sábado, 24 de octubre de 2026
Nota de prensa remitida por el Gabinete de Comunicación de la Xunta de Galicia:
O secretario xeral de Cultura, Anxo Lorenzo, recordou que as actividades coas que Galicia celebra este ano o 150 aniversario do nacemento de Valle-Inclán van ter continuidade en 2017, cun horizonte do mes de outubro como remate simbólico da conmemoración, coincidindo co mes do nacemento do escritor.
Así o asegurou esta mañá no Parlamento de Galicia, onde compareceu para responder unha pregunta da Comisión 4ª de Cultura e Educación sobre as liñas de acción da Xunta de Galicia para potenciar a figura de Valle-Inclán, e sobre a coordinación entre as administracións e as entidades de referencia no ámbito cultural para desenvolver a programación conmemorativa.
A este respecto, Anxo Lorenzo destacou que desde o primeiro momento se levou a cabo unha acción coordinada coas principais institucións vinculadas coa figura do escritor para planificar o programa de actividades, das que salientou a súa diversidade de temas e de formatos. Nese sentido explicou que a programación lle achegará á cidadanía a obra do escritor a través das artes escénicas, do audiovisual, da poesía, da música e do patrimonio cultural con diferentes propostas, entre as que se inclúen obradoiros, contacontos, edicións conmemorativas, recursos tecnolóxicos, proxectos expositivos, roteiros, charlas divulgativas, recitais e lecturas públicas.
Estas propostas multidisciplinares, segundo precisou, van conseguir transmitir socialmente unha revisión de Valle-Inclán e poñer de actualidade a figura poliédrica e diversa do escritor. Así mesmo, convidou a cidadanía no seu conxunto a participar nesta celebración e recordou outras conmemoracións centrais da axenda cultural de 2016. Entre elas mencionou o centenario do premio Nobel galego Camilo José Cela e o centenario tamén da fundación das Irmandades da Fala, para o que se deseñou un programa colectivo que se dará a coñecer, segundo anunciou, a próxima semana.
Diversas actividades conforman o programa conmemorativo dos 150 anos do nacemento de Valle-Inclán, sobre o que o secretario xeral de Cultura fixo un breve repaso durante a súa intervención. En canto ás propostas de difusión social e de dinamización dos espazos literarios do escritor, referiuse aos roteiros e iniciativas de sinalización en lugares con vínculos familiares, biográficos e simbólicos co dramaturgo, xunto con lecturas públicas e a realización de novos recursos para as casas-museos do escritor en Galicia, como unha guía para coñecer a riqueza destes dous centros.
Recordou tamén as propostas audiovisuais, con ciclos de cine para se achegar á obra do escritor a través da pantalla, e o especial protagonismo das artes escénicas, da man de Quico Cadaval, da compañía Títeres Cachirulo, da Escola de Teatro Valle-Innova e do centro de creación escénica de Madrid Teatro de La Abadía.
A programación expositiva é outro dos eixos principais da celebración, entre a que destaca o proxecto da Cátedra Valle-Inclán da USC baseado en tres mostras sobre diversos aspectos da vida e obra do dramaturgo.
Publicacións conmemorativas, iniciativas no ámbito educativo, propostas gastronómicas e novos recursos na rede, onde estará accesible todo o fondo do Arquivo Dixital do Gruo Valle-Inclán USC, completan as liñas centrais da programación desta efeméride, promovida pola Consellería de Cultura e Educación, polos concellos da Pobra do Caramiñal e de Vilanova de Arousa, polas casas-museo Valle-Inclán en Galicia, polo Consello da Cultura Galega, pola Asociación Amigos de Valle-Inclán, pola Fundación Valle-Inclán, polo Centro Galego de Artes da Imaxe, pola Deputación de Pontevedra e mais pola Universidade de Santiago de Compostela.
O pasado mes de novembro de 2015, o Parlamento de Galicia acordaba por unanimidade instar a Xunta de Galicia a impulsar e acompañar as principais iniciativas culturais que se realicen para a conmemoración do 150 aniversario do nacemento de Ramón María del Valle-Inclán no ano 2016, por medio dunha programación cultural conxunta, acorde coa relevancia desta efeméride, que poña de relevo a súa excepcional figura, obra e legado, e que trate de involucrar as principais institucións culturais galegas e entidades relacionadas con este autor, así como o conxunto da nosa sociedade.
Fotografía: Gabinete de Comunicación de la Xunta de Galicia
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
