sábado, 8 de agosto de 2026
Un total de 14 empresas integran a misión comercial galega no mercado internacional MIPTV de Cannes, coordinada pola Consellería de Cultura, Educación e Ordenación Universitaria a través da Axencia Galega das Industrias Culturais (Agadic) e co apoio do Instituto Galego de Promoción Económica (Igape). O noso audiovisual amplía así a presenza que vén mantendo nos últimos anos na meirande feira mundial para a comercialización de todo tipo de formatos, programas e contidos para televisión, motivo polo que este encontro é unha das principais citas do programa de internacionalización promovido pola Xunta baixo a marca Films from Galicia.
Os representantes de Artefacto Producciones, Ficción Producciones, Filmanova Invest, International Audiovisual Communication, Intuitive Productions, Matriuska Producciones, Maruxiña Films, Obradoiro Cab Sad, Portocabo, Somadrome, Tree Line Distribution, Vía Láctea Filmes, Voz Audiovisual e Zenit TV desprazáronse a Cannes, onde desde hoxe e ata o vindeiro día 7 buscarán socios e compradores internacionais tanto para os seus novos proxectos como para os produtos xa en fase comercial. Ao mercado asiste, así mesmo, unha delegación de Televisión de Galicia.
A día de hoxe, estas compañías xa teñen concertadas unha media de 18 reunións coa mirada posta fundamentalmente no mercado europeo (Alemaña, Austria, Bélxica, Finlandia, Francia, Holanda, Italia, Reino Unido, República Checa, Suecia e Ucraína) e americano (Arxentina, Brasil, Chile, Colombia, Cuba, Estados Unidos e México), pero tamén no asiático a través de xuntanzas con axentes de China e Hong Kong.
Films from Galicia
Como en anos anteriores, o punto de encontro desta misión institucional e empresarial é o espazo da marca Films from Galicia dentro do pavillón español, organizado polo Instituto de Comercio Español (ICEX) en coordinación cunha trintena de empresas e entidades de ámbito autonómico e estatal. Para a organización da delegación galega a Agadic contou, ademais, coa colaboración da Asociación Galega de Produtoras Independentes (Agapi) e do Clúster Audiovisual Galego (Clag).
Baixo esta mesma marca, dedicada á promoción internacional do audiovisual de produción galega, a Agadic está a distribuír a nova edición do seu catálogo de produtos cinematográficos e televisivos, que no apartado TV from Galicia recolle moitos dos títulos desenvolvidos polas empresas da delegación galega: Códice e Hospital Real, de Ficción Producciones; The Avatars, Luci, Os fillos do sol e Hierro, de Portocoabo; Urxencia Cero, Serramoura e Padre Casares, de Voz Audiovisual; e A vida é doce e Casamos, de Zenit Televisión.
Vendas internacionais
Ademais, xunto coas vendas internacionais de Hospital Real e Códice, Ficción Producciones promoverá no mercado francés tres novos proxectos: a serie de animación TUTU, o filme de animación coproducido con México Día de muertos e unha coprodución europea para unha serie de tv.
Así mesmo, Artefacto chega cun novo proxecto de animación baixo o título Renata The Spider, ao tempo que ten previsto desenvolver a última fase de comercialización internacional de O apóstolo, mentres que Intuitive Productions centrarase na comercialización de diferentes documentais: os proxectos On the Edge of the Mind e ExoMars: Searching for Life on the Red Planet; a serie Life in Outer Space, actualmente en fase de posprodución; e catro títulos xa rematados (The Climate Blueprint, Red Ice, Pluto e Is Anybody Out There?).
O xénero documental centrará tamén o traballo de Obradoiro Cab Sad no MIPTV, onde presenta El Camino acaba en el Obradoiro. Ademais, Filmanova intentará buscar cofinanciadores para varios dos seus proxectos; e Vía Láctea Filmes, ampliar as vendas internacionais de A Esmorga.
En canto a Matriuska Producciones, que se atopa tamén na última fase de vendas internacionais do filme As altas presións, traballará na procura de socios e distribución para un novo proxecto televisivo e para a longametraxe A estación violenta, xa en fase de produción.
A do MIPTV en Cannes é unha das máis importantes citas internacionais do sector cara á produción e comercialización de todo tipo de formatos, programas e contidos para televisión. O evento reúne cada ano uns 11.000 profesionais dun centenar de países, entre os que preto de 4.000 rexístranse como compradores.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
