Notas de prensa

A Asociación de actores e actrices de Galicia celebra o seu 30º aniversario cunha web e un catálogo profesional renovados

A Asociación de Actores e Actrices de Galicia (AAAG) acaba de renovar a súa páxina web e o seu catálogo en liña coincidindo co seu trixésimo aniversario, efeméride que celebra tamén coa creación dunha ampla base de datos dos Premios de Teatro María Casares e dunha ferramenta de votación en liña que se empregará na próxima convocatoria destes galardóns.

Estas novidades foron presentadas hoxe nunha rolda de prensa na que ademais do presidente da AAAG, Vicente Mohedano, participaron o director da Axencia Galega das Industrias Culturais (Agadic), Jacobo Sutil, e a delegada en Galicia da Fundación AISGE, Isabel Blanco, en representación de dúas das entidades que colaboraron coa asociación na posta en marcha deste portal web renovado no enderezo www.aaag.gal.

Jacobo Sutil felicitou os responsables deste proxecto, a través do que tanto o sector como a cidadanía en xeral teñen acceso directo ao máis relevante da actividade promovida pola Asociación de Actores e Actrices de Galicia, así como á compilación de nomes, datos, eventos e premios que foron conformando ano a ano a realidade da profesión actoral galega.

Historia da profesión actoral en Galicia

En palabras do director da Agadic, “cunha simple ollada, este novo portal dixital lévanos a tomar consciencia da celebración dun feito relevante para a cultura do país, como é que o colectivo que aglutina os principais intérpretes galegos, tanto no eido escénico como no audiovisual, cumpra 30 anos de actividade continuada”.

Neste sentido, incidiu no relevante papel que desempeñan os principais colectivos que configuran na actualidade o mapa asociativo das industrias culturais galegas. Tamén o presidente da AAAG fixo fincapé neste “traballo necesario” da asociación “en prol da dignificación de toda unha profesión, afondando na defensa dos dereitos laborais, na formación dos actores e actrices e tamén na visibilización do noso teatro, creando os Premios María Casares”.

Para celebrar este trixésimo aniversario, o novo portal recupera a historia da Asociación de Actores e Actrices de Galicia a través de diferentes materiais audiovisuais, como os vídeos nos que algúns dos fundadores do colectivo (Mabel Rivera, Ernesto Chao, Gonzalo Uriarte, Luma Gomez e Rosa �lvarez) reviven ante a cámara o momento da súa creación, o nacemento do Centro Dramático Galego, a negociación do convenio colectivo ou o traballo realizado no ámbito da formación.

A AAAG renovou, ademais, o catálogo en liña dos seus asociados e asociadas, que vén mantendo desde 1990, primeiro en versión en papel e a partir de 2008, en versión dixital. O obxectivo é poñer a disposición dos profesionais do sector e mais do público xeral unha ferramenta actualizada, máis doada de compartir e máis axeitada para a visibilización dos actores e actrices, que poderán editar o seu propio espazo no catálogo, sen intermediación e máis rapidamente.

Premios María Casares

Nesta nova versión da web inclúese, así mesmo, un portal específico dos Premios de Teatro María Casares que, desde a súa creación en 1997, conforman o gran escaparate da escena e unha celebración para todos os profesionais. Neste espazo, atópase unha ampla base de datos relativos aos galardóns, na que se recolle información de gran parte dos espectáculos presentados, as biografías dos profesionais recoñecidos co Premio de Honra Marisa Soto ou os manifestos galegos do Día Mundial do Teatro.

A través deste mesmo portal, disporase por vez primeira dunha ferramenta de votación en liña, de xeito que na próxima edición dos premios todo o sistema de votación desenvolverase a través da rede. O obxectivo é facilitarlle o proceso tanto á organización como ao censo de votantes, integrado por preto de 500 persoas, entre socios, gañadores e finalistas de todas as edicións, críticos, programadores e persoeiros destacables do mundo teatral.

