Buscador
Noticias
Unha selección dalgunhas das obras máis importantes da Colección de Arte da Fundación María José Jove chegan á USC a través da mostra Corpos presentes que poderá visitarse ata o 3 de xullo na Igrexa da Universidade e no Colexio de Fonseca. Dende Salvador Dalí, pasando por Chillida ou Tápies, esta exposición concibida para o Xacobeo 2021-22, está composta por trinta obras que desenvolven unha narrativa en torno ao corpo, convidando a repensar conceptos básicos da peregrinación con procesos místicos e espirituais implícitos tamén no proceso creativo.
A Xunta presentou o programa Primavera Xove para ofrecer opcións de lecer e ocio seguras para a xuventude galega no actual contexto de pandemia. A directora xeral de Xuventude, Participación e Voluntariado, Cristina Pichel, adiantou que esta nova iniciativa se desenvolverá en tres formatos diferentes programas de fin de semana nos albergues xuvenís, encontros formativos nos campos universitarios e feiras nos espazos xoves, e terá lugar durante os meses de maio e xuño. A primeira destas actividades centrarase en estadías de fin de semana nos albergues xuvenís Lug II de Lugo e en Gandarío, situado no concello de Bergondo.
O director xeral de Relacións Exteriores e coa UE, Jesús Gamallo, participou esta semana no terceiro pleno do ano do Comité Europeo das Rexións (CdR), celebrado de forma virtual dende o martes. Na sesión desta mañá, os máis de 300 representantes rexionais e locais debateron sobre as dificultades atopadas para a recuperación do sector turístico, hostalería e restauración. O comisario de Mercado Interior, Thierry Breton, explicou como este é o sector cun déficit de investimento máis elevado de entre os 14 ecosistemas definidos na Estratexia Industrial da UE.
Artellado como un encontro de tres días que terá lugar do 5 ao 7 de novembro no novo Edificio Fontán da Cidade da Cultura, Carta de Santiago contará coa participación de relatores e relatoras de prestixio internacional, especialistas nos diferentes eidos temáticos que tratará o evento, que se estrutura en catro macro-áreas: economía, ciencia, medio ambiente e cidadanía. Das conclusións deste encontro nacerá unha publicación homónima, documento que ademais de recoller as reflexións xeradas, incluirá textos que complementen as conversas e debates ao vivo.
A conselleira de Emprego e Igualdade, María Jesús Lorenzana, mantivo hoxe novos encontros virtuais desde Santiago de Compostela cos integrantes do Diálogo Social -Confederación de Empresarios de Galicia (CEG), UXT e CCOO- e coa Mesa do Emprego Autónomo para terminar de consensuar as bases do 3º Plan de Rescate que a Xunta porá en marcha cos 234 millóns de euros comprometidos polo Estado para Galicia. Lorenzana anunciou aos interlocutores sociais e empresariais a dobre intención do Goberno galego de reservar cartos para que as axudas cheguen aos negocios mais afectados pola pandemia, e que os importes vaian en consonancia coa perda de facturación e o número de persoas empregadas, como se fixo nos dous plans de rescate anteriores.
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 3.072, deles 702 son da área da Coruña, 226 da de Lugo, 271 da de Ourense, 488 da de Pontevedra, 897 da área de Vigo, 395 da de Santiago e 93 da de Ferrol. Do total de pacientes positivos, 48 están en UCI, 149 en unidades de hospitalización e 2.875 no domicilio. Polo de agora, en Galicia hai un total de 117.715 persoas curadas, rexistrándose 2.392 falecementos. O número de PCR realizadas é de 2.091.968. O número de doses de vacina contra a covid-19 administradas é de 1.289.153.
O presidente do Goberno galego, Alberto Núñez Feijóo, informou hoxe das novas medidas acordadas polo comité clínico para seguir avanzando no proceso de apertura gradual e medido, e adaptarse á nova situación que se abre co fin do estado de alarma. Nesta liña, afirmou que o Executivo autonómico seguirá escoitando aos expertos sanitarios que integran o comité clínico para tomar decisións, co obxectivo prioritario de xestionar a pandemia e protexer aos cidadáns dos riscos sanitarios, económicos e sociais.
A Comunidade galega viviu un mes de abril moi cálido e con precipitacións normais. Así se desprende do avance do último informe climatolóxico de MeteoGalicia, que conclúe que o cuarto mes de 2021 quedou caracterizado, en xeral, polas situacións anticiclónicas, interrompidas pola chegada de zonas de aire frío en altura que ocasionaban a presenza de chuvascos de carácter tormentoso. Esta situación fixo que as temperaturas medias estivesen por riba das agardadas nesta época do ano; mentres que as chuvias si se situaron moi próximas ás agardadas, incluso en algún punto do interior o mes pode considerarse húmido.
Galicia pechou o mes de abril creando emprego, con máis afiliacións á Seguridade Social e con máis contratacións, e con menos paro nas evolucións anual e mensual. Ademais, foi a comunidade galega con maior caída do paro tamén con respecto a marzo e a hai un ano. A directora xeral de Formación e Colocación, Zeltia Lado, destacou hoxe que os datos do paro rexistrado reflicten que o mercado laboral galego está a resistir á covid-19, xa que o desemprego cae tamén, na evolución anual e mensual, en todos os sectores de actividade, nas catro provincias, nas sete grandes cidades e en colectivos prioritarios para a Xunta como son as mulleres ou os menores de 30 anos.
O comité clínico que asesora á Xunta de Galicia na xestión da pandemia provocada pola covid-19, vén de acordar o establecemento do nivel máximo de restricións nos concellos de Cambados, Vilanova de Arousa, Cualedro e Laza. Así mesmo, o comité tamén determinou o nivel alto de restricións nos concellos da Merca, A Pastoriza, Marín, Gondomar, Salceda de Caselas, Padrón, Mesía, Ribeira, Coristanco e A Laracha. Ademais, as medidas do nivel medio serán de obrigado cumprimento nos termos municipais de Carballeda de Valdeorras, Verea, Muíños, Verín, Xinzo de Limia, Allariz, Toén, Chantada, Meira, Cerdedo-Cotobade, Vilagarcía de Arousa, Soutomaior, Fornelos de Montes, Cangas, O Porriño, Tui, Vigo, Nigrán, Lalín, Silleda, Noia, Melide, Ordes, Carballo, Betanzos e Cambre.
