Notas de prensa

O Colexio de Xornalistas e Política Lingüística presentan o web Manuel María xornalista

O decano do Colexio Profesional de Xornalistas de Galicia (CPXG), Xosé Manuel Pereiro, e o secretario xeral de Política Lingüística, Valentín García Gómez, presentaron o web 'Manuel María Xornalista', elaborado polo Colexio en colaboración coa Secretaría e coa Casa-Museo Manuel María. A súa realización foi encargada polo CPXG ao xornalista e colexiado Antón Lopo. Ao acto acudiu tamén o presidente da Real Academia Galega, Xesús Alonso Montero.

García Gómez destacou o valor do novo web para mostrar un Manuel María completamente dono da palabra, “da palabra non só poética, non só literaria, senón da palabra no máis amplo dos sentidos”. Polo que se refire a Manuel María, incidiu en que o seu amor profundo pola lingua galega tamén se viu na súa práctica periodística, pois “escribiu en galego sempre que as circunstancias llo permitiron: en democracia e durante o franquismo, cando publicaba fóra de España”.

Xosé Manuel Pereiro, decano do CPXG, tivo un especial recordo para Manuel María. “Na librería que rexentaban el e Saleta en Monforte adquirín os primeiros libros en galego”, sinalou. Sobre o web, Pereiro dixo que “pretendemos que manuelmaria.xornalistas.gal sexa tanto un escaparate do Manuel como unha ferramenta para os periodistas. Por un lado, un feixe de recursos documentais, escritos e gráficos, máis amplo que unha nota ou un resumo de axencia, do que botar man á hora de facer unha información sobre a súa persoa e obra. Hai datos que aporta Antón Lopo, non moi sabidos, como que foi dar a Monforte e foi procurador e non a Vigo e ser xornalista, porque tería que sacar o carné do Movimiento. Por outro lado, unha especie de axenda de construción diaria dos actos que se fan na súa homenaxe”.

Utilidades de manuelmaria.xornalistas.gal

O web 'Manuel María xornalista' recolle unha parte dos artigos do autor da Terra Chá e ofrece unha visión global da súa biografía, con especial atención á súa vida como xornalista. Esta visión compleméntase cunha galería de imaxes recollida do arquivo da Casa-Museo Manuel María, cunha lista dos webs máis salientables relacionados co escritor e cun espazo dedicado á actualidade relacionada coa súa escolla como autor das Letras neste 2016.

Especial importancia ten a sección “Unidade didáctica”, creada especialmente para os escolares, co obxectivo de que valoren e singularicen a actividade xornalística de Manuel María no conxunto da súa obra e mais de que se familiaricen cos xéneros xornalísticos e coa organización dun periódico.

O web conta tamén coa sección “Xornalismo nas letras”, que se ocupa dos homenaxeados no Día das Letras Galegas que tiveron unha relación estreita co mundo do xornalismo.

Manuel María xornalista

O web que se presentou esta mañá pon o foco nunha faceta diferente do autor que será homenaxeado o próximo 17 de maio. A súa vocación de xornalista levou a Manuel María a escribir en prensa ao longo de 55 anos, combinando este labor con traballos na radio. Os seus artigos non só apareceron na maioría das cabeceiras galegas (El Progreso, El Pueblo Gallego, La Noche, La Región, La Voz de Galicia, El Ideal Gallego ou Vida Gallega), senón tamén nas españolas (ABC) e en numerosas publicacións americanas. A súa relación coa prensa escrita foi especialmente intensa a partir dos anos setenta, en que se funda A Nosa Terra, onde colaborou de 1977 a 1988. A maior parte dos seus artigos concéntranse neste semanario e mais no xornal El Correo Gallego, ao que estivo vinculado dende 1989 ata o mesmo día da súa morte.

Esta web foi encargada polo Colexio Profesional de Xornalistas de Galicia ao xornalista e colexiado Antón Lopo. Como periodista, Antón Lopo (Monforte de Lemos, 1961), dirixiu os suplementos Revista das Letras (1991-2011) e Chineses, ademais de coordinar as seccións de cultura dos xornais El Correo Gallego e Galicia Hoxe, traballos polos que recibiu o Premio Galicia de Comunicación, a da Irmandade do Libro á difusión cultural e o da Asociación de Escritores á traxectoria profesional. Actualmente colabora co suplemento Faro das Letras de Faro de Vigo e co semanario Sermos Galiza ('Extintintivos'), polas que este ano recibiu o premio Xohán Carballeira de Periodismo. Como poeta escribiu Sucios e desexados, libro ao que seguiron, entre outros, Manual de masoquistas (1991), Om (1997), Pronomes (1998), Fálame (2004) ou Libro dos amados (2005). Nos útimo anos, indagou na oralidade e na poesía física con ‘Prestidixitador’ (Teatro Galan, Compostela, 2001), ‘Accións’ (Galería Trinta, Compostela, 2003), ‘Dentro’ (Casa da Parra, Compostela, 2005) e ‘Lampíricos’ (Galeria Dispara, A Estrada, 2013). Na novela, publicou As reliquias (1991), Ganga (2001) ou Obediencia (2010), premio Garcia Barros. También cultivou o ensaio, a tradución (Óscar Wilde, Rimbaud, Vikram Seth…) e a biografía, xénero ao que lle dedicou a fotobiografía de Bouza Brey (así como o documental O faro que perdeu a gracia da luz) ou as propostas noveladas As tres mortes de Lorenzo Varela, A distancia do lobo de Uxío Novoneyra e A palabra exacta de Lois Pereiro. A peza dramática ‘Os homes só contan até tres’ valeulle o Premio Cunqueiro de teatro, ámbito ao que lle dedicou un amplo espazo na súa obra.