Nota de prensa remitida por AAAG:

A Asociación de Actores e Actrices de Galicia (AAAG) celebra neste 2015 o seu trixésimo aniversario e aproveita a efeméride para renovar o seu portal web, crear unha base de datos dos Premios María Casares e repasar a súa historia, que non é outra que “a historia do asociacionismo no sector teatral e audiovisual”. Lembrouno así Vicente Mohedano, presidente da AAAG, nunha rolda de prensa celebrada esta mañá no Salón Teatro e na compaña de Jacobo Sutil, director da Agadic, e Isabel Blanco, delegada en Galicia da Fundación AISGE.

Este aniversario representa para a AAAG a oportunidade para realizar un percorrido pola súa historia dende a súa fundación en Compostela en 1985 até os nosos días, un período de trinta anos no que a Asociación impulsou a profesionalización dos nosos actores e actrices tanto no terreo teatral coma no ámbito audiovisual. “En todos estes anos, a AAAG desenvolveu un traballo necesario en prol da dignificación de toda unha profesión, afondando na defensa dos dereitos laborais, na formación dos actores e actrices e tamén na visibilización do noso teatro creando os Premios María Casares, que o próximo ano chegarán xa a súa vixésima edición”, explicou Mohedano, quen engadiu que na nova páxina web da AAAG se inclúen diferentes contidos para recuperar a historia da Asociación, como distintos vídeos co testemuño dalgúns dos fundadores do colectivo. Así, Mabel Rivera, Ernesto Chao, Gonzalo Uriarte, Luma Gómez ou Rosa �lvarez reviven ante a cámara a creación da AAAG, o nacemento do Centro Dramático Galego ou a negociación do convenio colectivo do teatro.
Estes materiais recóllense nun novo portal -anovado co apoio da Agadic, a Deputación da Coruña e Aisge- que se suma ao dominio .gal e que se adapta a todo tipo de dispositivos, facilita a navegación e que actualiza a interface dunha ferramenta que, como lembrou Mohedano, resulta “imprescindible como xanela ao mundo para comunicar a actividade da AAAG tanto aos socios coma á sociedade”. O proxecto de coordinación da web estivo coordinada por Marta Horjales e Alberto Blanco, mentres que A Navalla Suíza se encargou de materializala.

Premios María Casares

A páxina web da AAAG inclúe nesta nova versión un portal específico dos Premios de Teatro María Casares que, dende a súa creación en 1997, conforman o gran escaparate da escena e unha celebración para todos os profesionais. Neste espazo específico atoparase unha ampla base de datos dos Premios, no que se recolle información de gran parte dos espectáculos presentados aos galardóns, as biografías dos galardoados co Premio de Honra Marisa Soto ou os Manifestos Galegos no Día Mundial do Teatro. Ademais, no portal dos María Casares inclúese por vez primeira unha ferramenta de votación en liña, de xeito que na próxima edición -a vixésima dos galardóns- todo o proceso de votación desenvolverase a través da rede. Facilitarase deste xeito o proceso, tanto para a organización coma para o censo de votantes, conformado por preto de 500 persoas entre socios e socias, gañadores e nomeados de todas as edicións, críticos, programadores e persoeiros destacables do mundo teatral.

O catálogo

A AAAG renova tamén o Catálogo en liña dos actores e actrices. Esta ferramenta, que impulsou a Asociación dende 1990 na súa versión en papel, deu o salto á rede en 2008. Ese ano, a AAAG creaba o primeiro catálogo de intérpretes en liña de todo o estado para o que contou co apoio imprescindible da Fundación AISGE, entidade coa que a AAAG mantén unha longa e estreita colaboración. Agora, sete anos despois, a AAAG achega unha ferramenta actualizada, máis fácil de compartir e máis axeitada para a visibilización do traballo duns actores e dunhas actrices que poderán editar o seu propio espazo no catálogo, sen intermediación e permitindo unha rápida actualización dos seus datos profesionais.

Con todas estas novidades, a Asociación de Actores e Actrices de Galicia continúa a desenvolver o seu traballo de difusión e visibilización dos seu corpo asociativo neste ano que se celebra o seu trixésimo aniversario e no que o colectivo repasa a súa traxectoria, mais tamén mira cara ao futuro dunha asociación que aglutina a preto de 300 profesionais.

Fotografía: AAAG