domingo, 14 de junio de 2026
O Centro Galego de Artes da Imaxe (CGAI-Filmoteca de Galicia) inicia a súa programación de 2016 retomando na súa sede da Coruña o ciclo dedicado ás comedias dos estudios londinienses Ealing, do que xa ofrecera unha primeira entrega a finais de 2015. Neste caso, a carteleira reúne catro clásicos filmados por Robert Hamer, Henry Cornelius e Charles Chrichton entre 1949 e 1953.
Esta segunda parte das Comedias Ealing arrancará o xoves 7 con Ocho sentencias de muerte, de Robert Hamer, á que seguirán Pasaporte a Pilmlico, de Henry Cornelius, o venres 8; e Oro en barras e Los apuros de un pequeño tren, ambas de Charles Chrichton, que se exhibirán o martes 12 e o mércores 13, respectivamente. Nos catro casos, trátase de sesións dobres con pases ás 18.00 e as 20.30 horas.
Off Galicia
No inicio desta nova programación regresan, ademais, os sábados Off Galicia, centrados na produción audiovisual galega e para os que se conta con presentacións a cargo dos directores programados. As próximas citas desta sección son as proxeccións de O descubrimento de Américo e Decalcomanía, de Miguel Mariño (9 de xaneiro); Rancor, de Miguel Morales e A liña política, de Santos Díaz (16 de xaneiro); El secreto del bosque, de Antonio Grunfeld Rius (30 de xaneiro); Os días afogados, de César Souto Vilanova e Luis Avilés Baquero (13 de febreiro); e Na outra beira das augas grandes, de Xavier P. do Campo (20 de febreiro).
Ademais, os días 19 e 20 de xaneiro, o Centro Galego de Artes da Imaxe achegaralle aos espectadores a práctica totalidade da obra de Sergio Oksman, cineasta de orixe brasileira establecido desde hai anos en España. Xunto co seu filme O futebol, de actualidade pola súa gran repercusión no circuíto internacional de festivais, exhibiranse Notes on the Other, A Story for the Modlins, A esteticista e Goodbye America.
Nesta nova temporada, o CGAI tamén lle dedicará cadanseu ciclo ao cinema español máis independente e á vangarda experimental norteamericana. Baixo o epígrafe Cine español: banda aparte, reúnense títulos que, na meirande parte dos casos, foron realizados nas marxes da industria e cuxa principal canle de difusión son os festivais e as salas alternativas: La señora Brackets, la niñera, el nieto bastardo y Emma Suárez (22 de xaneiro), El apóstata (26 de xaneiro), Sueñan los androides (2 de febreiro), No todo es vigilia (16 de febreiro) e Un día perfecto para volar (23 de febreiro).
Obras mestras da vangarda estadounidense
Pola súa banda, Ollos ávidos. Obras mestras do cine de vangarda norteamericano desenvolverase os xoves de febreiro para ofrecerlle ao público galego unha antoloxía comisariada polo investigador Bruce Posner e que chega á Coruña en colaboración co Museo Nacional Centro de Arte Reina Sofía. Trátase dunha escolma de 37 filmes recentemente restaurados que introducen as múltiples traxectorias deseñadas polo cine de vangarda nos Estados Unidos desde os anos vinte aos setenta do pasado século.
Outra das novidades desta nova programación é a estrea da nova sección Contextos, que porá en relación significativas fitas actuais con outros títulos contemporáneos ou clásicos. O programa botará a andar a finais de xaneiro con dúas das máis destacadas estreas de 2015: The Assassin, de Hou Hsiao-hsien, e Phoenix, de Christian Petzold. A primeira delas confrontarase con outras dúas aproximacións ao xénero wu-xia asinadas por Wong Kar-wai (Ashes of Time Redux e The Grandmaster). No caso do filme de Petzold, establecerase unha conexión ambiental a través de Berlín occidente, de Billy Wilder, e outra temática con Vértigo, de Alfred Hitchcock.
Tamén se amosará unha nova colaboración coa Escola Técnica Superior de Arquitectura da Universidade da Coruña, Cinemascapes, na que se explorará a relación entre o cinema e a paisaxe a través de proxeccións e debates. A primeira das sesións terá lugar o 5 de febreiro co pase de La infancia de Iván, de Andrei Tarkovsky, e a presentación do libro que reúne os seus escritos de mocidade.
Fóra de Serie
Esta carteleira completarase coas sección habituais como Fóra de Serie, no marco da que se proxectarán os filmes Los hongos, de Óscar Ruiz Navia (14 de xaneiro); Baja marea, de Roberto Minervini (15 de xaneiro); Aguas tranquilas, de Naomi Kawase (21 de xaneiro); Un legado de humo, de Luis Argeo e James D. Fernández (3 de febreiro); Victoria, de Sebastian Schipper (12 de febreiro), Taxi Teherán, de Jafar Panahi (19 defebreiro); e Nadie lo sabrá, de Ramón Torrado (26 de febreiro).
Ademais, CGAI Júnior proponlles dúas sesións aos espectadores máis novos con El chico, de Charles Chaplin, o 23 de xaneiro, e Wallace & Gromit. La maldición de las verduras o 27 de febreiro, mentres que a sección Desencadres continuará afondando na obra de Stan Brakhage, do que se ofrecerá un novo programa o 6 de febreiro.
Foron presentados os novos equipamentos do Centro de Supercomputación de Galicia) instalación que vai incorporar un segundo computador cuántico, denominado IQM Spark. O novo supercomputador e os dous novos computadores cuánticos que se van adquirir situarán a nosa Comunidade na vangarda europea en canto a capacidade de almacenamento de datos e participación en grandes proxectos internacionais. En canto aos computadores cuánticos, o de menor capacidade (5 cúbits), dedicarase exclusivamente a tarefas de formación, probas de concepto e de algoritmia, complementando así ao de maior capacidade (54 cúbits), que será o buque insignia.
A Xunta exixe o rescate da AP-9 e asina cos Gobernos de Asturias e Castela e León e o tecido empresarial das tres comunidades a Declaración Compostela, que insta á Comisión Europea a culminar o ditame sobre as prórrogas da AP-9 e AP-66. A conselleira de Vivenda e Planificación de Infraestruturas, María Martínez Allegue, interveu no encontro 'As infraestruturas viarias do Noroeste', organizado pola Confederación de Empresarios de Galicia.
