña; Foz, Mondoñedo e Taboada en Lugo; Celanova, O Carballiño e O Pereiro de Aguiar en Ourense e mais A Cañiza, Marín, Pontecesures, Sanxenxo e Soutomaior en Pontevedra son as 16 localidades da Rede de Dinamización Lingüística onde se celebrarán na segunda quincena de xullo e ao longo de todo agosto as proxeccións ao aire libre dos mencionados filmes galegos. O calendario do programa poderá verse no Portal da Lingua Galega (www.lingua.gal/redecinema) e na Axenda de Cultura de Galicia (www.cultura.gal/axenda).
Verán en galego
De acordo co Plan xeral de normalización da lingua galega, o programa de dinamización lingüística Redecinema persegue promover o uso do galego nas actividades lúdicas e de lecer; visibilizar a acción dinamizadora en lugares abertos e públicos; potenciar creadores e dinamizadores galegos e favorecer a incorporación da nosa lingua á programación das actividades para o verán realizadas polos concellos, ademais de apoiar e promover a industria cultural, nomeadamente a audiovisual galega e en galego.
Rede de Dinamización Lingüística
Os destinatarios do programa Redecinema, que a Consellería de Cultura e Educación desenvolve a través da AGADIC e das secretarías xerais de Política Lingüística e de Cultura, son os concellos pertencentes á Rede de Dinamización Lingüística (RDL). A RDL é unha iniciativa da Xunta de Galicia que busca a asociación voluntaria de entidades con competencia na promoción e no uso da lingua galega no ámbito local para impulsar e reforzar as iniciativas de difusión do galego. Os seus principais obxectivos son os de promover a cooperación e a coordinación das actuacións en materia de dinamización lingüística e de optimizar os recursos dispoñibles para levala adiante.
A cidade da Coruña acolle do 16 ao 24 de maio o Galicia Design Week, festival dedicado ao deseño e de referencia neste ámbito para todo o noroeste peninsular, que desenvolve a súa sexta edición para promover e difundir a creación galega e internacional do sector. O encontro, codirixido por Marta González Rivas e Álex Rico Caramés, e que forma parte da prestixiosa organización World Design Weeks, ofrece unha ampla programación con acceso gratuíto a un total de 21 actividades. Coloquios, exposicións, sesións musicais e gastronomía conforman unha proposta na que o obxectivo é poñer en valor un eido creativo de gran potencial e transversalidade, entre a creación cultural e a produción industrial.
As 105.378 doazóns de sangue do ano pasado supoñen 1.853 máis que no 2023, representando un incremento de preto dun 2 %. O incremento producido nas doazóns de sangue permite elevar un punto máis a taxa global galega, pasando de 38 a 39 doazóns por cada 1.000 habitantes e ano, situando á nosa comunidade entre as que contan cun nivel máis alto de participación en todo o Estado, manténdose ao redor dos tres puntos por riba da media nacional. Outro dato moi positivo é o feito de que o pasado ano 8.931 persoas doaron sangue por primeira vez.
