viernes, 18 de julio de 2025
O presidente da Xunta de Galicia, Alberto Núñez Feijóo, trasladoulle ao ministro de Educación, Cultura e Deporte o apoio e o espírito construtivo da Comunidade para propoñer, acordar e alcanzar un pacto nacional pola educación que perdure durante varias décadas, baseado na calidade e cunha relación máis directa co marco laboral.
Durante a reunión mantida con Íñigo Méndez de Vigo, Feijóo incidiu na importancia deste pacto para facer unha educación baseada na calidade e sinalou os principios que, na súa opinión, deberían inspiralo. Algúns deles, recordou, xa se están desenvolvendo no sistema educativo galego como: o fomento da implantación do plurilingüismo, a dixitalización das aulas, un maior protagonismo da formación profesional, a especialización das universidades e dos campos universitarios, e un esforzo por homoxeneizar as titulacións e por racionalizar os másters.
En definitiva, unha educación baseada na calidade, na coordinación, en estudos que sexan interesantes para a actividade laboral, onde o peso da FP sexa moi importante e onde a formación dos profesores, a súa autoridade e o compromiso das familias no contorno educativo sexan os tres piares básicos, precisou.
Para conseguir este obxectivo, Feijóo apostou por cambiar a metodoloxía de traballo, porque o importante, asegurou, non é empezar a derrogar para facer cousas nas cales aínda non se construíu o acordo senón conservar os piares básicos primeiro e despois analizar os efectos na lexislación vixente.
Consciente da complexidade da tarefa, o titular da Xunta afirmou que Galicia participará de forma activa, dando a súa opinión e facendo propostas.
Plan de actuación conxunto para rehabilitar os BIC do Camiño de Santiago
En relación ao ámbito cultural, a preparación do Ano Santo 2021 ocupou boa parte da reunión, e tanto o ministro como o presidente do Goberno galego coincidiron na necesidade de abordar un plan de actuación conxunto centrado en impulsar a rehabilitación dos bens de interese cultural ao longo do Camiño de Santiago.
Feijóo destacou que esa colaboración para a rehabilitación dos bens de interese cultural ligados ás rutas de peregrinación se concretará ao longo das próximas datas, co obxectivo de valorar que monumentos se deben priorizar e co obxectivo final de facer un Camiño aínda máis atractivo para os visitantes.
O presidente da Xunta concluíu poñendo en valor o esforzo do Goberno central e do Executivo galego para levar a cabo a rehabilitación total da Catedral de Santiago, para que no ano 2021 sexa a mellor catedral de todos os anos santos celebrados ata agora.
O 112 Galicia rexistra os seus picos de emerxencia durante as tardes e noites de verán. Os meses estivais traen consigo un cambio nos hábitos da poboación galega: días máis longos, noites máis activas e un aumento significativo das incidencias xestionadas polo 112. Segundo os datos, as franxas horarias con maior demanda son as 15:00 e as 20:00 horas, coincidindo cun estilo de vida máis intenso e prolongado durante o verán. En 2023, o servizo rexistrou medias de 1.300 intervencións entre as 15:00 e as 16:00 horas, e case 1.500 (1.484) entre as 19:00 e as 20:00 horas durante xuño, xullo e agosto. Aínda que en 2024 houbo un descenso global de incidencias (233.289 anuais), estas franxas mantiveron cifras elevadas: máis de 1.000 chamadas á tarde e 1.200 á noite no mesmo período.
O Goberno galego incrementará o orzamento destinado á formación do persoal dos servizos de prevención de incendios forestais ata os 1,8 millóns de euros no bienio 2025-2026, o que supón un 19% máis que no período anterior. Esta medida enmárcase no Plan de Prevención e Defensa contra os Incendios Forestais de Galicia (Pladiga), cuxo obxectivo é minimizar o impacto ecolóxico, económico e social dos lumes, optimizando os recursos dispoñibles. O compromiso formativo da Consellería do Medio Rural xa se reflectiu en 2024, cando se impartiron 473 cursos con 11.447 participantes e máis de 108.000 horas de adestramento.
